تنويه هام كتير كتير..اكتر مما بتتصورو بشوي

مايو 26, 2011 - 13 تعليقات

البوستات الجديدة رح تكون تحت هالبوست

مدونة حشيش سوري انتقلت بشكل دائم لهون

بس بأعتبار الموقع الجديد انحجب بسوريا حسب ما خبروني العالم…رح خلي هالنسخة شغالة للناس يلي بسوريا و اعمل نسخ للبوستات الجديدة هون كمان….بس يا ريت تجربو تفوتو عالموقع الرئيسي قبل ما تقرو او تشاركو هون لانو الاغلبية بيشاركو هنيك……اذا ما فتح و ما بدكون تستعملو برنامج ساحق للبروكسي ساعتها رجعو لهون اذا بدكون….

حشاشجي سوري

هكّروني!!

نوفمبر 19, 2011 - 3 تعليقات

يوميا او كل يوم و التاني بشوف عالفيس بوك اعلانات انو يا جماعة انا حسابي تهكر و الصفحة الفلانية تهكرت و فلاني هكرجي….بالاول قلت انو هيك موجة عابرة…بس كأنو مؤخرا كترانة اكتر من الاول…و لسا كلو عم يتهكر..هلأ المستفز بالموضوع انو بيجي الواحد بيقلك والله هكرولي حساب الفيسبوك…و بيشدد على كلمة التهكير..انو منشان يعطيك انطباع انو هو ضحية هجوم  الكتروني و في هيك شي هاكر متل يلي منشوفهون بالافلام قاعد بالقبو و ادامو سبع شاشات و نازل بعبصة عالكيبوردات و عم يعمل هاكنغ و كراكنغ بمعدل خمسين كود بالثانية…بيحاولو يعملولك هيك دراما منشان يوحولك انو الشغلة معقدة…مو بسيطة بنوب …وانو  سبب التهكير هو خطورة الموقف و ليس غباء المستخدم…يلي بهل الحالة هو الشخص يلي تعرض للهجوم الالكتروني المتطور الغاشم…

فرح احكي شوي عن هالقصص و حاول اشرحها على قد عقلاتي انو عسى و لعل يعني..انتو اكرم من الله شي…

هلأ اول الشي مصطلح التهكير في عليه خلاف بالمعنى تبعو باللغة الانكليزية بين اوساط الكمبيروترجية ……انو اساسا المصطلح الو كذا معنى…يعني مثلا  الكمبيوترجية الداعمين لمبدأ الاوبن سورس..المصدر المفتوح (متل فايرفوكس ولينوكس وغوغل) هنن يعتبرو هاكرز….و يلي بيخترقو الاجهزة و الانظمة كمان بيقلولهون هاكرز بس من باب المعية…بينما هنن اسمهون كراكرز… و جماعة الكراكرز يلي بيشتغلو بالحماية و ضد الكراكرز السيئين عم ينقو انو ما بصير يكون اسمنا متلهون منشان هيك اعتبرونا هاكرز و هدنك الحيوانات العراعير هنن الوحيدين اسمهون كراكرز…بس انو للتسهيل و لانو هيك معلومات لا بتفيد و لا بتغني و من مبدأ الصابون…فالكل بيستعمل مصطلح هاكرز ليدل على اي شي الو علاقة بسرقة شي عالنت!

و فكرة الهاكينغ او الكراكينغ بحد ذاتها هي اختراق جهاز كمبيوتر خاص او شبكة خاصة….اما سرقة حساب فيسبوك و معلومات دخول للايميل او لاي موقع هي اسمها فيشينغ… متل صيد السمك بالانكليزي بس بي اتش بالاول بدال حرف الفاء…الفيشينغ هو متل الصيد…بس بالمي العكرة…الصياد..هون عندو وظيفتين…الاولى انو يجهز الطعم و التانية انو يزتو بهل المي..منشان السمكة او المستخدم يعض عليها..

هلأ تجهيز الطعم شغلتو بسيطة و في مليون موقع بيشرح الطريقة بالتفصيل يعني ممكن سعدان يعمل فيشينغ و هو قاعد عالشجرة و عم يزعوط بعد ما يقرا هالمواقع…مو هاكر……هالطعم هاد هو عبارة عن صفحة بتشبه تماما صفحة الدخول تبع الفيسبوك او صفحة الجيميل او اي موقع مراد سرقة معلومات الدخول تبعها…و هي الصفحة بيكون فيها كود بيبعت المعلومات تبع الدخول لعند الصياد….يعني انت بتشوف صفحة هي تماما متل صفحة الفيس بوك بتحط ايميلك و الباسوورد و بتكبس دخول و بعدين بيطلعك اي صفحة…ممكن صفحة غلط او برجعك عصفحة الفيس بوك الاصلية…و عادة ما بتحس شو صار و بتفكر النت عندك حزقت و بترجع بتفوت…هلأ انت بمجرد ما كبست دخول خلص الشي يلي كتبتو بهل الصفحة صار عند الصياد و العوض بسلامتك…

ساويت صفحة طعم مثال هون (بس بلا كود السرقة)…للاستئناس و التوضيح…و ممكن تكون بالعربي او بأي لغة…و طبعا الصياد بيلزمو موقع يحط الطعم عليه و بأعتبار هالشي غير قانوني فدائما هيك شغلات بتكون على مواقع مجانية ممكن يسجل فيها بدون ما يقدم معلومات حقيقة عنو و اسؤا ما بصير عليه هو تسكير الحساب تبعو و خاصة اذا عايش ببلد مافي قوانين بهيك قصص….فيعني مافي موقع محترم بيحط هيك صفحات لانو بيكون معرض للملاحقة القانونية….

