جدي رسول الله!؟

يوليو 27, 2011 - 10 تعليقات

مدري انا هيك عم حس مدري هيك صاير…بس انو بهل الفترة عم بتفركش بعبارات مالي متعود عليها..متل انو نحنا احفاد رسول الله…احفاد خالد…احفاد عمر…احفاد سمير….

انو بالاول تحمست…قلت طلع عنا بالعيلة مشاهير…اساسا انا عيلتي معفشكة..بزمناتو طلع منها مسؤول قام طلع حيوان و حرامي…..فحلو يطلع شخصيات مشهورة بالعيلة و سمعتها جيدة…المهم ضليت على هالحال فترة..كل ما احكى مع حدا قلو جدي  رسول الله هيك قال..و خالي خالد و عمتي فاطمة و عمي ابو بكر قالو و ساوو…..و نحنا عنا بقريش منساوي هيك و مناكل هيك… …ما صدقت طلع نسبي مهم يعني…..انبحتت..لوقت ما دورت على صور بألبوم العيلة و مالقيت اي صورة تجمعني فيهون…و قريت شوي بشجرة العيلة تبعي و مالقيت اي فرع و لا اثر بيربطني بهل الاشخاص…هو كلمة وحدة على اخراج القيد…هي يلي ممكن تكون الرابط بيني و بينهون…فقط لا غير..

هلأ بيجوز في عالم بيتحمسو هيك..و في عالم ما بيتحمسو..بس انو ما بصير عندهون ردة فعل..متل ما كان يصير معي….يعني لما اقرا عبارة احفاد رسول او احفاد غيرو ما تترك عندي انطباع سلبي…و بنفس الوقت ما تترك انطباع ايجابي..يكون شعوري هيك مبهم و بحاول انو ما فكر بالعبارة…بمر عليها مرور الكرام….

بعدين كنت عم اصفن فيها لانو شوي كتر استعمالها هالفترة…انو هلأ انا اخراج قيدي بيهئني عقائديا انو هالعبارات هي ما تضرب على اي وتر او جرس طائفي براسي…انو طيب جدي رسول الله…خلص جدي رسول الله شو بدكون يعني…شو بصير عليي…بس الفكرة انو شو منشان يلي اخراج قيدهون بيخليهون يقولو انو هنن مالهون احفادو لهل الزلمة و لا التاني……انو ابتزبط يكونو احفادو ببساطة…و هيك عبارات ممكن تطن جرس طائفي…..هدول شو بيكون وضعهون؟

على حد علمي خالد بن الوليد ما اجا حارب منشان سوريا…اساسا ما كان في شي اسمو سوريا…و النبي محمد ما داس سوريا لنفس السبب…فمن وين اجا النسب و صرنا ابناء الوليد و احفاد الامام؟

من ايمتن الدين بيعطي نسب و نسل؟ عندي رفيق سويدي بوذي..قلتلو مبارح انو انا متعاطف معو بخصوص قضية النيبال بأعتبار اصولو نيبالية لانو بودا الله يحفظو ولد هنيك…الزلمة ابتسم هيك و قلي…تاك, بس انا سويدي يا جحش…..

انو اذا انا بعبد البطة مثلا…و انت بتعبد البطة..هالشي ما بيساوينا اخواة..و ما بيساوي البطة ستنا…هالشي بيقول انو نظرتي و قناعتي للبطة متل نظرتك و قناعتك..انو في شي مشترك بيني و بينك..بس في كتير شغلات مختلفة… انت ابن ابوك و امك و ستك و جدك..و انا ابن امي و ابي و ستي و جدي…ما لك اخي و البطة مالها ستي…

نحن بثورة لنبني سوريا جديدة…دولة للسوريين ككل..مو دولة للمسلمين و ضيوفهون…مو لنرجع نبني الدولة الاسلامية يلي خلص كازها من مليون سنة…انا سوري..قبل ما كون اي شي…يلي بيجمعك معي مو نسبك لنبي او لبطل…يلي بيجمعك معي هو انك سوري و بس…

خالد بن الوليد ما كان عم يحارب لنفس الهدف يلي نحن عم نحارب منشانو…ما حارب بأسم سوريا او لشعب سوريا…فليش صار بطل سوري؟ هو بطل اسلامي عربي…بس مانو سوري..و يلي بيعتبرو خالو او عمو…معناها يسلملي على عمو ابو لهب و مسيلمة بطريقو…

بعرف القصة رمزية عند البعض…بس انو تكون رمزية ما معناها بتكون صح…انو في كوشة انبياء بيأمنو فيهون العالم و خصوصا المسلمين…ليش نقيتو النبي يلي مو كل السوريين متفقين عليه؟  شبو ادم مثلا؟ حباب و نبي و بتحبوه و كل اهل الاديان موافقين عليه …..و ليش احفاد خالد مو احفاد بولس مثلا؟  ثم شو منشان السوريين يلي ما بيأمنو لا بدين و لا بنبي؟ هدول احفاد مين بقا؟ احفاد البطة السودا؟

و اذا بدنا نقول ايه انو خالد كان جدع و رجال و محنك عسكريا..فمنشان هيك بدنا نكون متلو…يا اخي فكرك لو خالد بن الوليد كان عم يحارب النظام بسوريا كان نفد؟  عيارو رصاصة من شبيح و هو على مداخل حمص بتهرو من على حصانو..فيعني حتى اساليبو الحربية و النضالية ما بتفيدنا بثورتنا مقدار انملة..بالعكس…نحنا ثورتنا سلمية.. …ماعنا لا احصنة و لا سيوف…فيعني مالي شايف شو المحفز و شو الهدف المرجو من استعمال دلالات اقصائية و بنفس الوقت مالها طعمة ثورية…بالعكس تماما..بتضر اكتر ما تفيد…

ثورتنا سورية….مالها اسلامية…ثورتنا ضد النظام الاستبدادي لنبني نظام ديمقراطي مدني مو لنرجع النظام الاسلامي…ثورتنا ثورة كل سوري مو ثورة كل مسلم…ثورتنا ثورة كرامة وطنية مو ثورة كرامة دينية…ثورتنا ثورة لتعز وطن مو لتعز دين…ثورتنا ضد حاكم مستبد و حرامي مو ضد كافر او مرتد…

انا سوري…انا ممكن كون حفيد يوسف العظمة…حقيد صالح العلي..حفيد جول جمال… حفيد سلطان الاطرش..حفيد حسن الخراط…حفيد ابراهيم هنانو….بس بأكدلك انو اكيد مالي حفيد رسول الله و لا خالد بن الوليد و لا صلاح الدين الايوبي ولا عمر بن العاص و لا حتى هارون الرشيد..

انا حفيد جدي..و جدي مات..و لما مات كان وطني مغتصب..و جدي ما نفعني بشي و ما رح ينفعني بشي..انو الزلمة ميت شو ممكن يفيدني؟….و اذا بدي حرر بلدي..بدي حررو لاني بدي كون سوري حر..بدي بلدي يكون حر و نضيف و حلو و متحضر ….مو لانو في نبي او اله او بطل تاريخي ساوا نفس الشي كرمال وطنو…

جارتنا ابتهاج…

يوليو 26, 2011 - 11 تعليقات

هلأ انو امها الها خبصاتها….بس كمان مو ذنبها…انا مافيني لومها….هي كانت ضرب خرندعي..جمال و علم و ثقافة و عيلة و اصول و تاريخ…غير انها مغرية جدا…خصبة  حتى كانت..بأيام شبابها….. و اي انسان عاقل و طامح و حالم بيحط عينو عليها و بدو يدحش شو ما بيقدر يدحش….فما فينا نلومها…مو ذنبها…ذنب هالعالم يلي استحل لحمها……..

اجت هي…طلعت غير امها…انو تعلمت من اغلاط امها….مافي واحد فايت وواحد طالع…مستقلة عنهون كلهون و ماحدا الو كلمة عليها…اخت رجال…قد حالها…بشبابها كانت احلى من امها…مزبطة دراستها و امورها المالية على احسن ما يرام….و شغل ثقافة و فن و حياة اجتماعية…و حتى بالدين علاقتها جيدة و رفقاتها من كل الاطياف..شي كردي و شي اشوري و شي علوي و شي سني و شي الخ…انو هيك ماضي امها المخبوص فرض عليها انو تكون على احتكاك من طوائف و عرقيات حتى الويكيبيديا مو سمعانة فيهون…انو هيك طبيعتها…قلبها كبير…و امورها تمام…و انو متل اي بنت…بهيك مواصفات…العين عليها…و ليش لاء…انو ضرب رباني…حلوة و ريحتها طيبة..سيرتها على كل لسان…و الشباب بيجو من حارات بعيدة ليتمتعو بشوفتها…

مشكلتها بلشت من لما تجوزت…جوزها خطفها خطيفة…انو هو شغل عضل و مضل و ثوري و الذي منو…ففات بالعجقة و سحبها من الكل…و كانت امو داعيتلو…بقدر ما امها داعية عليها……الزلمة طلع جحش رسمي…ناكها رسمي..و ما عم احكي بالمعنى الجسدي لهل الكلمة الفجة…انو ناك فكرها و عقلها و مشاعرها…..كلشي ثقافة  براسها جمدت…مخها وقف…لسانها تربط……انو حيوان رسمي جوزها…..هي مشكلتها صحيح..بس مو ذنبها…..جوازة عاطلة…و جوازة الغصب عمرها ما بتعمر بيت..

صارت خدامة العيلة…و هي بنت عيلة و اصول و اموال ماشالله ما بتاكلها النيران…..و عيلة جوزها حلبتها و حلبت عيلتها…و فوق هيك..مشحوطينها و مأهرمنها…عايشة بزنزانة زوجية…صارت بشعة…شعرها مطئط و بشرتها ناشفة..برقة عيونها انطفت تقريبا..شخصيتها ضاعت..هويتها ما عادت واضحة المعالم…بتشوفها ما بتعرفها..خصوصا اذا بتعرفها شلون كانت…او بتعرف الامكانات يلي عندها…ضرب رباني عم قلك..ولي على بعضي شلون كانت…دار عليها الزمن…لبسها مبهدل..ريحتها طالعة بأغلب المناطق….بطلت لعب رياضة و صارت سمينة و فيها مليون مرض و علة…

الحارة كلها بتعرف جوزها اديشو وسخ…كلنا منعرفو..استبدادي..عاطل..كاذب..انو جحش رسمي..

حرام المسكينة شو صار فيها…كلنا قلنا انو خلص مشي خشبها..صارت من اسفل السافلين..مو ذنبها…و ما عم نلومها على الشي يلي انفرض…بس انو الشي يلي صار فيها مستحيل يمر بدون اثار نفسية كبيرة…انو سنين طويلة من علاقة استبدادية مع جوزها ما بيمرو بدون اثار بعيدة المدى…شروخ بشخصيتها و نفسيتها…فكلنا كنا غاسلين ايدينا منها…بس ما حدا منا بيلومها…منعرفو هو اديشو وسخ…بس انو حيوان مافينا نحكي شي…بلطجي و العلقة معو وسخة….

المخلوقة فاجئت الحارة انو رفعت صوتها بوشو و قالتلو طلقني…..حل عني..لك ما بدي ياك…صحي انك لزقة..خود الدبلة و طلقني…و من عذابك ريحني..و اصواتهون طلعت و عليت..ضربها ابن الحرام لما حكيت بوشو..صفقها كف رجت عليه الحارة..الجيران كلهون هربو على بيوتهون..بيعرفو جوزها و وساختو..و بنفس الوقت كان مزبط امورو معهون و مشربك حياتو بحياتهون……وهنن اساسا كل واحد عندو همو و مصيبتو…كلو سكر بوابو..بس كلو سمعان و عرفان…ضربها مرة تانية…و هي مدري شو صرلها..انتفضت..كل ما تاكل كف تعطيه الخد التاني و تقلو ضروب ما رح رد عليك بس حل عني…الاصوات عليت..و كلنا منعرف الوضع…كلنا منعرفها شلون كانت و شو كان ممكن مستقبلها يكون لولا هالجوازة العاطلة…..