صنع الطعم و تجهيزو هو الجزء الاسهل من هالعملية…القسم التاني يلي هو زت الطعم بالمي و هو الاصعب…و الصياد بيعتمد على شغلة وحدة بنجاحو…. غبائك!

رمي الطعم بتم بشكل بشكل طرش عام بطريقتين…عالايميلات…او روابط ضمن الفيس بوك….. هلأ الصياد بدو ياك تعض على الطعم و تكبس الرابط و تحط معلوماتك…اذا بس كبست الرابط ما بصير عليك شي…متل لما السمك بتشم الطعم و ما بتعضو..فلحتى يشجعك على العض..بدو يحطلك شي يشططلك ريالتك…هلأ لو كنت سمكة…كان عيارك دودة و بتعض….بس لانو مخك اكبر منها فدودة ما بتعبي راسك…منشان هيك عادة بيستعملو عناوين طنانة…قبل الثورة و هيك قصص كان بتلاقي عناوين مثيرة جنسيا لانو فينا نعتبر حالنا شعب ممحون و هي احسن طريقة تلقط عالم….انو مثلا بتلاقي عنوان بيقلك فضيحة  ليلى علوى تطارح سامية الجزائري الغرام …او نانسي عجرم تلعق نهدي شريهان و رأفت الهجان عم يتفرج…هيك شغلات انو شو ما كان توجهك ممكن يكون عندك فضول تفتحو و تشوف شو عم تساوي هالليلى علوي و شريهان…هلأ وقت الثورة العناوين صارت ثورية…كلها فيديوهات فيها مثلا شبيحة يضربون فتاة و يعرونها بالشارع…او بتحمل عنوان مشوق لفضيحة بخصوص شخصية معروفة…يعني عادة شغلة مطنطنة و اذا بتصفن فيها شوي بتلاقيها مو واردة تكون موجودة بالتداول…بس اخي الغريزة الجنسية اولا و الفضول ثانيا بيعملو العمايل…

هلأ كيف ممكن تلافي هيك قصص….ما بعرف شو بدي قلك…انو غالبا عندك برنامج حماية على كمبيوترك و فرحان…بس لازمك شوية وعي الكتروني..

مثلا…استعمل شي اسمو المنطق العام…شيلك عن كلشي…المنطق موجود و متوفر بكثرة…يعني لما تكون فايت على حسابك عالفيس بوك و عم تشوف شو عم يساوو رفقاتك و بتلاقي على حيط حدا او حيط صفحة هالرابط يلي بيثير حاسة الفضول عندك بشكل كبير و بتكبس عليه بقوم بيطلب منك تفوت عالفيسبوك….طيب انو صفون فيها شوي…ما انت اساسا فايت على حسابك عالفيسبوك…ليش بدو ياك تفوت مرة تانية؟…اكيد الفيس بوك ما رح يقلعك و يطلب منك الدخول مرة تانية لتفتح هالرابط خارجي… معناها في ان بالموضوع…و بأعتبار في ان فما المفروض تكون هندي بريشة…و بنفس الوقت ما بدها تكون مهوورس من الخوف…ببساطة لما بتطلعك صفحة دخول عالفيس بوك…زيح نظرك على راس المستعرض او المتصفح من الجهة اليسار…محل ما بتكتب العنوان…و شوف شو العنوان الطالع….رح تلاقي كلمة فيس بوك بالعنوان اكيد…بس رح يكون فيها شي تاني….بالمثال يلي حطيتو فوق بتشوفو انو الدومين تبع المندسة طالع…فبدالو ممكن يكون اي شي…و ممكن طبعا يكون بغير توزيع..متل مثلا

http://www.facebook.something.com

www.something.com/facebook.login

http://www.something.something.net/login.facebook.com

هلأ حصرا بتطلع عالعنوان يلي طالع براس المستعرض يلي عم تستعملو و بتطلع عالقسم الرئيسي منو و يلي موضح باللون الاحمر..باقي الكلام بالعنوان ما بيهمك…و ما تهتم الرابط شلون طالع على الايميل او عالحيط تبع الفيس بوك لانو سهل كتير يتفبركو…متل الرابط التالي مثلا:

www.facebook.com انو شكلو عنوان  فيس بوك و ابن عالم و ناس بس لما بتكبسو بياخدك عالصفحة الطعم….

كقاعدة عامة…انت لما بتكون بموضع شك و قبل ما تحط معلوماتك..دائما انتبه على الكلمة يلي قبل الدوت كوم الرئيسية بالعنوان..اي كلمات غير facebook  بتكون مباشرة قبل ال .com معناها مالك مصلحة…و كقاعدة عامة تانية…بعمرك ما تحط معلومات الدخول لاي موقع اذا انطلبت منك بعد ما تكبس على شي رابط…..هلأ بالزمنات بالمستعرضات القديمة كان ممكن حدا يخبو العنوان المزيف بالمستعرض و يعملولو ماسكينغ…بس بظن كل البشرية بتستعمل متصفحات انترنت محدثة على الاقل خلال اخر سنتين….فكتير صعب انو الصياد يخبي عنوان الطعم تبعو بالادريس بار…

هلأ في طرق تانية طبعا للحصول عالباسووردات بس معقدة اكتر و بدها يقدرو ينزل شي برنامج صغير او فيروس على جهازك…و هالشي صعب الا اذا كتير كنت جحش و اي شي بيوصلك بالايميلات من اتاتشمنتس  و روابط بتفتحها بدون اي تحفظ و بغض النظر عن مين باعتلك ياها.. و ما عندك برنامج حماية على جهازك…بس انو الطريقة الاكتر انتشارا لسرقة حسابات الفيسبوك هي الفيشينغ…

فلما بيكون في صفحة عالفيس فيك فيها شي عشرين ادمن ما كتير صعبة انو يكون في بينهون عالم جاهلين بيفوتو على هيك روابط و بينسرق حسب الفيسبوك تبعو و بأعتبارو ادمن على شي صفحة الصياد بيكون صار فعليا ادمن و بيطرد كل الادمنجية بعد ما غير الباسوورد و الايميل تبع الحساب.. و بتكون صارت الصفحة صفحتو…

انو الشغلة بدها غشيم مو هاكر…

اسطورة الشعب الجحش

نوفمبر 19, 2011 - رد واحد

هدا بالزمنات و يمكن اول خمسطعشر او عشرين من عمري كان عندي اسئلة عن انو ليش نحنا هيك…يعني ليش متخلفين و خلافو…فبالاول وقت كنت صغير كان التبرير الانسب هو اسرائيل و الاستعداد لمواجهتها و كلشي حرمان عايشينو و كلشو زبالة شوفها هي سبب مباشر و غير مباشر لاسرائيل…و كنت مقتنع و خلص و هيك ريالتي شاطة..بس انو كنت مبسوط… بعدين بالعشرينات من عمري..بلشت اصفن شوي..كانت بداية صفناتي يعني…يمكن لانو لاحظت انو كبرت و صرت هالقد قدي…بس لا حاربنا اسرائيل و لا فرق شي من ناحية الزبالة يلي شفتها طول عمري….فوقتها صرت اصفن..و بالنتيجة طلع معي التبرير الانسب يلي بيفسر ليش هيك لسا متخلفين و جامدين بمطرحنا هو انو نحنا شعب جحش….و صارت مسلمة عندي..انو بتشرح كل الاعراض و بتفسرها بشكل بيروي فضولي و بريح راسي… اخي خلص..بتتعامل مع موظف دولة بيقرفك عيشتك بتطلع بتقول شعب جحش…بتطلع مع شوفير التكسي  بينصب عليك بالعداد..بتنزل بتقول صحي انو شعب جحش…بتشوف الفوضى بالشارع و غياب مفهوم الدور و النظام و الشاطر يلي بيزمط و عالم عم تكب زبالة من شباك السيارة و عالم مسكرة عليك مدخل البناية و عالم عم تدفش و عالم عم ترفس و مدري شو…بتقول مافي مجال شعب جحش…

شعور الجحشنة بيمتد من المحيط للخليج…يعني كلنا اجمالا منعترف بتخلف العرب و طبعا من شوف حالنا اقل تخلفا…ما بعرف ليش بس يمكن لانو ما منلبس غلابيات و عبايات بأبو رمانة…فيعنا مفهوم الشعب الجحش الو ابعاد قومية عربية… هلأ اهل الخليج و باقي العرب ما بيستعملو عبارة شعب جحش…يمكن لانو مهذبين او لانو الجحش مالو شعبية عندهون متل الجمل…..فبتكون اي صفة شبيهة تانية بس انو بشرية و غير مرتبطة بأي حيوان عادة… نحنا بسوريا عنا تقبل لمفهوم الجحش….انو فلاني جحش…او شعب جحش …كلمة الجحش محببة علينا….لانو ربينا بممكلة الغابة..قائدنا اسد و رجالو بيتعاملو معنا كحيوانات…و عبارة يا قرد و يا حيوان هي غالبا اكتر عبارة بيسمعها السوري عبر مراحل حياتو و خصوصا لما بيحتك بالجيش و الامن..يعني اذا منجيب مواطن من كل دولة  من دول العالم و منحطهون بغرفة مع بعض و منجي من وراهون و منادي يا حيوان…او يا قرد…ماحدا منون بيرد غير السوري…و بيرد بشكل عفوية و  ما بيشعر بالاهانة…بالاخير قائدنا اسد و نحنا قرودو يعني…فمنشان هيك نحنا منستعمل هالمصطلح اكتر من غيرنا و منتقبلو اجتماعيا…….