ما عادت تسكت…حل عني و طلقني…و كل ما يصدف و يلتمو شوية عالم من ورا العياط…يركض جوزها و يقول في مين عم يتحركش بمرتي و انا عم طهرها..حلو عني..الموضوع داخلي…و يرجع يضربها..و يغتصبها ليكسر روحها من جديد…ماعجبتو فكرة انو روحها ترجع تعيش من جديد…بس هي مدري شو صاير عليها…رجعت سنين لورا بعمرها و بلشت ترجع البرقة بعيونها…بتحسها راجعة صبية..مدري شلون هيك صار عندها امل انو فيها تخلص من هالجوازة بعد دهر…

الكل كان بيقول عليها مسكينة شو صار فيها من ورا جوزها بس ما حدا توقع يجي يوم و تطلب الطلاق من هالازعر..الكل كان يقول و الله لو لا جوزها الحرامي كانت صارت و تصورت…الكل كان يقول انو يا خسارة بهل الامكانات تندفن بهيك جوازة…

هيك طول عمرنا بالحارة منحكي…

هلأ لما المخلوقة قررت توقف بوشو…و تطالب بطلاقها…صرنا نقول انو في مين عم يتحركش فيها من برا العيلة ..انو تركو نسوان الدنية و ما لقو غيرها…هلأ صرنا عم نقول انو و الله هي عينها زايغة…ما نحنا شايفينها صبح و مسا شلون صايرة جربانة..عايفة التنكة…فقيرة و مكسورة الجبين و الخاطر..حولة و كتعة و فكحة……مافيها شي الواحد يطمع فيه…خدامة بيت جوزها….

أذا ما عاد بدها جوزها مو معناها بدا تنام مع هاد او هداك..مو معناها بدها تطلق جوزها لتبدلو بواحد ازعر متلو…مو معناها بدها تطلقو لتصيع و تفلت…مو معناها بدها تعهر و تبيع حالها و تخرب مستقبلها…..اذا طلبت تسترجع حياتها و حريتها..مو معناها عم تنام مع السايح الفرنسي او السعودي او الاميركي او اللبناني….اذا ما عاد بدها جوزها مو معناها ما عاد بدها ولادها و رفقاتها و معارفها….

انت شايف انو الكل رح يلعب فيها و رح يقدر يلعب فيها..الكل رح يلعب بأسفلها و هي رح تكون مطوبزة و ساكتة ..انو هيك فاتحتها سبيل…..

انت شايف ثورتها ثورة على بيت الطاعة و نشاز على الاعراف القبلية….و على اساسو حرمتها…انت شايف طلاقها خيانة لقانون النكاح بين مغتصب و ضحية…و بدونو رح تفلت و تعهر شمالا و يمينا….

نسيت كل تاريخها و اصلها و فصلها…نسيت انها رح تتعلم من اغلاطها و اغلاط جيرانها بعد ما تخلص من جوزها…

مشكلتك انك عم تتعامل معها  ..شلون بدي قلك.. كأنها شرموطة…و نسيان انها  ثورية و حرة..متل ما طول عمرها كانت و امها كانت من قبلها… .. و ان طالت الجوازة…

حوار مع الرب السوري

يوليو 13, 2011 - 36 تعليقات

حوار و حوار و حوار…كلو صارو بدو حوار…

هلأ الصراحة تنحكى…انا احب الحوار…حلو الحوار…مفيد..و بينفس مافي الصدور….بس مين بدك تحاور؟ ما فهمت؟ بدك تحاورني؟ يخرب بيتك شو جحش…لك حيوان ما بتعرف مين انا؟

انا السلطة المطلقة عليك…مافي سلطة اعلى مني..قراري بوقعو من هون بيصير كن فيكون…و ممكن قراري يقتل عالم بحق و بلا حق…بس حياتكون بأيدي..مافي مين يجي يحاسبني…انا رب سوريا…فشلون بدك تحاورني؟ ليش بدي حاورك؟  مالنا جداد على بعض..شو عدا ما بدا؟

انت بالنسبة الي مجرد حشرة…بدعس عليها لما بدي…

انا شلون ممكن حاورك اذا اساسا ما لي معتبرك انسان؟…

انت خادم عندي…..انت و حياتك ملكي ..

انا اقوى منك…انا ابن مجرم ..انت مين انت؟

انا الملك و انت الرعيع.. حكمتك و ابي حكم ابوك من قبلك…

انا عندي كلشي…و انت ما عندك شي غير يلي عطيتك ياه

انا مقسم رزقك..فيني خليك تفقر او تغنى بشحطة قلم..

انا الهك..فيني خليك تعيش و فيني خليك تموت..فيني اعتقك و فيني اعتقلك..

انا ربك.. لانك عشت طول عمرك بتخاف تطلع فيني و تقلي اعور بعيني و فوقها عم  تركع على صورتي..

اذا بدك تكفر فيني….ببعتلك ملايكتي يشبحوك و يشنعو فيك و بعيلتك….كلو الا غضبي ابو الشباب…كلو الا غضبي……شبيحتي بكل مكان..و اذا شاكك بجهنم ما عندي مشكلة ابعتك جولة فيها بشحطة قلم…و خليك ترجع و تحكي عنها بالصوت اوبالصورة منشان باقي العالم تتتعظ وتأمن…خليك مؤمن فيني…و اذا بتعبدني صح بعطيك كرت عجنة عالارض…خيو ليش تنطر لتموت و تعا يا في يوم قيامة يا مافي…انا جنتي جاهزة…انا بطعميك…و بشربك..و بعطيك اعلام و بساويلك دستور جديد يخليك تتأكد من الهيتي و ترجع تعبدني عالساكت متل الاول و اكتر…انو جنة بالايد احسن من عشرة عالشجرة….سئال البوطي اذا بدك…

بدك تحاورني؟ انا شو بستفاد من حوارك؟ انا اقوى منك طول عمري…. و صرلي ايدعشر سنة و ما حاورتك و ابي ما حاورك من قبلي..ليش بدي حاورك؟

طيب بدك حوار…لعيونك

وينكون يا شبيحة…فرزو سلاف و عباس و دريد ..نزلوهون من السما..و حطوهون عالارض…و عطوهون السيناريو..مو تبع اخر السبعينات…استعملو النسخة المعدلة…زتولكون حقوق انسان..هي دارجة اليوم…شوية تعددية…و اذا بتكترو كلمة حرية معليش…مو مشكلة…خلي الخلق ينبسط…و منو منكون شغلنا شوية ممثلين و نزلنا نسبة البطالة بالبلد و دورنا عجلة الاقتصاد…..خليهون ينبسطو..نجوم و حوارات و مؤتمرات  و فلاشات..ما حلم فيها لا المسيح و لا النبي محمد…الاولاني انصلب و التاني يا دوب غنولو طلع البدر علينا لما وصل لعند صحابو…انا عم ساويلكون دولة عصرية..مؤتمرات طالعة  و مؤتمرات نازلة…دولة حضارية فيها كل يوم مؤتمر و بنهايتو في بيان و توصية لمؤتمر جديد…رح اخلقلكون دولة ديمقراطية ما حدا بحك طيزو فيها بدون ما يصير مؤتمر تشاوري و وطني و ديمقراطي و شعبي و اثتلافي و توصيات بأنجع السبل لحك الطيز بحرية بدون المساس بشخص رئيس الجمهورية….انا لها……بكفي اخترعتلكون الانترنت…لولايي ما كنتو عرفتو شو هو الموبايل و شو هو البنك الخاص و شو هي السيارة الصينية…رح احترم حقوق الانسان…اكيد ولو…هلأ مين رح اعتبرو انسان و بيستحق  هالحقوق و المكارم…هالشي متروك للمعطيات الامنية…شو بدكون كمان؟…بدكون احزاب؟ صار بدكون تفوتوبالسياسة يا بعدي؟ خلص خيو…..تحاورو مع الممثلين و انا بخلق يلي بينسابني و بيناسب صحابتي…شو ما بدكون بيصير المهم تضلو مقتنعين انو مالكون من رب سواي على هالارض الفانية……

الحوار رح يكون محور بلدنا…كلشي رح يصير من خلال حوار…و بأخر النهار…بعد نهار طويل من الحوار..كل واحد منكون بيرجع ع بيتو…بيفوت ع غرفتو..و مالكون غير الدعاء….

و انا يا بلبي..يا ما بلبي…بتعرفوني فكري…صرلكون معي ايدعشر سنة…لا تصدقو الاشاعات…مو بالضرورة يلي جرب المجرب كان عقلو مخرب…هادا مثل استعماري…انتو مالكون غيري…

ويلي بدو يكفر او يرتد..

يا ويلو من غضبي…سئلو عني…سئلو اطفال درعا..سئلو شباب البيضا…..سئلو عني من جنوب سوريا لشرقها و شمالها و غربها… لتعرفو انو انا عند كلمتي…

خلينا نتفق حقنا لدمائكون…طول ما سوريا بلدكون و الله سوريا و بشار و بس شعاركون…رح ابقى انا ربكون ….

غير هيك..تحاورو لتشبعو.. اساسا ما اطال الحوار عمرا و لا قصر العمر كثرة الحوار…تحاورو يابي.. تحاورو بعيد..و لا تنسوني بالدعاء…

طيب و شو البديل؟

يوليو 7, 2011 - 10 تعليقات

لو اجاني ليرة كل مرة بسمع هالسؤال من وقت ما بلشت الثورة كنت متل هلأ عم اطلب بيتزا احسن ما حاول اخترعها …ايه زمن..

المهم…كتير سمعت و عم بسمع سؤال الضربة القاضية تبع و شو البديل…مين ممكن يحكمنا..مين ممكن يحل محل الاسد…

هلأ اليوم كتير قرف و رطوبة هون….هالبلد مناخها بيخري صيف و شتي…فمالي حيل ساوي شي…ضربتلي سحبتين على انغام موسيقى فرقة تفركشت فيها بالشارع من يومين…اسمها اوكا…شغلة……بس انو شو منشان البدائل؟

صفنت انو هلأ اذا بدنا ننظر للبدائل يلي عنا و ممكن تبدل النظام الحالي…منلاقي انو في كتير…

يعني ممكن يكونو الاسلاميين…

ممكن يكونو العسكر…

ممكن يكونو جماعة فلاني او جماعة علاني

ممكن يكونو جماعة الدولة الفلانة و جماعة الدولة العلانية

ممكن يكونو جماعة المريخ مثلا

هي كلها بدائل للنظام يلي عنا….الشي المشترك بكل هالبدائل انها بتخري…بس انو ليش ما تكون بتخري…طبيعي تكون بتخري…لانها بدائل…

بس انو..

مين قال بدنا بدائل؟…البدائل منختارها لما بيكون عننا حياة و نظام سياسي صح…البدائل هي الاحزاب المختلفة و يلي شغلتها تتنافس بينها لتكسب تأييدها بالشارع…هي البدائل بهيك حالات عادة….

 نحنا بثورة عالظلم….نحنا بثورة حرية…نحنا مالنا عم نعمل انقلاب….

نحنا بثورة بدنا نفرمت نظام و نبني نظام جديد…ما بدي بدل الويندوز بالماك…بدي نظام تفصيل لجهازي …كلنا منصمم فيه ليخدم وطنية و مصالح الكل مو بس البعض…ما بدنا ننهي الثورة بتعيين اي قائد او حزب قائد…بدنا ننهي الثورة بأسقاط حزب واحد  و نفتح الباب للاحزاب يلي من خلالها مننتخب رئيس مو قائد….بدنا ننهي الثورة و يكون عنا مجلس بيمثل كل الفئات ليدير البلد كم شهر من هون لينضخ الدم بالحياة السياسية و تنصاغ قوانين جديدة ترجعنلنا بلدنا لدولة كلنا النا رأي فيها….و نشوف المرشحين و نسمع برامجهون و يلي بيعجبنا مننتخبو و يلي لاء منقلو طيط…..بدنا نبني قانون يشغل الحكومة بخدمتنا و يكون رقيب عليها…بدنا جهاز امن يزرع جواسيس بتل ابيب مو ببيوتنا…بدنا قضاء حر ..بدنا كتير شغلات..بس ما بدنا بديل ليلي عنا…بدنا شي جديد بعمرنا ما كان عنا منو…..من باب يلي جرب المجرب كان عقلو مخرب..ما بدي اعرف من هلأ مين رح يكون رئيس بعد بشار..لسا بكير عهل المعرفة..

انا ما بدي بديل…انا بدي حقي بوطن صحيح…و حقي اني يكون الي صوت بهل الوطن…بدي يكونو صوتي هو سلاحي…..

طريقنا طويل يا شباب…بس غمضو عيونكون و تخيلو سوريا يلي طول عمركون بتحلمو فيها..(يفضل تعاطي شي عقار مزهز للمساعدة على ايصال الفكرة)…هي فينا نصممها من اول و جديد…ما بدنا بديل..بدنا دولة جديدة…

طريقنا طويل…بس هلأ صار في فرصة لكل سوري انو يعمل شي ليشارك بتصميم سوريا يلي بيحلم فيها…هي اول مرة بحياتنا كلها بيكون عنا هالخيار…خيار مكلف اكيد…بس رجعو غمضو عيونكون و تخيلو سوريتكون…بتعرفو ليش الخيار مكلف…و يا ريت بس الخيار..البندورة مالها انظم و كيلو اللحمة صار بالعلالي..و ما تذكروني بالمسبحة…ولي على بعضي على شوية مسبحة فوقها شوية سمنة بلدي…بس الله يلعن اسرائيل…

شو منشان الله محبة؟

يوليو 5, 2011 - 13 تعليقات

من زمان و انت عاطيني الانطباع انو هيك سبب تخلفنا هو نحن.. …انو سوريا كانت متل طوكيو لوقت ما اجو العربان حولوها لما هي عليه…هلأ بغض النظر عن الفجوة التاريخية يلي براسك..بس يعني شو بدي قلك..شغلة و صارت..و هيك غررو فينا و قالولنا عذراوات و قصص فعجبتنا و لحقنا القصة و اجينا….هيك صار…شو فينا نساوي لنخلص من هالموضوع و نبلش نحكي بشي بفيد؟ انا مالي من قريش و مالي عثماني…انا سوري متلك..لايمتن بدك تضل عم تلومني؟ هي عم قلك خلينا نبلش من هلأ و انا  وانت نغير وضعنا ووضع ولادنا…شو ذنبي اذا شفتني سلفي اخونجي بين يوم و ليلة؟

انت من طول عمرك بتعتبر حالك متحضر اكتر مني بحكم كونك مسيحي…ليش هلأ بطلت تكون متحضر و ما عم يفرق معك كل هالعالم تموت و بس تصير متحضر و انساني وقت بيقول الاعلام السوري انو هدول جنود ماتو على ايدين جماعات انت بعمرك ما سمعت عنهون و عايش ببلد الامان…شلون بدنا ياني اقتنع انك متحضر و انساني و انت انتقائي؟ شلون عم تبرر مقتل كل هالعالم لاي سبب كان؟ مو على اساس الله و محبة؟

بدك تقلي اخوان و تمانينات….شو منشان عذر اقبح من ذنب؟

انت شفت شي؟ ابوك شاف شي؟ و لا كلشي خلفية عندك من شو سمعت او بتعرف من خلال حدا حكا شي….. طيب لنفرض انت شفت شي…ماشي الحال…طيب شفت عشرين الف واحد عم يشتركو بالشي يلي شفتو؟ لنفرض في الف مجرم انت شفتهون بعيونك……انت بأي انسانية عم تبرر قتل عشرين الف انسان بهداك الوقت؟ …هالشي يلي صار انو معلش و ضرورة كرمال انت تحس بالامان؟ مو على اساس الله و محبة؟

شو نعملك؟ شو شفت مننا…ايمتن حدا اضطهدك او قتل ابوك او عمك عالهوية؟…ما كلنا بالهوا سوا.. ما مليت من شعورك انك بحاجة لتسافر لبرا و تطج سبعين صليب ع سيارتك و رقبتك و برات بيتك و بكل مكان ممكن لترضي عقدة النقص يلي براسك تجاهنا و تحاول توضح للغرب انك مسيحي مو بس سوري..منشان لا سمح الله يفكروك سوري مسلم……. انا ما بختلف معك انو متخلفين..بس انا بشوف تفكيرك هاد هو جزء من تخلفنا…بس يلي بيبعصني انك بتستثني حالك…بس لانك كنت تكتب على  راس الصفحة بدفترك بالمدرسة الله محبة…. ..

منقلك خلينا نغير..بدنا نبطل نكون متخلفين…يمل..حاجة…بتصير بدك ضمانات انو نلغي بند دين الرئيس من الدستور….يعني الدستور الحالي لا هو دستوري و لا دستورك..عم تسلبها عليي مثلا؟ يلي بيسمعك بيقول انو العائق الوحيد يلي بيحول بينك و بين ترشيح نفسك للرئاسة حاليا هو شرط الدين و عشرات المسلمين بيمارسو حقهون الديمقراطي بالترشيح بشكل يومي….اخي قبل ما نفصل دستورنا..بدنا نسترجع حقوقنا…بعدين يا سيدي بوعدك لاعمل موقع و حملة معك لالغاء هالشرط…بس انت وين و الحب فين؟ اخي يعني هالشي باين انو عذر تافه…..معقول في عالم عم تموت و تتنكل و انت عم تتشرط على حقوق لا انت و لا غيرك عندكون ياهون حاليا قبل ما تاخد موقف انساني على الاقل؟…مو على اساس الله و محبة؟

ماسك اسم عرعور و ماشي كأنك مسكت بالدليل القاطع على اسلمة الثورة…يا اخي عن جد بطئ…يعني هي انا بحكي و في شي تلاتة اربعة مبسوطين من حكيي…بس مو معناها رح يحششو لما يصحلون…لما بصير في تقارب بالتطالعات..البني ادميين بيتوحدو بين بعض…بس ما بيصيرو نسخة عن بعض……ثم شو مشكلتك معو لهل الزلمة؟ شو عملك؟ باعصك لانو شيخ؟ معناها انت الطائفي مو هو…اذا شايف القصة طائفية فهل الشي لانك انت طائفي و بتشوف الامور من هالمنظور….خلي خوري من عندك يطلع يقول انو حرام قتل هالعالم تحت اي مسمى….رح تلاقي صار عندو معجبين و مؤييدين مسلمين اكتر من المسيحيين…..فشو منشان المحبة من الله..

طول عمرنا كنا نسهرو نحكي قصص و حكاوي عالوضع الخرى….هلأ صرت عم تخاف مني؟….و لشو…لانو بدنا نغيير…بدنا نتنفس…لعمى فعيونك….شو يلي مخوفك مني؟ بتفضل تضل طول عمرك عايش بالخوف و بالذل و بالامان يلي براسك و تنق على امك تحكيلك مع خوالك ليسحبوك لبرا…و بتتغرب و بتعيش غريب…و بيصيرو بيدمعو عيونك لما تسمع اسم بلدك  من هلأ لطول عمرك…مستعد تقبل بكل هالشي و مالك مستعد تثق فيني بعد كل هالعمر؟  مين الطائفي؟ مين المتحجر؟ مين الجحش؟ وين الله و وين المحبة؟

اخي انا بطلت بدي اتعايش معك و تتعايش معي تحت سقف النظام…بدي عيش معك و تعيش معي…متلك متلي…مالي مفروض عليك و لالك مفروض عليي…لا انا المفروض حس بالغبن تجاهك و لا انت المفروض تحس بالغبن اتجاهي…ببساطة يلي انا بدي ياه انو صير انا و انت….سوريين…قبل ما نكون مسلم و مسيحي….شو مشكلتك معي؟

خايف من المجهول؟ انو اكتر من القرد ما مسخ ربك…نحنا شو عنا ينهار؟ نحن بالحضيض بمقارنة مع معظم دول العالم على اي مستوى…و فوق هيك ممنوع تفتح تمك….كلشي بالواسطة و البلد فيها مافيا حاكمة…..عم تشوف بعينك انو يلي بيحكي بيجي الجيش و بيقتلو بدم بارد و بيقتلك اذا بتعترض و بيقتل عيلتك بدون اي تردد..اعتقالات جماعية..تشبيح…و اذا عم تقول عصابات مسلحة… طلاع عالشارع و قول بدنا حرية..انت اكيد بدك حرية متلي مهيك؟ طلاع و قول بدك حرية…قول بدك محاربة الفساد….قول الله يرحم الشهداء بصوت عالي بالشارع بدون ما تمدح بشار ربك….و شوف شلون رح تصير عصابة مسلحة….انت بتعرف هالشي…فشو المجهول التاني يلي اخرى من هالمجهول يلي نحنا فيه هلأ؟ يعني انت مو مشكلتك انو يكون فوق راسنا نظام اضطهادي مجرم و حاط الشحاطة فوق راسنا…بس المهم ما يكون هالنظام مسلم؟ مين الطائفي؟ مين الجحش؟ نحنا بدنا نظام ما عندوصلاحية يفعسني و يفعسك بالشحاطة..ما عم يسرقني و يسرقك…ما عم يدفشني برا البلد و يدفشك….المجهول بتخاف منو لما بيكون واقعك واقع بينخاف عليه….اما تحط نظريات كلها بتتمحور حول انو كل مسلمين سوريا بدهون يسقطو النظام منشان بعدين يسقطو دينك لتقدر تبرر الشي يلي عم تعملو حكومتك اتجاه ولاد بلدك فهل الشي ما بيعطي انطباع انك متحضر او انساني او حتى فهمان بفرنكين….لك ع حد علمي يلي قتلو المسيح هنن اليهود مو الاخوان.. فليش كل هالخوف؟……الدولة يلي بدنا ياها…المجهول يلي بدنا نوصلو هو دولة وطنية الي و الك…بالمستقبل ما رح يهمك  كانو مسلمين او مسيحيين ..رح تنتفض اذا سمعت انو سوري انقتل…..و بعمرك ما رح تصف مع حاكم ضد ابن شعبك…لانو يلي بيجمعك معو اكتر بمليون مرة من يلي بيجمعك مع الحاكم….بدنا يكون همنا وطن مو همنا دين…

بتقول في كتير ايدين بدها تلعب و عم تلعب..طيب ما هدا حكينا…بدنا ايدك مع ايدنا لنكون نحنا عم نحرك التغيير مو هنن..بس لازم يصير تغيير….دائما ستي كانت تقلي انا اريد و انت تريد و الله يفعل ما يريد…اخي حاجة…اليوم انا اريد و انت تريد و غصب عن الكل..ما بيهم شو غيرنا بيريد……بس بدك تثق فيني…تثق بالعمر يلي عشناه سوا بالبلد ..تثق بعقلك..تثق بأنسانيتك..بدي تشوفني سوري بغض النظر عن شو طائفتي…….بتاريخ سوريا كدولة ما صار في صراعات و حروب طائفية…ليش عم نبني حيطان من خوف حولينا…نحن مالنا العراق..و تاريخنا مالو تاريخ دموي طائفي متل لبنان لحتى نستعملهون كمثال..فينا نشوفهون و لازم نشوفهون كدرس عن شو بتساوي الطائفية…بس ما حدا بدو هيك..انا ما بدي هيك و انت ما بدك هيك…و لهلأ كل المظاهرين و الاغلبية الساحقة من الادلة و الفيديوهات خالية من اي ريحة طائفية بأستثناء الشغلات يلي عم تتحسس منها متل تكبيرة او طلعة من جامع…امور يلي عم تستعملها كمبرر للخوف يلي عم تبنيه بينا…قلنالك طلاع من وين ما بدك و رتل شو ما بدك..نحنا هيك عم نساوي…و انت ساوي يلي بدك ياه…بس خلينا نغير..حاجة..