فمصطلح الشعب الجحش….ما حدا بينكرو اجمالا…اي نعم كتير ما بيستعملوه…بس بالنادرلتلاقي حدا بيرفضو من باب الجوهر….انو بيرفضوه من باب انو عيب يا زلمة…ملافظ السعادة يعني بس مو كمبدأ…. طبعا الخلاف الجوهري الوحيد بين هالعالم هو التعليل ليش انو شعب جحش…هون بترجع للثقافة المنزلية و الطائفية و العقائدية لكل مواطن… يلي بيقلك السبب هو الاستعمار و اسرائيل و نحن لها و بدنا نرجع القدس و بنتيجة هالتصميم الفظيع من طرفنا على استعادة حقوقنا…صار في مؤامرة مستمرة علينا..و صرنا دايما هدف للاستعمار العالمي…و التعليل موجود بالتاريخ و الانتدابات يلي مرت علينا..و في شي بيقلك السبب هو الدين..و تحديدا الاسلام…..يا اخي شوف شلون بأميركا المسيحية كتير متطورين  و شوف افغانستان شلون…معناها السبب هو الدين…نحن الاراميين كتير اذكياء بس هنن اجو و خربونا….و شي كمان بيقلك انو السبب هو الدين….بس لانو ديننا الحنيف يتعرض لمؤامرة عالمية… و العالم العربي من محيطه لخليجه..بالاضافة لافغانستان و كوسوفو و الشياشان, هنن عرضة لهل المؤامرة يلي بتقودها اميركا و الحركة الامبرماسوصهيوصليبيوبريالية الحديثة و من قبلها الشيوعية و ريتشارد قلب الاسد…و طبعا فينا دايما نرش شوية اسرائيل هون و هنيك. …فكل واحد بيفسر سبب ظاهرة الشعب العربي الجحش بما يتناسب مع علامو….من المحيط للخليج…..

هلأ انا شخصيا ما عندي مشكلة مع اي جحش بصراحة..لا الحيوان و لا الانسان..من باب انو كل مين على عقلو الله يعينو…بس المشكلة انو صرنا مو بس منعتبر البني ادم جحش..لاء و منتعامل معهون على انهون جحاش و حيوانات… و صار عنا اختلاط بالمفاهيم و القيمة الانسانية المضافة براسها…  يعني مثلا انا لما بعتبرك جحش هو شي..و لما بعاملك متل ما بعامل الجحش شي تاني…الحالة الاولى سببها البيئة يلي ربينا فيها و فرضت علينا الرأي الواحد و السلطة المطلقة لصاحب هالرأي….بينما الحالة التانية سببها انك لما بتختلف عني فبصير بشوف حياتك عديمة القيمة متل الحيوان ….. لما بعتبر فكرك متل شنهقة الجحش شي..و يا برد عليك بشنهقة او فكرة او ما برد هو شي…..و لما بصير برد على فكرك بالعصاية لاني معتبرك جحش هو شي تاني مختلف كليا…

على قد ما عاملونا و علفونا كالقطيع صار في عنا همجية حيوانية و ابتعدنا عن انسانيتنا تحت مليون عذر و مسمى…هالشي هلأ عم نشوفو بعيوننا و عم نستغربو و مصعوقين….بس هالشي من طول عمرو موجود…بس الجحش يلي كان عم يموت كان جحش بنظرنا النا فما كان عنا مشكلة….وقت مات الاف من الاميركان بتفجيرات نيويورك و كتير عالم عنا احتفلو و فرحو و اعتبرو هالشي مقبول و جهاد و انتقام…انو هدول المدنيين معلش ينقتلو لانو سياسيات اميركا العدوانية ضد القضية و مدري شو…ماعم قول كل السوريين…بس كتار….انا شخصيا لما شفت الطيارة عم تفوت ببرج التجارة ما عرفت شو اشعر…اترددت و اخد معي وقت لحسو عمل اجرامي مالو اي تبرير تحت اي مسمى…..يلي منختار نشوفو انو ضدنا منصير منشوفو جحش…و نحنا منعمل العمايل بالجحاش…بزمناتو مفيد الوحش صار بطل بالضيعة لما قطع دنب الجحش…ما بيلزمنا نحاكم الانسان اذا كان متهم او برئ..بس هو مختلف خلص معناها حيوان و تعا يا قرد يا مفيد قطعلو دنبو…لما سمير قنطار قتل طفلة اسرائيلية عمرها اربع سنين  صار بطل قومي عنا و هلأ لما وقف مع النظام صرنا نتهمو بأنو جحش لانو وقف مع نظام عم يقتل اطفال…انو الطفلة الاسرائيلية هي جحشة…فمو مشكلة يقتلها…هي محتلة و اجت على فلسطين…كأنو اخر كم جيل ولدو بأسرائيل كان الهون خيار وين يولدو…..بس انو يا اخي جيشهون قوي فمعلش نقتل اطفالهون اذا بيصحلنا….احسن من بلا…و انو اي نعم نحنا جماعة لا تزر وازرة وزر اخرى و ما منقطع شجرة بحرب…. بس منمرقها كرمال عيون القضية…..ولما بيجي هالاسير و بيصف مع النظام يلي عم يقتل اطفال سوريين.. مننتفض و منصير منشوفو حيوان……انا هون شايف الخلل… ازدواجية الضعيف….منقول على شخص مجرم اذا ارتكب نفس الجريمة يلي نحنا منرتكبها بحق يلي منعتبرهون خصوم و منبرر لحالنا…كأنو الشخص التاني يلي عم يقتل ما عندو مبرراتو و عقائدو و افكارو..انو هنن بيقتلو لانو بيحبو يقتلو…بينما نحن منقتل لانو اصحاب قضية..انا هون كلامي عن قتل مدنيين مو عسكريين و جنود..هدنك شغلتهون يقتلو و ينقتلو…. نحنا مالنا انسانيين بس نحنا ضعفاء…و الدليل انو القوي مننا بيقتل لما بيصحلو يقتل و الضعفاء مننا يلي حوليه بصفقولو…دائما كان بالنسبة النا معلش ينقتلو مدنيين طول ما انهون مالهون من عنا و هالشي هلأ عم يصير عنا  و عم نشوفو…..يلي عم يقتلو السوريين هنن سوريين ربيو متلنا و عاشو متلنا…يلي عم يشنعو و يشبحو هدول سوريين…شو ما كان الدافع…هدول سوريين…هنن هلأ بمصدر القوة فعم يقتلو و يشبحو.. بس جوهر المشكلة هي انو مافي قيمة للحياة البشرية…