بدنا نشهل شوي….بدك تسقطلنا  المحبة تبع الله يلي علموك ياها بالبيت و المدرسة…..و تزبط وحدة تكون وطنية اكتر و بتشمل فئات اكتر من دين او حارة لتقدر تفهمني…….غير هيك بدك تضل خايف مني و بدي ضل مبعوص منك…و كس اخت هيك عيشة فكري…..و اذا بتبلع ورق الانجيل و القرأن و دليل الصفحات الصفراء و البيضاء و تحلف انك مالك طائفي ما حدا رح يصدقك…لانك طائفي…عدا عن كونك جحش…

سوري, بس…

يونيو 25, 2011 - 17 تعليقات

انو من طول عمري سوري..و لا اتمتع غير بجنسيتي السورية.. اي نعم انو سوري….عالورق…و عالبسبور…و بحصص القومية و التربية العسكرية….بس بالاخير انا ابن مدينتي و ابن حارتي و عيلتي و بنتمي للفئة من العالم يلي بحتك معهون بشكل يومي و بطبيعتنا منلفي على بعض…يعني الطيور على اشكالها تقع……

أنا كنت بحس متل ما كلنا كنا نحس…انو انا سوري…بس لما بقولها ..يلي بيكون ببالي و بالصب كونشس تبعي انو انا شامي .او..انا حلبي..او..انا حمصي……يعني كلمة سوري مو هي الجوهر تبع الفكرة….هي كلمة عالبسبور…تاغ النا على شنتاية السفر…..مو اكتر….يمكن وقت فريقنا بيلعب بمباراة نهائية….او لما عدائة بتجبلنا ميدالية.. منصير منحس بشعور موحد… انو ليك كل هدول فرحانين او مبعوصين لنفس السبب..متلي متلهون..نحنا سوريين..في شي مشترك.. بهيك ظروف كلمة انا سوري..كان معناتا عن جد انا سوري……بس هلأ على اعتبار لا فريقنا وصل لنهائي و لا جيشنا حرر شي و لا علمائنا اخترعو شي..فيعني انو الشعور هاد شعور عابر و نادر..نزوة…و حكومتنا العتيدة ناكت نزواتنا بشكل و بأخر على مر الزمن… حتى فريق كرة قدم يوحدنا خلال بطولة ما عاد عنا…..

بينما بحياتنا…. بالظروف العادية و الحياة اليومية… انا بشوف انو انا سوري فالسوري لازم يكون هيك متلي..بيشبهني بشكل او بأخر…او يعني من ضمن الحارة يلي عايش فيها…غير هيك..ما بشوفو سوري متلي…انو سوري, بس..انا بنظري انا بمثل المواطن السوري اكتر منك….هيك دائما في بس براسنا..او على لساننا اذا كنا مع سوريين متلنا..انو هو سوري…,بس انو شاوي…,بس انو حوراني…,بس انو شامي….,بس انو لادقاني….بس انو علوي…بس انو مسيحي…بس انو مسلم…بس انو كتير شغلات…دائما في بس براسنا…بينما لما بتجي النا… انا سوري…و كل رفقاتي سوريين….و سوريين  بدون بس…هلأ غيري بشوفني سوري, بس…بس انو متل رجلي تماما مو متل رجلو….. نحنا منشوف انو نحنا سوريين و الباقي يلي من برات الحارة سوريين, بس…. نمط حياتنا و تشتتنا ببلد كل مين ايدو الو و اللهم نفسي فرض علينا هيك مناطقية سلبية بتوصل على مستوى اصغر من المحافظة…يعني ولاد المدينة الوحدة في تصنيف بيناتنا…في من جوا السور و من برا القلعة…….الشي الوحيد يلي كان بتخطى حاجز يمكن الدين…انو اذا عملنا تجربة و زتينا مجموعة من السوريين بعمرهون ما اجتمعو مع بعض سابقا بكيس و خضيناه ..لما منفتح الكيس منلاقي الحلبي المسيحي ضربها صحبة من الشامي المسيحي…و المسلم الشامي مع المسلم اللادقاني…لانو مافي مسلم شامي..لو كان في مسلم شامي..كان اللادقاني صفي لحالو…بأعتبار الكيس ما رح يسع اكتر من اربع زلم فكري…..

هلأ المناطقية والعائلية مالها اختراع سوري..و ما بدنا نلزقها بالنظام كأصل…هالشي موجود وين ما كان…كل ما كان المجتمع كولكتيفست…مجتمع جمعي…..كل ما كانت مفهوم الانتماءات الصغيرة اهم على المستوى الداخلي….انو الانتماء للعيلة..اهم من الانتماء للحارة و الحارة اهم من القبيلة و القبيلة اهم من المدينة و المدينة من المقاطعة و المقاطعة من البلد و…. لعية….بعكس المجتمعات الاندفيجوالستك..المجتمعات الوحدوية….متل كتير من الدول الغربية…يلي الفرد انتمائو لنفسو….المهم يلي بدو يعرف شو الفرق بين المجتمعات الوحدوية و الجمعية في عندكون غوغل رضي الله عنه…..بس الفكرة انو المجتمع الجمعي مو غلط.. عادي..اليابان متلنا…ايطاليا كمان..فهل الحالة بحد ذاتها مالها المشكلة…في حال كان البلد بلد نظامي و في قانون و بشر و هيك طبيعي يعني…..مو مزرعة او حديقة حيوان متل بلدنا…..يلي هي المشكلة تبعنا..

يلي صار عنا…صرلنا زمان مفرقين…بأسم الامن و الامان و الممانعة و مكافحة اسرائيل…ما في حرية…مافي مجتمع مدني..مافي ابداع حر بأي مجال…مافي انجازات وطنية..مافي شي ابدا….في انا..و في انت..و في توجه واحد بكلشي بحياتنا…نفس الدين…نفس السيارة…نفس الرئيس..نفس التلفزيون..نفس الجريدة..نفس الحزب..نفس العدو..نفس الخطوط الحمر…نفس كلشي..فمنشان هيك انا و انت..يمل منك اذا ما كنت متلي..مافي اي شي بيجمعني فيك..مافي شي حسو غير انك مو متلي…….اي نعم تنيناتنا سوريين…بس يمكن انا ما اعرف عنك غير الحلاوة يلي معروفة بمدينتك…او الناعورة..او سبيرو…انو هيك..غيرهيك مافي سقف يجمعنا و يحسسنا بأنتمائنا لبعض……انت اذا ما كنت من ملتي…بشو بتشبهني غير بالبسبور؟

ما بيجمعني معك الوطن…لا انا و لا انت النا اي كلمة بخصوص الوطن…مافي عنا رأي بوطننا..مافينا نحكي لنزبط بوطننا…مافينا نبنيه سوا..انا دوبي دبر حالي و امشي من الحيط للحيط و انت نفس الشي…شو بدي فيك و شو بدك فيني؟  اذا ما كنا رفقات او شركات بشغل او بشي قصة..مافي اي شي ممكن نكون فيه شركاء…ماعنا وطن بالمعنى الحقيقي لكلمة الوطن…..

فنتيجة كل هالزبالة يلي عشناها….و الخوف من الكلام و التسليم للواقع…انو خلص خيو…الحكومة سارقة و فاشلة و كلشي بدك ياه و مافينا نحكي انو شفت شلون شحطو سمير…فصار بدنا شي بديل نلومو على تخلفنا…..فأنا بالنسبة الي صرت بلوم الكل..انو شعب جحش..بلوم الموظف و الشرطي و بياع الفلافل و شوفير التكسي و العامل يلي مسطوح عالارض ناطر سوزوكي تشغلو و نازع منظر الشارع..بلوم الفلاح لما بيجي على المواساة و بينام عالعشب بالساحة برات المستشفى… بلوم الدين ..بلوم اسرائيل…بلوم اميركا…بلوم شرشبيل اذا بدي و ما حدا الو عند ربي…انا بلوم كلشي…..بلوم كلشي مسموح اني لومو…..هنن سبب تخلفنا….انو متخلفين و لازم يكون في سبب….فأكيد هنن السبب…

بس المشكلة…انو مو هنن السبب…هنن النتيجة..هنن المحصلة…هنن الضحية…بس ماكنت بسترجي لوم السبب…انو ما حدا بيسترجي…شو ذنبو الموظف يلي راتبو ما بطعمي كلب…شو ذنبو عامل السخرة اذا ما عندو شغل…شو ذنبو شوفير التكسي اذا بيضطر يشتغل شوفير و عرصة و عنصر مخابرات و ناصح ديني لانو بيضطر يقضى عشرين ساعة ورا الدركسيون ليقدر ياكل…شو ذنب الفلاح يلي جاية على مدينة غريبة عنو و مامعو مصاري ينام  بأوتيل لانو محصولو ما طلع هالسنة و مافي حكومة تساعدو و هو ناطر ابنو يا بيعملولو العملية يا لاء…شو ذنب اسرائيل و اميركا اذا هنن بدهون مصالحون متل اي دولة بالعالم…شو ذنب بياع الفلافل اذا بدو يغلي سعر الصاندويشة ليغطى على الاتاوة يلي بيدفعها لموظف الصحة او البلدية او مكتب الامن السري او التموين…

ما ذنبهون…نحن ضحية…ضحية النظام الشمولي الخرا يلي قتلنا و جمدنا…و خلى همنا بالحياة نلاقي لقمة ناكلها و سقف نتكاثر تحتو..مو لنعيش كبشر بدولة عندها امكانيات متل بلدنا و نبنيها و نبدع و ننجز…..نظام سرقنا و نهب بلدنا و ذلنا و خلى السوري يحلم يصير عندو بسبور تاني…نظام قمعنا و سرق روحنا..قتل الرابط بيناتنا…خلانا نكره بعض..خلانا نبعد عن بعض..خلانا نخاف من بعض..خلانا نلوم بعض…و هو عم يغنى و يتمردح….نظام ما قدر يحمي اراضينا و لا يسترجعها و لا يدافع عن سما بلدنا لما طارو الاسرائيلية و قصفونا…نظام شتتنا بأرض الله الواسعة…و ما عطانا فرصة نعمل شي ببلدنا…مو ذنبنا ليش ما منعرف بعض..ذنب النظام…

بلشت الثورة…و بين يوم و ليلة…عم يصير مصطلح شعب جحش اقل شمولا..صار في بيننا شي مشترك..شي جديد..ما حسيناه..صار ممكن انا و انت..مين ما كنت…شو ما كنت..شاوي و لا شامي…عربي و لا كردي ..انو يكون في عنا مصير فينا نقررو سوا…ممكن يصير عنا بلد…فينا ننتخب..فينا نحكي..فينا نبني…صار هالشي ممكن يصير..و يمكن رح يصير..ما بعرف…بس صار في شي عم حسو ما كنت حسو لما بسمع كلمة درعاوي او ديري او حمصي او حموي او جبلاوي او غيرهون من هالاسماء  يلي ما كانت تعنيلي اكتر من صفة..او جبنة..او بصرى..ما اكتر..صرت عم حس انو متلي متلهون..نفس المصير..نفس الطموح..صار في عنا هدف واحد..هدف طول عمري بحلم فيه بس بعمرو ما تعدا كونو حلم..و كنت مفكر انا الوحيد يلي بحلم فيه…في شي كبير عم ينمو بينا….شي بعمرنا ما حسيناه..شعور جديد…..

يمكن رح نصير سوريين…سوريين حاف…. بدون بس…

انو و يمكن لاء…كلياتنا شفنا خمسة و سبعين مليون سوري بساحة الامويين بمسيرة تأييد…..هدول بدهون يضلو خايفين مني و منك و من حالهون…و هدول يلي رح يأخرو كلشي…و يمكن يخربو كلشي…و يرجعو شعار الشعب الجحش

و انو يمكن لاء…انا ما بعرف…

بس يلي بعرفو انو هالبوست هاد كتبتو بعد صفنة بهل الفيديو

و لسا بينبعصوا!

يونيو 21, 2011 - 4 تعليقات

لا حول و لا قوة الا بالله…..ما بعرف شو بدي قول….انو سمعت الخطاب…ابتسمت و رحت نمت… فقت لشوف الصدمات و حالات الانفلاج و انو في عالم قال لهلأ عم ينصدمو و ينبعصو من الحكومة العتيدة و ابونا القائد….

صرلي اسبوع عم اقرا تكهنات و توقعات و تحليلات و شو بدو يحكو هالاب القائد… و قال بدو يكمل ولايتو للالفين و اربطعش و خلص و قال اخوه ماهر لانو تركيا ضغطت و قال بدو يقدم حزمة اصلاحات اخت محلوشة…. و بدو ياخدو قرارات حازمة و حاسمة…. و بدو يعمل و خلص لانو يعني الوضع صار سئ و قصة سوريا و لا جئيها صارت على كل لسان و شوية تانية بيعملولها كليب عالام تي في…انو خلص معناها في احتمال انو هالاب القائد يتخذ هيك خطوة….هيك كتير كانو عم يحكو…و حتى يلي ما عم يحكو…جواتهون كانو متوقعين شي…انو اي شي….