لما منتسائل انو من وين جابو هالحقد….هادا مالو حقد…الزلمة ما بيعرفك قبل هلأ لحتى نقول حقد…بس انت صرت بالنسبة الو انسان مختلف عنو و اختلافك عنو جوهري…متل الاميركي او حتى الطفلة الاسرائيلية….و هو عم يتصرف على هالاساس متل ما طول عمرنا منتصرف ضد يلي اتربينا على انهون اعدائنا….انت و ابوك و امك صرتو من المدنيين يلي معلش يموتو بنظرهون كرمال قضيتهون….اي نعم مافي يقول عنك عدو…بس انو خائن هي نفس المعنى…و يلي معو سلاح بيقتل الجحش و يلي ما معو سلاح عم يشبح بطريقتو…

مافي قيمة او احترام للحياة الانسانية بالمعنى الحقيقى للكلمة…بايران وقت انتشر فيديو فيه صبية ايرانية اسمها ندى عم تموت بعد ما قوصها الامن…اكتر من مليونين ايراني نزلو عالشارع…بمصر وقت انتشر فيديو خالد سعيد…مصر انتفضت..تونس نفس الشي…..نحنا صار عنا الاف القتلى و مئات الفيديوهات يلي فيها قتل اشنع من قنل ندى و خالد…بس مع هيك ما صار التحرك الشعبي يلي بيدل انو هالشعب هاد شعب انساني و مالو شعب جحش…الاف القتلى و لسا في كتير سوريين عم يبررو قتلهون و عم يطالبو بقتل المزيد…

هجوم  سوريين على معارضين و ضربهون بالقاهرة… هو كمان تعبير عن هجمية الضعيف…يلي تربينا عليها…..انو هادا الزلمة بيخالفك…ضربو..ما معك سلاح…رفسو..و من هون بظن ولد مصطلح الجحش… .لانو اي نعم الجحش بياكل و بيعلف و بيعتل و بيستحمل ضرب و ما بيقول لاء و ما بيفكر و طموحو انو يعلف و يتكاثر من الحيط للحيط يا رب السترة و بيموت هيك..بس لما بيصحلو يرفس…بيرفس… حتى لو انو رفستو ما بتحقق شي بس فرصة انو يعبر عن جحشنتو..هلأ انا ما عم قول انو هاد متل هاد ا..بس المبدأ و الفكرة وحدة…الهمجية …و كل مين بيهمج بحسب استطاعتو!

الهمجية او الحيوانية طبيعي تكون موجودة عننا…يعني مافي دولة او مجتمع بيولد متحضر…لانها الحياة يلي منحلم فيها براسنا بدها سنين من اعادة التاهيل و نفض المناهج الدراسية و السياسية و الاجتماعية….. كل المجتمعات مرت و رح تمر بمرحلة الجحاش…نحنا هلأ بنهايتها..و النهاية لسا بدها وقت شوي…و منكون اغبياء اذا منتوقع انو عقود من الهجمجية الفكرية يلي اتمارست علينا رح تمر بدون خساير.. الحياة مالها وردية…مافي شي ببلاش و كلشي الو تمن….عقود عشنا و معترفين انو قيمتنا كشعب اقل من باقي الشعوب…..لما مثلا بيموت 1600 لبناني و بالمقابل بيموت 200 اسرائيلي  منعتبر ان لبنان انتصر لانو اسرائيل ما قدرت تقتل الشيخ و يلي ماتو مو مشكلة بس انتصرنا ..انو المهم ما مات المعلم…و بتعرفو كل اسرائيلي بألف عربي…فيعني بالحساب نحنا قتلنا ما يعادل 200 الف بينما اسرائيل بس قتلت 1600…يعيش القائد.. تعودنا عالقتلى كأرقام مو كبشر…. فمو صعب نشوف انو قيمة حياة بعضنا كسوريين لما البل وصل لدقنا اقل من قيمة حياة البعض الاخر…و هالشي عم نشوفو صرلنا اشهر….و في عالم مافرق معها قتل الالاف من السوريين…بس لما صارو يحسو انو ممكن القصف يجي من برا و ينزل فوق روسهون…انتفضو لاول مرة بحياتهون…و صار بدهون الرئيس يقتل سوريين اكتر…يقتل كل هدول المختلفين عنهون…مدنيين…عسكريين…ابتفرق…المهم خلصونا من هالحيوانات..

اربعين سنة خلونا نتقبل قتل الاخضر و اليابس اذا كان بيتعارض مع قضيتنا المفترضة….عشنا اربعين سنة متل الحيوانات…ما فينا نتوقع انو بمجرد قررنا نثور انو خلص صرنا زلم و بشر…الثورة لا تجب ما قبلها…لسا العقد و المشاكل الاجتماعية موجودة…ما بتروح بمجرد ما نغير النظام…تغيير النظام رح يكون الفرصة لنبلش نبني انسانيتنا يلي متوهمين انها موجودة عننا….

الثورة هي بدايتنا كبشر و يلي رح تحطنا عالطريق انو نصير بشر..بس ما بتحولنا بين يوم و ليلة…..لانو معظمنا اليوم يلي عم نبكي على قتلانا…كان يوما ما ما عنا مشكلة انو نشوف مدنيين بغير دول عم ينقتلو لما قاتلهون كان صديقنا او قتلهون بيشفيلنا غليلنا من عجزنا و ضعفنا….. منعرف حالنا انو صرنا بشر لما بيصير عنا قوة و قدرة انو نقتل او نرفس.. بس ما منقتل و لا منرفس و منتصرف كبشر.. و بتصير متلك متلي كانسان مهما كان الاختلاف و مهما كان رأي هو عبارة عن شنهقة بالنسبة الك…..منعرف حالنا صرنا بشر لما بتصير قيمتك كسوري بنظر حكومتك و شعبك نفس قيمة الاميركي و الاسرائيلي و السويدي و الفنلندي و الدنماركي  بالنسبة لحكومتو و ابناء بلدو….

بس انو لسا مطولين..و اسطورة الشعب الجحش بدها زمن لتنمحى من عقولنا من بعد ما نحقق اسطورة الشعب يلي اسقط الجحش.

دخان و مرايا…

نوفمبر 19, 2011 - Leave a Response

انو شو يعني؟ بدو يسحب الجيش و الامن؟ طيب و العالم يلي رح يطلعو و يلي برياحة رح يكونو اعداد هائلة على امتداد سوريا؟ هيك يعني رح يطلعو متل ما بيطلعو البشر مظاهرات بباقي دول العالم؟ طيب و قطعان الشبيحة المسلحة يلي انحشدت و اتجندت و عبت البلد… وين بدهون يروحو؟ يطلعو برات المدن و ينطرو شو؟ ينطرو ليسقط النظام و يصفو بلا شغل؟

و شو منشان المعتقلين؟ خلص يعني رح تفضى السجون السياسية؟ و بعد ما يطلعو الاف المساجين…شو بدو يصير بألاف السجانين؟

و شو منشان الدنية؟ يعني اذا بكرا المذيعة عم تقول انو الناس فرحانين بالمطر بالشام..و نزل مصور عربي او اجنبي بكل حرية و صور الناس عم يتظاهرو مو كرمال المطر و صارت تطلع مباشر…شو بدو يصير بالمذيعة؟ و القناة ككل؟ شو بدو يصير بهالملايين العفويين لما يتفرجو عالحقيقة…شلون بدهون يصدقو الدنية من هلأ و رايح؟

ثم شو قصة الحنكة الدبلوماسية السورية يلي عم يحكو عنها الناس؟… لو بدو يخلي العالم تتظاهر و يوقف القتل…ليش اساسا لينطر مبادرة عربية فعليا كورقة سياسية ما قدمتلو شي غير الوقت……ما على اساس هو مسيطر عالوضع و في ملايين من الشعب نزلت عالشوارع بشكل عفوي ليأكدو على حبهون للقائد… شو بدو يعمل بالوقت؟ يعني رح يقدر يحقق بهل الوقت الشي يلي ما قدر يحققو ب 8 تشهر بمساعدة الجيش و الامن و المرتزقة؟ بدو شرعية؟ ما المفروض يوقف الاعمال العسكرية و يطلق المعتقلين قبل ما يكسب الشرعية من خلال الحوار…و المعارضة اذا راحت عالحوار و في شي عشرين ساحة تحرير بالشارع وراهون عم تدعمهون و الاعلام العالمي عم يغطي كل هالشي..شو رح يكون مصدر قوة النظام يلي رح تضمنلو انو يستمر وجودو بعد هالحوار؟ بيرجع بينزل الجيش و الامن يعني؟