بتمر هالايام…و بيجي هالقائد بيبعصهون و بيأكد على كلام العدوين و كلامي على انو مو عرفان وين الله حاطو…

اول شي ذاكرتنا صايرة قصيرة الامد متل السمك….انو كل يوم مننسى شو صار قبل بيوم…هلأ السمك بيساوي هيك لانو سمك يعني شو بدو يساوي مثلا؟…نحن منساوي هيك من باب الامل و منشان ما ننجلط…و لاننا منفترض انو الانسان عندو نزعة فطرية لعمل الصواب او يلي منعتبرو صواب…انو حلو الامل…. شو نحنا اذا ما حلمنا او اتأملنا و تمنينا شغلات حلوة تصير لما نصحى من النوم….هيك نحن…

بس لما بتجي القصة لموضوع الاب القائد و النظام و البلد….ما لازم نكون سمك بنوب…

انو الشغلة الاساسية يلي نحنا طول عمرنا منرددها و مالنا فهمانين معناها هي قصة الخطاب التاريخي…. يعني كل خطابات اسود سوريا تعتبر تاريخية…على حكي الاعلام الوطني و كتب القومية و المحلحلين السياسيين السوريين….بشار لحالو عندو شي تلات اربع خطابات تاريخية…و هلأ لو لا المخربين و المؤامرة كان الاعلام الوطني ما تورع عن تسميتو خطاب تاريخي….

هلأ شلون بدي قول…. انو هنن ما عم يكذبو علينا…هنن عم يقولو تاريخي و يوقفو…و نحنا منبني شغلات على اساس كلمة تاريخي…الغلط انو نحنا عم ننظر لكلمة تاريخي على انها صفة للخطاب…بينما المفروض نشوفها انو هي تصنيف…. يعني مثلا لو طلع بشار و قال بدنا من هون لعشر سنين نخترع سيارات بتمشي عالهوا…او انو من هون لخمس سنين بدنا نوصل سوري على القمر و ليحط صورة الاب القائد…. هلأ هيك خطاب اذا بدنا نوصفو…منوصفو بأنو خطاب مسخرة…بس اذا بدنا نصنفو…منصفو كخطاب خيال علمي…. فمنشان هيك ما بيصير نتوقع اي شي من خطاب تاريخي لانو ببساطة رح يحكي عن شغلات تاريخية اكل الدهر عليها و شرب…. انو تاريخي…شيه!

هلأ بعيدا عن اللغة و دخاليجها…اي واحد سمع الخطاب…بيقول انو طيب شو الجديد؟ فهون الجواب بيكون انو قلنالك هدا خطاب تاريخي…. يعني انا كمواطن سوري كل فترة و فترة بنسى عن المؤامرات يلي عم تعصف بسوريا من طول عمرها…فبدي خطاب تاريخي كل فترة يذكرني فيها…لانو مثلا لو عطونا خطاب واقعي…رح ننسى المؤامرة و ننتبه لواقعنا الخرى…فمنشان هيك الخطابات عم تتراوح ما بين تاريخية و كوميدية بالاحيان حفاظا على الوحدة الوطنية تحت رجلين النظام

فالفكرة انو معليش يا ناس لا تتفاجئو و لا تنبعصو…و اذا اتفاجئت او انبعصت معناتك غشيم بمعرفتك للنظام الحاكم بسوريا…بالاضافة لاحتمال وجود مشكلة عاطفية عندك متل كأنك عاشق ولهان بس حبيبتك رافستك…و لسا عندك امل انها ترجعك…فهل الشي خلق عندك حالة امل مستفحل بكلشي..انو كل ما بيرن تلفون…بتفكرها متصلة تقول شغلة على كيفك…علما انو هي صرلها سنين عم ترفسك و مستبيحة عيلتك و حارتك…

لو بشار كان في عندو ذرة فهم و ذرة انسانية متل ما كتير عالم بتفكر…كنا ما سمعنا خطاب اليوم…و كان خطابو الاول هو الكافي…بس من وقت الخطاب الاول و الزلمة كان جدا صريح وواضح…و بالفعل الزلمة نفذ…هدد بالحرب على المخربين و شفنا الجيش السوري مفروش بنص المدن السورية….الزلمة وفى بوعدو…قال في لجان لدراسة الاصلاح…ليكو في لجان و عم يدرسو…لو كان بدو يساوي الشي المطلوب يلي هو تحرير سوريا من قبضة العصابة الواحدة…هالشي رح يكون على حساب مصالحو الشخصية…يلي عم يحكي عنها بشكل متلازم مع كلمة الوطن…يعني كلشي حكاه اليوم صحيح مية بالمية اذا منبدل كلمة سوريا و الوطن بكلمة الاسد و عيلتو…ساعتها يا لطيف شو في متأمرين عليهون….و هو بيعرف هالشي….اساسا هو لما بيقول مخربين..هنن عن جد مخربين لسمعتو مو متظاهرين..منشان هيك اليوم قال انو اجتمع بألاف من المواطنين…و تفاجا بحبهون لشخصو الكريم…….فالزلمة ما عم يحكي شي خطأ…بس انو هو بيقصد شي و نحنا منفكرو عم يقصد شي تاني…فالقصة كلها لا مؤامرة و لا ضرطي…القصة قصة سوء تفاهم و مشي الحال بعد ما سيادتو اجتمع مع الاف السوريين و مخاوفو بأنو السوريين بيكرهوه تبددت….و بعت تحية عالهوا لارباط الجيش السوري الالكتروني…يعني الزلمة بلش يغير نظرتو فينا…و هالشي كتير مهم…يعني بأذن الله من هون لعشر سنين من الثورة…بيجتمع مع مئات الالوف من المواطنين يلي رح يطمنوه بحبهون….و الباقي بيكونو تهجرو على تركيا و لبنان و الاردن و العراق و المقابر جماعية….و ساعتها القيادة بتكون متأكدة بعد لقائاتها مع الشعب من حب الشعب الها و بتسحب الجيش على الثكنات و رجال الامن الى مكاتبهون….

الزلمة عم يتصرف من جهتو…يعني ليش بدي اتوقع شي اكتر منو؟ يعني لا انا و لا انتو انتخبناه و تسعين بالمية من الامور ببلدنا مو عاجبة اغلبيتنا……فليش عم نتوقع انو مصلحتنا هي من مصلحتو او العكس صحيح؟  الزلمة جاية من عيلة فيها دكتاتور خالد و عم مجرم حرب…و مستلم ورتة ابوه…. و عم يديرها بالشكل الانسب لمصلحة الشير هولدرز يلي هنن عيلتو و دنابهون….فشو منتوقع يعني؟

هلأ الشغلا يلي حسيت فينا نستشفها هي كالاتي:

- في ضعف بكلامو و بطريقة حكيو و تعابيرو و حركاتو اذا بتتقارن بأي خطاب سابق بتشوفو الفرق….ثم اصرارو على عدم توجيه خطاب متلفز موجه للشعب متل اي رئيس بيحترم حالو وعدم قدرتو على مخاطبة الشعب بدون فواصل تصفيقية او جمهور بيأكد هالشي…و خصوصا انو بعمر النظام بسوريا من 48 سنة ما كان بمشكلة كبيرة متل اليوم…..بس انو هو مصر ما يساوي متل ما ساوا مبارك و بن علي…لساتو عم يفرض على حالو حالة من الرفض للواقع…

- ما تعمق كتير بالمؤامرة  و الدليل الوحيد يلي حكاه عن وجود مؤامرة هو انو سوريا من طول عمرها بتتعرض لمؤمرات…انو رئيس دولة عم يتعرض على مؤامرة ما رح يتوانى عن طرح اي دليل على تورط جهات بأسمائها و خصوصا انو هالنظام عم يوجه الخطاب للغرب اكتر مالو موجهو للشعب….فمنشان هيك المؤامرة كان الكلام عنها عام…هلأ اذا بتشوفو انو كلشي ابطال مؤامرات سمعنا عنهون من وقت ما بلشت الثورة و كل قصص تورط دول و غواصات هي قصص طلعت من على موقع اسرائيلي او غيرها من المواقع يلي مالها اي جهة رسمية معروفة وراها…..يعني هيك موقع عالانترنت حط رواية مالها اي مصداقية غير انو مصادر مقربة على زعمهون…تاني اليوم الشعب السوري تبنى القصة و صار يحلل و يربط…و اجو المحللين السياسيين السوريين اتبنو هالقصص…بينما الحكومة و موقفها الرسمي ما ذكرت اي شي و لا تبنت اي اتهام لاي جهة….و بس حكا  انو في مؤامرة بالشكل المبهم….أنو دولة بسطعش جهاز امن و اعتقال 10 الاف مواطن سوري و قتلو 1500 و لسا ما قدرو يجيبو دليل ليشيرو لاصابع الاتهام لجهة معينة منشان يخففو الضغط الدولي المتزايد…معناها انو بلا مؤامرة بلا خرى….فمنشان هيك ما استسهب بالحكي عن القصة..

- اكتر كلمة اتكررت او بالاحرى عبارة هي انو اجتمع مع وفود شعبية….انذكرت بالخطاب يمكن اكتر ما انذكر اسم الله بالقرأن…و اكد انو هلأ صار عندو فكرة و انو منشان ما تقولو الحاشية تبعي عم تحاشي عني…هي انا بنفسي حكيت مع المئات و الالاف منكون….و صرت بعرف وجعكون….يعني فكرو انو لما رئيس بيجي بيقول هالكلام بعد ايدعشر سنة من الحكم بيكون مبيض وش و متل يلي مقضى غرض و المفروض المواطن يبتسم و يعتز و يرجع يطوبز بعد هالكلام….يعني عم يعترف انو ما لو عرفان شو الشعب بدو و انو هي اول مرة بيعرف بهل القصص….هلأ لنفرض هالحكي صحيح…..فيعني مو رجلي بهيك رئيس ليش عم يحكمني؟

- لهجتو كانت حادة بأتجاه المتأمرين يلي بالداخل او ما سماهون الجراثيم….اي كي اي المتظاهرين و المندسين سابقا…و قبلها السلفيين و البندريين و الفلتمانيين و الحريريين…و لسا عندو مشكلة مع هالهواتف المتطورة يلي يمكن عم يستعمولها لفبركة الوقائع و الفيديوهات

- ما ذكر اي شي عن الامن و الشبيحة على انهون احد اكبر المشاكل….كأنو هالكم الف واحد يلي اجتمع معون ما قالولو شو عم يصير بالشارع..و هو ما بيعرف على حسب العالم يلي بيقولو ايه انو ماهر الغول هو فارض على بشار الكتكوت رقابة و ما عم يخليه يحكي عالتلفون مع بوكي مون و غيرو..و فبيجوز ماعندو علم.. وما عندو انترنت من عشر سنين و مرتو محرمة الستلايت بالبيت و رفقاتو بس شغل سيارات و موبايلات و ما بيحكو سياسة… …بس  انو هو متابع القصص يلي بالشارع بدليل انو حب يطمنا انو كلشي عم ينحكى عن خناقتو مع مرتو و اخواتو و حماتو هي محض اشاعات و كذب و كلهون بيحبو بعض…وانو اذا متوقعين انو بعمل متل ما عمل المرحوم و يحلق لاخوه فهيهات هيهات…فالزلمة دريان شوفي عالارض و عرفان شو صاير منشان اذا حدا مفترض انو بركي ….فيعني معقول انو ما شاف او دري بهل الفين فيديو يلي مافيهون شك بمصداقيتهون و فيهون رجالو عم يكسرر سيارات و عالم و يقتلو و يهينو و فلتانين عالشعب…و بس حب يوضحلنا عن حالة التلاحم العائلي…فالعبرة هون انو انا و اخي على ابن عمنا و الشعب و هيك بدو يصير و هيك الامور بدها تمشي…و يلي مو عاجبو…في اكتر من 190 بلد بالعالم…

- حرفيا ذكر انهيار الاقتصاد السوري و شبه قطع ايدو و شحد عليها….و هون في 3 استشفافات..الاولى انو الخزينة عم تفضى و التمويل عم يخف و هالشي رح يفتح على النظام باب جهنم من غير جهة…التانية تأكيد فضل حماة الليرة السورية و ان حكى على ابو الالف…بس الغاية هي ابو الروم الحنون…..يعني جزء من حملة التبييض يلي شغالين فيها…. تالت شي انو شغلة استباقية و تحذيرية…يعني عم يخوف العالم من تبعات الاستمرار بالثورة…و بنفس الوقت استباقي في حال زبطت معو و نفد…رح يكون في عندو شماعة يعلق عليها فشل السياسات الاقتصادية لعشر سنين لقدام….

هلأ غير هيك كلشي انحكى هو تاريخي و مالو طعمة…و مافينا نستشف منو اي شي بطعمة..و اساسا نسيت شو حكا…و وجعوني اصابيعي من الكتابة بكل الاحوال و بدي قوم اجلي هالجليات و شوف شي منّش عليه لانو جعت..

بناءا على الاستشفافات اعلاه فينا نتنبئ بتصعيد امني اكتر…و خصوصا لهجتو كانت قاسية للضرسان وقت حكا عن المخربين لسمتعو… و رح يستمر بألتعامل مع الثورة بعقلية ابوه بالتمانينات….و الشعب عم يتعبى و ينضغط…و رح تجي التيبينغ بوينت من الشام او حلب و يصرلو شي مجزرة صغيرة بشكل غير مقصود و تفلت القصة و ساعتها الغرب بيكون وصل لمرحلة توافقية بخصوص سوريا و جاهزين يتدخلو بأي شكل او بأخر بضغط من تركيا…و بهل الفترة الحسم بيكون بايد جزء من الجيش…لانو رح يوصل النظام لنقطة ضعف رح تخلي كتير من المؤيدين العسكريين و المدنيين ينطو من السفينة الغرقانة…شغلة مصالح و استمرارية وجود مو اكتر….فحسب شو في معطيات وقتها بتتغير المواقف و الامور…..يعني مافي شك انو النظام انتهى…بس ما رح نشوف ابو البيش او سكرتيرتو عم يقولو انو هو رح يستقيل….و بالتالي اللعب مفتوح عالاخير و كلشي وارد…..

و بالنظر لطريقة تعامل النظام مع القصة و خطابو الغبي اليوم…فهالشي بيخوف اكتر من لو كان خطابو في تنازلات او ذكي بفرنكين على الاقل….لانو مافي شي بخوف اكتر من واحد فوق ما انو جحش و دموي..غبي كمان…بس الغباء هو سلاح ذو حد واحد..و اخرتها رح يجرح الولد يلي عم يلعب فيه…

مع كل خطاب…عم نزداد قناعة العالم بغباء النظام  يلي عم يحكما…و عم تزداد الثقة بأنو الشعب انو واعي و سلمي على الرغم من مواجهتو احد اعتى الانظمة الشمولية و اكثرها اجراما و النظام عم يحاول يجر الشعب للطائفية و العنف..بس لسا الشعب عم يتوحد اكتر مع بعض و سلمية حتى الموت…..و يمكن هادا اكتر و اهم استشفاف فينا ناخدو من هالخطاب….فشكرا سيادة الرئيس

بالمشرمحي…

يونيو 20, 2011 - 3 تعليقات

اخي شلون بدي قلك… عم حس انو في مشكلة اتصال بيني و بينك…حاسس انك ما عم تفهم عليني….مع انك دكتور و صارعين طيزنا بأنك درست بالغرب…انو طز..هي انا درست بالغرب…مرتين…و ليكني مالي رئيس و عايش عين الله عليي و بفهم على كتير ناس و بلقطها عالطاير احيانا و احيانا لاء..بس انت يا حكيم شكلك ما عم تلقطها عالطاير بنوب و بس عم تحاول تقوصها….

انو عن جد ليش هيك عم تعمل؟

يا اخي شو متوقع يطلع معك بعد كل هالهوبجة يلي عم تصير؟ يعني ليش عم تظهر ثقة نفس ما عندك ياها…و ما بعرف من وين اجتك….يا اخي انت رئيس و كل هالقصص…بس يعني انت ما فزت بهل اللقب…يعني ابوك عطاك ياه…و انا شخصيا ع فكرة بيوم لما مات ابوك حطيت ايدي على قلبي انو ولي اكلنا خرى بكرا بيجي عمك الجحش رفعت و بيلبط بالبلد….فبوقتها يعني انا و يمكن كم واحد متلي كان عنا استعداد نرحب بالسعدان الازرق اذا ضمنلنا انو ما يرجع عمك الجحش …و بأعتبار ابوك خرب كلشي حياة سياسية بهل البلد و لا خلى حزب و لا معارض….لك يا زلمة انا لهلأ لما بسمع كلمة معارض بصير عندي منعكس شرطي و بصير بوطي صوتي و بتلفف حوليي….و انا لا عندي معتقل بالعيلة و لا بعرف حدا بعيلتنا الو بالسياسة شرطك….بس هيك من صغري بسمع كلمة معارضة دائما مرتبطة بمصيبة…يعني بعمري ما بذكر سمعت جملة فيها كلمة معارض و ما كان بنفس الجملة كلمات متل  معتقل.. سجن….دورية…بيجو… منفى… تعذيب… امن دولة……يعني لا شعوريا صار عندي نفور من كلمة معارض…و كلو بيرجع الفضل فيه لابوك…هيك خربلنا دماغنا من صغرنا…خلانا نكبر مصدقين قصص الاساطير الاسرائيلية و الامبريالية و المؤمرات يلي بيحيكها اي حدا بيحكي ضدو….و خلانا نصدق انو كل هالشي هو يلي فرض علينا واقع الخرى تبعنا….لك يا زلمة بصغري على ايام ابوك…وقت كان لكل طالب مدرسة خمس او ست دفاتر بالسنة…و كنا نروح عالمؤسسة لناخود مخصصاتنا من دفاتر نخب عاشر و صورة ابوك عليها…كنت انو عن جد مصدق انو المشكلة بالعيشة تبعنا هي اسرائيل و اميركا و هالمؤمرات…انو زغير بأول طلعتي شو بيعرفني..هيك فهمت….فماضينا القريب بخري و ابوك هو يلي خري عليه…و كنتيجة لما مات…على قد ما كان دماغنا مغسول رحبنا بالخيار يلي ما بيرجع عمك الجحش….حضرتك…

فيعني شلون بدي قلك…الارث يلي ناتعو زبالة…انو مافي شي بيرفع هالراس…بس بوقتها قلنا انو الزلمة ضمانة لما يرجع رفعت و الاخوان…..لك حتى الاخوان انا بعمري ما اجتمعت مع اخونجي او شخص انو بعرفو اخونجي مثلا و كل يلي بعرفو عنهون هو من خلال الاعلام السوري…بس مع هيك لهلأ لما بحكي عليهون بحكي بشكل سلبي لا شعوري…انو يفكح عينو ابوك شو ما كان قليل…لكن معقول اطافيل كنا بالابتدائي…المفروض اكتر معاناة نحس فيها ما تتعدى تعاطفنا مع ريمي و هو عم يدور على امو…هيك كان بيناسب عمرنا…بس مع هيك كل يوم الصبح كنا ننصف متل الغنم بالباحة و نصدح ونتعهد ان نسحق اداتهم..عصابة الاخوان المسلمين العميلة…فانو مو من قليل عنا حساسية منهون…..فالمهم…قلنا انو الزلمة ضمانة لما يرجع رفعت و الاخوان…ومنها انو متعلم بفرنكين فيعني اكيد رح يكون احسن من ابوه…و هون كان غلطنا…و يلي مشي لصالحك…انو نحنا قارناك بأبوك…صرنا نشوف شلون انت عم تتصرف و نقارن بشلون ابوك كان يتصرف…..فصار فينا عديم وقع بسلة تين فيها تينة وحدة معفنة…بس انو بالاول ما كان في سلة حتى……انو شوفو شلون بيسوق سيارتو لحالو…شوفو شلون بيحكي…و بيعرف لغة و دكتور…يعني انو يعني اذا بتصفن فيها نحنا حبيناك كأنك عريس…يعني مواصفاتك جيدة كعريس…بس مو كرئيس…فيك تقول اخدناك من القلة و غصب من عننا…يعني مجبر اخاك لا بطر و الله يا معلم…

اجيت انت بلشتها صح…نحنا شعب شعارججي على كيف…الواحد مننا بتفتح راسو بتلاقيلك فيها عالاقل شي سبطعشر شعار.. ..ابوك اشتغل و ما قصر يا حبيب…رشا و دراكا…و اهلنا نايمين…ناك راسنا و الله يا معلم… فأنت اجيتنا بباب لخم و صفقتنا تعاريف….و دعونا نُعرف هي و نُعرف هديك….قلنا يا جماعة الزلمة شكلو فهمان…يعني مو شغل شعارات…و تعاريفو لا غبار عليها…و بيحكي انكليزي و مرتو كيوت…و بيسمع ايبود…يعني متل اي مواطن سوري متغرب…

بس اذا بتصفن فيها ابو البيش…يعني شو رصيدك الفعلي؟ انت بعضمة لسانك قلت انو الاجراءات الاقتصادية المتعاقبة فشلت…و انو مافي داعي تقول… معروف…بس يعني انت قلتها من حالك…يعني خربت اقتصاد البلد..انو انت الرئيس….انت يلي بتنلام…..هلأ بيجوز تنزعج و تحس انو انا لا سمح الله عم بجحف بحقك…و تقلي و المقاومة و اسرائيل و تحرير جنوب لبنان…طيب يا سيدي حلال عليك…لنقول فرضا انت حررت جنوب لبنان…يعني بهنيك…بس يا اخي شو منشان تروح لهنيك و تصير رئيس بلبنان… انا سوري و ارضي لسا محتلة….و مو بس محتلة…يعني انا شايف ضرب رصاص مرة بعرس اكتر من كلشي رصاص اطلقو جيشنا ضد الاسرائيلية من التلاتة و سبعين لهلأ…و مو بس هيك..العصابات المسلحة صرلها عم تنشر الذعر و الهلع بمعظم المدن السورية و عم يستعملو غواصات و اسلحة متطورة صرلهون 3 تشهر…يعني حتى امن البلد ما عم تعرف تصونو….

فأنو ما عملت شي على اي صعيد…..فليش يعني لسا عم تتصرف متل كأنك صاحب ارث تاريخي و عم تصر على موقفك؟

لهلأ عم تتصرف كأنك مالك عرفان شو الترتيب…لكن معقول يعني فرمت و اجرمت و صرت فضيحة….ثم على سيرة الفضيحة انت الله يصلحك ما بتعرف انو اللاجئين لما بروحو على دولة محترمة ما بيجي منهون غير وجع الراس؟ يعني شايف شهود العيان يلي بتسمعهون و ما بتصدقهون…اي انو هدول متلهون بس مو عالتلفزيون…انو انت بتعرف هالشي و الا زلمك يلي راحو ع تركيا كانو زارو اللاجئين السوريين يلي انت عم تدعي انك بعت الجيش ليحميهون…لك يا اخي منشان صورة تذكارية للاعلام بتفيدك بهل المؤامرة..منيحة بعالم السياسية…بس انو هون المشكلة …انو هدول اللاجئين بتركيا و اذا راح زلمتك بدهون ينبحتو عليه و عليك…و انو هنيك الاعلام موجود ليصور…فبلاها…بس انو وضعك كتير بخري بصراحة… و لسا متوقع انو الامور هيك تهدى بمجرد ما ابن خالتك اعلن انو صار نبي…معقول لسا مالك عرفان انو المشكلة مع النظام يلي صنع رامي مخلوف اكبر من مشكلتنا مع رامي مخلوف نفسو……يسرق البلد بعدين بدو يتصدق بهل المصاري على الشعب..شو منشان؟ اخي ليش انت مصر انو الشعب غبي؟ عم بلش شك فيك هاه…يعني شلون بدي قلك…انا و كذا واحد متلي منعرف انو لنفرض كبسنا زر و اختفى رامي مخلوف…انو يعني الشغلة شغلة وقت ليطلع اسم جديد و اسماء جديدة…اذا ما قصيت راس الحية ا بيمشي الحال و الله يا حبيب…

فمتل ما كنت عم قلك…حاسس انك ما عم تفهم علينا…فيك تضل عم تجرب…حليق لرامي..و حتى لماهر اذا بدك…بس الشعب مالو بالغباء يلي متصورو و عم تتعامل معو على اساسو…الطريق اسود لا محالة…و خصوصا الك..البلد باقي..و رح يرجع يعمر..و احسن من زمانك و زمان ابوك..قد ما خربتو هلأ و اصريت انك تستمر بحكمو و حاولت تحرك بالطوائف …اخرتو بيرجع بيعمر…لانو عمر من قبل ابوك..و تاريخنا وقف من لما اجا ابوك……و اسمك رح يكون نقطة النهاية لاكتر صفحة سودا بتاريخ سوريا….و رح نرجع نبني تاريخنا على كيفنا و متل ما نتمنى..