 

فشو يعني؟

ابدا..دخان و مرايا….يا صديقي..لا اكتر و لا اقل….و هالورقة هي رح ينقعوها و يسقو الشعب ميتها… و الاسؤا لسا ما اجا…

و بيقلولك يلي بيجرب المجرب..بيكون عقلو مخرب..و ما حدا بيعرف النظام يلي عنا قد ما نحنا منعرفو…و التور الهائج ما بيوقف فجأة و بيهدا ..و لو كان عرفان حالو رح انو رح يموت اذا استمر..بالاخير هو تور و التور ما بيفكر متل البشر…بس الفكرة انو ما بيوقف غير ليسقط عالارض غرقان بدمو و دم شوية عالم حوليه…

هالووينيات…

نوفمبر 19, 2011 - Leave a Response

انو العالم هون محتفلين هاليومين بعيد الهالويين المجيد…و هيك شي لابس اقنعة و شي منكوش شعرو و شي مشخبر على وشو على اساس بيخوفو…و اجواء خوف و رعب يعني…فكنت عم اصفن بالخوف و هالقصص….انو مين بيخوف اكتر…الشبح و لا البعبع….انو مين ممكن يرعبني اكتر اذا طلعلي..

انو الشبح بخوف لانو يفدح عينو شبح…يعني انو شي مالو موجود يظهر..بخوف…و عادة الاشباح بيطلعو للناس خصوصي ليرعبوهون و بس..غالبا مالهون دوافع تانية….بيكون الواحد نايم قال بيجو بيحركو كرسي بالغرفة…انو بوووو حركنا كرسي…او بسكرو الباب و بشلفو معلقة عالارض..هيك حركات مالها طعمة بس انو بخوفو لما بساويهون شبح…و بالنادر ما يطلع شبح لطيف…يعني حسب ما بذكر كاسبر كان اخر شبح حباب انعرف و لقا رفيقو و مشي الحال…الاشباح اغلب الاحيان بيكون طالعين عندهون رسالة او شغلة معلقة بالحياة تبعون قبل ما يموتو..انو عندون رسالة بدون يوصلوها… مثلا تعو شوفوني انا مدفون هون و فلاني قتلني…حسب المخرج يعني…و تسعين بالمية منهون ما بيخوفو على قدر ما بينئزو تنئيز…يعني الشبح بيعتمد على عنصر المفاجأة…انو فجأة…بينط و بووو… لانو فعليا هنن ما عندهون بنية جسدية…منشان هيك بيمرو بين الحيطان بكل اريحية..بس فعليا ما بيقدرو يمسكو شي..يعني حتى كف ما بيقدر يضربك…منشان هيك عنصر المفاجأة مهم كتير لنجاح الشبح بمهمتو…..فيعني مثلا اذا اذا اجا رفيقك و معو شبح و قلك انو هي شبح…ايه ما بترتعب…بالعكس بتصير بدك تاخد و تعطي و تسئل هالشبح…..بينما تخيل تفتح باب التواليت او الخزانة بليل و تلاقي شبح لاطيلك هنيك…و هدول يلي بيتخبو بالخزانة عادة اخرى من يلي بيسكرو بواب و بيحكرو كراسي و بيعملو حركات بلا طعمة…

بينما البعبع..كبير..و العالم كلها بتخاف منو بدون ما تشوفو…يعني الشبح لازم يطلع صوت او يطفى ضو لحتى يخافو منو العالم…بينما البعبع من بعيد لبعيد بيخوف…الكل بيحكي عنو و بيخاف منو…بس غالبا ماحدا شافو… البعبع على عكس الشبح…ما بيعتمد على عنصرالمفاجاة…يعني مثلا بعمرك مارح تفتح باب التواليت او الخزانة و يطلعلك بعبع… ممكن شبح…بس مو بعبع….  البعبع بيكون موجود و الكل بيعرفو انو موجود و الكل بيحكي عنو انو ولي ليكو في بعبع…و ممكن الواحد مننا يولد و يعيش طول عمرو و عرفان انو في بعبع…اساسا غالبا اول مين بيحكيلنا عن البعبع هنن اهالينا…و بالمدرسة بيعلمونا عن البعبع..و وين ما رحنا منسمع عن البعبع و منتلافى نناقش بقصص البعبع لانو عادة قصص البعبع في من وراها مصيبة..فخيو البعبع اي نعم ما بيعتمد على المفاجأة…بس بيخري و في من وراه مصيبة لا محال…….فمافي مفأجاة مع البعبع….