فليش يعني هالنهاية الدرامية اعلاه؟ شو نقطة و صفحة و كتاب…حبيب..الوضع فلت..انا ما بظن العالم رح ترجع ع بيوتا…اقتصاديا ما رح النظام يتحمل تكاليف الحملة الامنية و العسكرية لفترات طويلة….كل جمعة عم يطلع عالم اكتر و عم تتوسع….العالم يلي هلأ ساكتة رح يبلشو ينقو لما توقف رواتبهون و يصفو بلا شغل او تتعطل اشغالهون…و ما رح يتظاهرو كرمالك صدقني…..و رح توصل لنقطة رح ينشق جزء من جيشك عنك…او رح توصل لنقطة انو رح يجي النيتو غصب من عني و عنك…انو مو قليل التجحيش يلي عم تساويه بالعالم و انت لساتك عم تتصرف بعقلية التمانينات..فيعني الوضع كتير عم يسوء و  السيناريوهات يلي بتخدم مصلحتك على المدى البعيد قربت تنتهي…

فشو حبيب؟ شو رأيك انو تفهمنا و تعتق دمنا و ما تبقى من بلدنا؟…لانو يمكن هلأ ممكن تقدر ترجع “تعيش بمنزل الاسرة يلي تربيت فيه” متل ما قلت…بس اذا الامور اتطورت بظن الشعب رح يشلحك حتى هالبيت يلي عم تحكي عنو…

انو منشانك يعني…

عن النكبة…المفترضة

يونيو 6, 2011 - 3 تعليقات

مبارح فقت الضهر و اول الشي شفتو كان صورة اعدام رجل الامن بحماة….انهز بدني وطلعت اصطاد سمك….لما رجعت المسا لقيت كوشة اشخاص من رفقات و غيرهون باعتين ايميلات النهاية و الوداع للثورة…انو ذيس از ات…و شي يسميها رصاصة الانتحار و شي سماها النكسة و شو بيعرفنو شو القاب.. نحن شعب شاطر بمصطلحات الدمار و النهاية…هيك معت متل هاني شاكر…..

المهم…كنت ناوي احكي و عبر عن سخطي على هالفيديو و حط كم حسرة و زفرة و سبسب و كسكس….بعدين صليت عالنبي و شربتلي بيرايتين و سحبت صاروخ…فغيرت رأيي بالموضوع…

هلأ اول الشي…الشي يلي شفناه بالفيديو صار بسوريا…يستر على جاجاتكون حاجة تقولو تبع لبنان و العراق…شو شايفينا من جمهور قناة الدنيا؟ ما في سبعة بيختلفو عليها…الفيديو بسوريا و لافي فبركة و لا بطاطا…كون العالم هون عملو متل ما العالم ساوو بلبنان مو معناها نفس الحادثة…انو يعني الحموية بهل الفيديو ما اخترعو هيك تصرف حيونة..فكل ما منشوف فيديو بيشبه القصة منقول هاه هاد نفسو…….و انو خبراء اللهجات بلشو انو اللهجة مو حموية و شكلها ايرانية و مريخية و حلبية و مدري شو…كمان يعني ..سو وات؟ انو حماة مدينة صافية العرق و مافيها اي حدا ممكن يحكي لهجة مو حموية؟ هي ابسط فرضية تافهة المفروض الواحد يطرحها قبل ما يستسرل بتحليلاتو…

ثم لو كانت مو بحماة….بس انو بحمص….يعني بتفرق شو؟ انو لسا في اعدام و تمثيل بالجثة على ايدين متظاهرين….لسا التأثير واحد..مو المشكلة بوين بسوريا..المشكلة انو صار بسوريا و بس……و لاء قال في قريت مدري وين واحد بيقول لاء مو معقول الحموية حبابين و ما بيؤذو حشرة….انو تلحس طيزي على هالمنطق….انو انا اذا شفت صرصور بقتلو و بفعسو و بنيك املو كمان…بس انو ما معناها اقتل حدا…فما دخل اذا بيؤذو حشرة و لا لاء…فيهون حيوانات متل باقي المحافظات

فبعد ما خلصنا من نقطة انو هالشي وين صار….منجي عالمحتوى…

هلأ يعني اول ردة فعل انو لعمى شو حيوانات…و حتى تاني و تالت ردة فعل…بعدين عم تدخل مشاعر انحيازية عالخط…و كل واحد بيبررها بحسب الفريق يلي بيلعب معو….و هالشي طبيعي يعني ما عم نقول انو العالم لازم تكون كلها موضوعية…..

هلأ بخصوص قصة القتل….انا سهل و من مكاني هون…قول شو بتخيل رح تكون ردة فعلي اذا صار و كنت بنفس الظروف..فيني قول انو ما بصير و غلط برياحة و بدون اي تردد او حتى تفكير…يعني انا من محبين الطبيعية و السلام العالمي و عضو بجمعيات حقوق الحيوان و طبقة الاوزون و مالي انسان عدائي و صديق للحشرات و كل هالنوادي…فبقول انو انا بمسك اعصابي و بصلي عالنبي…بس انو الوضع عالارض مختلف…و بعد شهرين من المجازر و لما ينقتل حدا بعرفو و خصوصا اذا كان اخ او اب او ابن…ما بعرف شو ردة فعلي رح تكون…بالاخير الانسان عبارة عن كتلة من الاعصاب …مالي عالارض و بنفس الحذاء…. بس فكرة القتل مالها ضرب من الخيال اذا سنحت الفرصة للانتقام……..و من دون ثورة و 1500 شهيد و اجرام…في جرائم انتقام…فظاهرة الانتقام مالها دخيلة على مجتمعنا…انو شعب جحش بكتير نواحي…بس طبيعي  يكون الشعب هيك…ببلد الدولة دمرت اي مجتمع مدني على مر عقود…و هي احد اسباب ثورتنا بالاساس…

ففكرة القتل بحد ذاتها مالها كتير مستغربة….و عادة اكتر مين بيقدرو يمسكو اعصابهون بهيك مواقف بحسب خبرتي و خبرة معظم يلي ما صار معو هيك شي بشكل شخصي بيكونو من امثال توم كروز و جون ترافولتا و فان دام..بينما الممثلين الاكستراز بالفيلم ما دائما بيمسكو اعصابهون…..فأنو بتصير و لو ضلينا عم نحكي من هلأ لبكرا…غير يلي انقتللو حدا ما بيقدر يوصف رأيو بشكل موضوعي…

هلأ العلاك اعلاه كلو بيمشي في حال الخبر كان انو في رجال تم قتلون على ايدي متظاهرين على خلفية مجزرة حماة تبع يوم الجمعة و انتهى الخبر…

بس بالحالة يلي صارت غير….عنا تصرف جماعي….لنفرض هالزلمة عن جد مجرم و قتل سبعة من عيلة واحد…طيب هالسبعين زلمة يلي عم يهللو للتتمثيل بالجثة شو وضعهون؟ كمان نفس الزلمة قتل قرايبينهون…اي شو رامبو؟

حالة تعليق الجثة و التمثيل فيها مختلفة كليا عن حالة القتل….حالة القتل غلط بس في كتير مبررات ممكن تنعطى و ظروف ممكن تتراعى….بس الشي يلي صار بعد القتل هو اكل الخرى بصراحة..مالها تبرير غير انو تصرف حيواني…..تصرف غير انو غبي و ما بيخدم اي شي و لا بيحقق…. بس انو شعب جحش….

حكيت مرة  عن مسلمات الشعب الجحش….فكلنا منعرف انو الشعب اي نعم مو كلو جحش …بس انو معبا جحاش….فليش الصدمة و انو خلص هي النهاية؟…….في عنا اولويات و ما حدى عم يدعي النبوءة..شعب فقير جاهل بكتير طبقاتو ما بصير واعي بين يوم و ليلة…بس بالاول بدك تشيل السبب يلي خلاه يوصل لهل المواصل..

هلأ انو قال الفيديو هاد قضى على سلمية الثورة…..ليش مين قال انو هالاشخاص يلي بالفيلم هنن ممثلين الثورة؟ ….كل واحد بيتظاهر بيمثل حالو… هي مجزرة نضال جنود….هل يعني انهت سلمية الثورة؟ الشي يلي منتستشفو من هالقصص انو في حيوانات قتلو نضال و في حيوانات قتلو هالزلمة هاد…و لسا رح يكون في حيوانات رح يقتلو غير واحد…..مالنا شعب ملايكة فكري……

يلي بيهم هو التوجه العام للثورة و الفكر بخصوصها..مافي جهة بتقدر تحتكرها…..انو سلمية و صرلنا شهرين عم نشوف تيار سوري كبير عالارض بشعارات ما حدا بيعترض عليها…..اما يعني اذا في واحد كان مقتنع بضرورة اسقاط النظام قام شاف هالفيديو و غير رأيو و قال معليش لكن النظام احسن و ما بدي سلم حالي لهيك عالم…فهادا انسان تافه عدا عن كونو حمار….لك يا جحش يعني اضعف الايمان النظام صرلو شهرين عم يعطينا فيديوهات مماثلة لعمليات تعذيب و قتل لسوريين واطفال و نسوان و حريم من قبل جهاز الدولة و شبيحتها و امنها……هلأ صرت حساس و انو ما بدك تسلم حالك لجماعة ثوار حيوانات….على اساس انت مو طول عمرك يلي حاكمك مجرم و ابو كان مجرم من قبلو…

فشو الفكرة؟ الشي يلي صار ما بغير من اي شي….النظام مجرم…و نحنا في بيناتنا مجرمين…النظام مجرم بس عم يجرم بأسم القانون….لما يسقط و نزبط القانون بيتحاسب باقي المجرمين…..وهلأ منعمل دورنا بأنو نوعي الخلق انو يخففو حيونتهون شوي اثناء الثورة لانو هيك تجحيشات بتضطرهون قبل ما تضر غيرهون….

يعني المفروض اكتر ردة فعل عن هالفيديو تكون لعما شو جحاش غلط هيك..ما بصير…..و بس…اذا اي انسان بدو ياخد موقف بخصوص الثورة على اساس هالفيديو…و باقي الفيديوهات تبع جرايم النظام ما حركت فيه اي موقف….معناها هادا واحد جحش….و بالاساس ما حدا متوقع منو شي…

اما اعلاميا و مدري شو…الفكرة انو في  صور شنيعة كتير من الشي يلي عملو النظام رح يغطو على شناعة هالشي يلي صار بحماة….فما رح يكون الها ضرر على مستوى العالم يعني…كل ما هنالك انو هالكم حيوان تبع منحبك و حيادي و خرى رح يصيرو يعدلو شعاراتهون لتشمل شو صار بهل الفيلم….و انو اساسا صار بدهون شي جديد يستعملوه ليبررو رفضهون للثورة غير انهون حيوانات……لانو ملينا من فيديو الشيخ السلفي و رواية نضال جنود….بس ما اكتر…و لا اقل…

يلي بدو يدعي الانسانية و يتبنى موقف…بدو يدعيها بعد ما بيشوف كلشي فيديوهات عن جرائم عم تصير بسوريا..مو على كيفك يا فئوس…

و خلصنا بقا…

عم حس..انك حيوان

يونيو 3, 2011 - 5 تعليقات

صرلي ما ضربت صاروخ من تاريخ اخر بوست…نفض راسي و صرت عصبي…انو مو عصبي بس هيك متحفز و عدائي…و ضيفو عليهون تشاؤم و اكل الخرى يلي عم نشوفو…كنت و لازلت فايت بالحيط…انو اسباب اقتصادية..يا دوب عم دبر حق دخاني العادي…بزمنتاتي وقت كنت صغير…من زمان يعني…سمعت جدو عم يقلو لخالو لما كان حامل سيجارة…..لك بلاها هالشرموطة يلي بأيدك…انو انا كنت صغير بس بعرف شو هي الشرموطة تعريفا…اصفن و قول شو منشان شو دخل السيجارة بهي…و الله جدو شكلو بلش يخرف…و هو خرف…بس بعدها بشي خمسطعشر سنة…فهلأ بعد كل هالعمر…فهمت شو بيقصد جدو بتشبيهو بين السيجارة و الشرموطة….يا موحاماد شو بيسحبو مصاري تنيناتهون…المهم مو هاد موضوعنا…بس انو كنت مقطوع و الديلر بعيد عني مسافة 15 كيلو غرام…رحت لعندو و طرقتها رجعة مشي لانو الطقس كان كتير حلو…و مع سحبة و هالغنية..كانت بتجنن….يا موحمد شو بتجنن..

اجيت بدي اكتب عن كم شغلة بتهوي صايرة معي و مدري شو…مدري شو كان بدي قول بس بلشت الجملة بعبارة عم حس…قمت صفنت..و هيك سرت قشعريرة بجسمي بمجرد ما قلت عالعبارة…يمكن صايرة مدعاة فخر لالنا بهل الايام…يعني ما رح يهمنا شو بيجي بعد هالعبارة بالجملة…بس بمجرد انو الواحد مننا يحس…بيكون انجاز بالمقارنة بكتيرين يلي ما عم يحسو…لانو يلي بيحس…بيحس دائما…و يلي بس بيحس وقت بدو و ما بيحس وقت مابدو…بيكون ما بيحس فعليا بس انو هيك مفكر حالو…صارت شغلة مهمة..انو خطوة ايجابية…صار مقتول شي الف و خمسمية سوري… و لسا في كتير ما عم يحسو…

يعني يلي بيشوف يلي عم يصير و بيجي بيقلك انا حيادي…هو مفكر حالو بيحس…بس هو ما بيحس بالمعنى العاقل للكلمة…بيحس متل ما اي حيوان بيحس..بشكل محدود…..اساسا انو شو هي حيادي؟…قول جبان…قول طائفي بس بالقلب… قول خايف …. قول وصولي حربوق ناطر تشوف مين رح ينتصر لتلحس طيزو و تركب على موجتو…قول مستفيد بس من تحت لتحت…بس ما تقول حيادي…حيادي مثلا لما بتكون القصة مالها علاقة فيك..متل سويسرا يعني…بس لما الها علاقة فيك مافي شي اسمو حيادي…..انو بدك ثورة تفصيل؟ مبعوص من يوم الجمعة و بناءا عليه قررت تصير حيادي؟ طلعت مثلا يوم الاحد و منعوك باقي المتظاهرين و قالولك ممنوع غير يوم الجمعة؟ طلعت من برات كنيستك او معبدك او مرقصك او مرسمك او مكتبك و مشيت و حكيت شو بدك بالعالي و اجو باقي المتظاهرين سكتوك و قالولك روح عالجامع؟ …..يلي عم يطلعو بيطلعو من وين ما بدهون…هي اسمها ثورة حرية يا جحش…كل واحد حر يطلع من وين ما بدو…فيك تعترض او انو تدعي الحيادية اذا هدول منعوك من حرية انك تطلع و تقول رأيك من وين ما بدك…اما تقعد على طيزك و تنظر و تعملي حالك فهمان و مثقف و كوول و سويسري و تدعو للحوار و كأنك عن جد سويسري و شمس بلادك ما بتعرفها…فهدا يا صاحبي اسمو اكل خرى…يا اما انك ما بتحس…مو انو ما بتحس..بس بتحس متل ما انو الحيوانات بتحس…يعني بعبارة اخرى حيوان…..بس انو شو الجديد بالموضوع؟

موضوعنا انو انا عم حس…انو في عالم بتنبعص وقت بقلهون انو انتو حيوانات…مالي متأكد اذا هالاحساس صحيح….بس بكل الاحوال بحب اني وضح موقفي….انو انا لما بقول لواحد انت حيوان…هي مالها اهانة…انو انا ما بعرف اسمك فبناديك حسب فصيلتك…يعني هلأ مثلا اذا جارك عندو كلب اسمو جاكو…لما بتشوفو بتقلو جاكو….بس لما بتشوف كلب تاني ما بتعرف اسمو…بتناديه بحسب فصيلتو…انو يا كلب او حيوان……الشغلة مالها اهانة…يعني لما بتقول للسمكة انتي سمكة..ما بتلاقيها انبعصت…..فليش في عالم عنا عم تتحسس لما منقلهون حيوانات؟

العلم و المنطق و القانون بيقولو انكون حيوانات….الكلام مو بس ترفيس و بعبعة و اكل خرى من طرفي…يا ريت ما كنتو حيوانات…فكركون بزعل انا؟

هلأ الدي ان ايه تبع الانسان بتختلف عن الدي ان ايه تبع السعدان بنسبة خمسة بالمية..اكتر او اقل بشوي بس انو بهل الحيطان…يعني 95 بالمية من تصميمنا العضوي متطابق مع السعادين…الشمبانزي تحديدا…و الاختلاف هو بهل الخمسة بالمية…هلأ بهل الخمسة بالمية هنن يلي عطو البشر امكانية انو يكونو بشر….هلأ اذا بدنا نقارن بين الانسان و الحيوان…الانسان مالو احسن من الحيوان بالقدرات الفيزيولوجية بشكل عام..يعني الانسان مالو اسرع من معظم الحيوانات..و مالو اقوى و ما بيطير او بيغوص من تلقاء نفسو كجسم عضوي…الشي الوحيد يلي موجود بهل النسبة الصغيرة المختلفة بين الدي ان ايه البشرية و الحيوانية..عطا البشر امكانية بتملكو الحس و الادراك العقلي..الكوغنيتيف سكيلز…ما بعرف شو المصطلح العربي الحرفي..ما سمعت عنو بالعربي..غوغلوه بتعرفو…بس يعني بلغة الشارع هو قدرة الانسان على الاحساس و الادراك و التفكير بناء على هالمعطيات و التعلم من هالشي و بالتالي التصرف على اساسو.. …هاد الفرق الوحيد بين البشر و الحيوانات…هلأ الحيوان بيحس…بس انو احساسو محدود لينجو بعضمو من الحيوان الاكبر..او ليصطاد حيوان اصغير…او ليتخفى من كل الحيوانات و ياكل عشب على جنب…فالحيوان بحس و انو بيتأقلم مع الاحساس…ليعيش..منشان هيك ما قدرو يتطورو لاكتر مما هنن عليه و ضلو حيوانات…بينما البشر خلال ميتين سنة مثلا صارو بيقدرو يطيرو اعلى من الطيور و يغوصو اغمق من السمك…..بينما بعمرك ما رح تشوف حيوان عم يعمل شي خارج نطاق وظيفتو و مقدرتو العضوية كحيوان…

الحيادي او الصامت…عم يحسو…و شايفين واقعهون و بيعرفوه…بس انو اكتر من التأقلم مع هالوضع ما بيعملو..ردة فعلهون ما بتتعدى محاولة النجاة بحياتهون يلي صحي مو عاجبتهون…بس صامتين و عاجزين و ما عم يستعملو الخمسة بالمية من الدي ان ايه ليعملو شي…هلأ ليش ساكتين..ما بهم…خايف و لا نايف و لا مدري شو..ما بيهم..يلي بيهم انو ليكون الواحد بشر لازم يدرك واقعو و يتصرف…مو بس يدركو و يسكت و ما بغير شي…هي مالها صفة بشرية…و لو كانت صفة بشرية ما كانو البشر صارو متل ما صارو بيومنا الحالي…

طيب مالكون بالعلم و السعادين و خريانين عالفهم من زمان؟…خلينا ننظرلها من ناحية تانية…كس اخت الدي ان ايه…..انتو عايشين ببلد…لحتى تحققو اي طموح بالبلد..لازم يا اما تكونو متسلقين متل السعادين…يا لازم تغيرو الوانكون متل الحرباية…يا لازم تبيعو مبادئكون و تعيشو بالوحل متل الخنازير…او تتنكرو و تتمسحو متل الثعلب..او تجحشو و تجرمو بالعالم متل الاسد..او تعيشو على بقايا غنائم الاسد متل الضبع…يعني لتصير خرية كبيرة بالبلد…لازم يكون عندك صفة حيوانية بشكل او بأخر…

لسا الفكرة مو واضحة ليش انك حيوان؟

طيب انت حيادي معناها الوضع الحالي ما عندك مشكلة فيه.. اكيد بمرحلة من مراحل حياتك…موظف دولة..مدرب فتوة…موجه مدرسة…شرطي…ضابط بالجيش…ضابط مخابرات..مسؤول بالدولة قلك يا حيوان او يا قرد و انت سكتت و رديت عليه و عملت يلي طلبو منك…و اذا لسا ما صار معك هالشي..او انو بتعرفلك حيوان كبير بالبلد يدعمك…اكيد حدا بعيلتك صار معو هالشي…و بالتالي و حسب نظرية الدم ما بصير مي…انت حيوان بحسب كلام رجال الدولة و النظام و يلي هنن بيحطو القانون…يعني قانونيا انت حيوان…..و ساكت..فليش عم تزعل مني؟

هلأ بيجو العالم بيقولو ايه خي انا بحس و ليكو الجرايم يلي عم تصير عنا بالبلد و كس اخت النظام..منيح هيك؟…..معناها انا مالي حيوان…لاء..ما حزرت…بعد الاحساس..بيجي الكلام…و بعد الكلام بيجي الفعل…اذا ما حققتو هالمواصفات لسا بتضلو حيوانات…بس انو اذا واحد عم يحكي…بيكون اقرب خطوة ليكون بشر من يلي بس عم يحس او يلي ماعم يحس بنوب…بينما هالشباب و الصبايا و الختايرة و الولاد والنسوان يلي طلعو تظاهرو و طلبو حقوقهون…هدول حسو و تكلمو و تصرفو..فما عاد فينا علميا نوصفهون انهون حيوانات…و كونهون عم يتظاهرو ضد النظام يلي عم يعاملهون كحيوانات معناها قانونيا مالهون خاضعين لصفة الحيوان يلي القانون بيفرضها….بلشو بتفعيل الخمسة بالمية من الدي ان ايه يلي بيتميز البشر عن الحيوان…..

هلأ ممكن تفكرو حالكون حرابيق و بطريقة دفاعية غبية بتقولو ايه انت كمان حيوان على حسب روايتك و من كلامك ادينك..و من دهنك رح سقيلك…..انو طبعا انا حيوان…لما كنت بالبلد…كنت حيوان متلكون..بس انا و العالم يلي تركو البلد…حسينا انو الوضع بيخري…و انتقلنا من مرحلة الاحساس للتصرف و طفشنا…ما قدرنا نحكي لانو ماكان حدا بيحكي…انا عن حالي ما كنت مستعد احكي لاني ماعندي ثقة بمفهوم الدولة بوقتها…هالشي مالو جديد…انو صحلنا الطريق الاسهل..بس انو تصرفنا و ما ضلينا عم نحس و قاعدين ناطرين الفرج…..هلأ بمجرد ما تترك البلد…بتسقط عنك قانونيا صفة الحيوان…لانو بعمرك ما رح تسمع موظف حكومي من اي مستوى و منصب عم يقلك يا حيوان بهل البلد الغربي يلي بدك تتغرب فيها…فطول ما انك بهل البلد الكل بيعاملك على انك انسان…بس بتعرف انو اذا بترجع عالبلد بدك ترجع حيوان لانو ما رح تقدر تفعل الخمسة بالمية من الدي ان ايه المطلوبة لتكون انسان…اي مغترب بيعرف انو اذا بيرجع عالبلد اكتر من انو يقعد يقول لاهلو و رفقاتو انو عنا بمملكة البشر في هيك و انتو مافي عندكون…ما بيسترجي يحكي…بيعرف انو حقو فرنكين بالبلد…و اذا كان قلبو قوي و حكى كم كلمة…بيكون عرفان انو في بسبور غربي بيطلعو من القفص و بيرجعو على مملكة البشر…

انت يلي عايش بالبلد..اذا عم تنبعص من كلمة حيوان.. دورك تبلش تحكي..او حتى تتصرف..شلون ما بدك تتصرف تصرف..بدك تتظاهر… بدك تسافر ..بدك شو ما بدك…بس انو المفروض تتصرف….اما اذا بدك تضل ساكت و حيادي و ناطر…معناها بليز ما تزعل لما قلك حيوان..يعني العلم و المنطق و القانون عم يقولو هيك…مو انا

Follow

Get every new post delivered to your Inbox.

Join 37 other followers