….الشبح كمان بيخوف بشكل فردي..يعني غالبا الشبح ما رح يطلعلك الا اذا كنت لحالك…غير هيك بيخاطر انك ما ترتعب…يعني تخيل قاعد انت و الشباب و سهرانين ينط عليكون شبح..ايه احتمال كبير ما تخافو..هادا في حال ما استلمتو الشبح و قفلتو عليه…..مو متل تبع الخزانة…و الشبح عادة بيجي بشكلين…يلي شكلهون متل البشر بس على افتح و ابهت شوي…و في يلي شكلهون متل الحرام الابيض ابو الفتحتين من فصيلة كاسبر….بينما البعبع  ممكن يخوف مجموعة من الناس…يعني ممكن تقعد مع شلة من رفقاتك و كلكون تكونو خايفين من البعبع سوا…ممكن البعبع يخوف سكان حارة كاملة او بلد..او قارة..او فصيلة كاملة بنفس الوقت…..و البعبع الو مليون شكل…ممكن يكون كبير على شكل كوكب عملاق بدو يسحق الارض او بسيط على شكل فكرة …

الشبح نقطة ضعفو انو كتير عالم ما بتصدق انو موجود….و هالشي بيخلي مهمتو كتير صعبة…يعني مو بس همو انو شلون يرعبك…لاء بالاول بدو يلاقي واحد مقتنع انو في اشباح و بعدين بيشوف شلون بدو يرعبو…بينما البعبع الاغلبية بتصدق بوجودو و بيتعلمو كيف يتصدولو من نعومة اظفارون….هلأ احصائيا مثلا…ما بعرف اي حدا شاف شبح شخصيا…بس كل العالم يلي بعرفهون بيخافو من شي بعبع…او عايشين مع بعبع…او في بحياتهون بعبع… او حتى تصارعو مع بعبع…

الشبح بيطلع بشكل فردي….منشان هيك الكشف عن وجود الاشباح بتكون بشكل شخصي…يعني مثلا بعمرو ما بيطلع مثلا رئيس وزراء دولة و بيقول يا جماعة في بالمنطقة الفلانية شبح انتبهو…انو الحكومات بتترك هالمهمة للافراد…خلص يلي بيطلعلو شبح بيتصرف بوقتها…لانو الاشباح شبه نادرين…فما خرج تتدخل الدولة….بينما البعبع غير…البعبع عادة كتير كبير لدرجة انو الدولة هي المسؤولة عن الكشف عنو….و هالشي مو جديد…من زمان..من قبل الحكومات و الدول..دائما البعبع ما كان يقدر يكشف عنو غير اشخاص معينين…قائد طامح.. ساحر القبيلة…شيخ حضرة….. هنن عادة بيكونو اول مين بيتنبه لوجود البعبع و ببلشو يعلمو اتباعهون عن هالبعبع….و على اعتبار البعبع شكلو متحول…فممكن اي شي حولينا يكون بعبع…في حال انوجدت التربية القومية او الاجتماعية المناسبة يلي بتشوف هالشي او هداك على انو بعبع و خطر على الناس و العادات و المصالح… او اي وحدة منهون…

التصدي للشبح شغلتو بسيطة….عادة الاشباح بيطلعو بالعتمة…فمجرد ما تشعل الضو ممكن الشبح يهرب… لانو متل ما قلت راسمالو عنصر المفاجأة…و اذا شعلت الضو و شفتو جاية لعندك بدو يرعبك ما رح ترتعب…ممكن تشوطو او ممكن تهرب او تزعط…فالاشباح كتير بينزعجو من الضو…منشان هيك في ناس  و غالبا اطفال…بتنام و بتترك الضو شاعل خوفا من  شي شبح….تاني وسيلة للتصدي للشبح هي بتطنيشو…يعني اذا بدك تبعصو للشبح…اعتبرو مالو موجود… بتشقو بالنص اذا بتعمل حالك مالك شايفو او سمعانو…يعني اذا حرك الكرسي مثلا…خلص تركو يحركو ما بدها تحسسو انو عم يزعجك…بالعكس بعصو و رجع الكرسي لمحلو……او ممكن تقرا المعوذات مثلا… بس اجمالا الاشباح شغلتهون فافوشية…

البعبع قصة تانية….لانو البعبع مالو حل لانو بيزول و بيتلاشى مع الوقت فمالو حل فوري….يعني بزمناتو البعبع تبع طوفان النيل كانو من كل عقلون الناس يزتو عذراء بالنهر كل ربيع منشان ما يغضب عليهون و يطوف….و انو كانو مقتنعين….دارت الايام و صار في انترنت و صارو بيعرفو انو لعمى على هل السلبة شو قربان ما قربان….وتحول البعبع مع الزمن و المعرفة لاساطير قديمة…..الشيوعية كانت بالنسبة للاميركان بعبع….اتربو الاميركان على خطر الشيوعية…انو بالاخير اذا بدك تمشي شعب و تخليه يدعمك و ينتخبك او يخاف يفتح صوتو ضدك……يا بدك تحكمو بالصرماية فوق راسو متل مثلا كوريا الشمالية…يا اما بدك تجبلو بعبع وتحكيلو اديشو مخيف هالبعبع …و تفهمو انك انت رح تحميه من هالبعبع متل اميركا…يا اما طبعا الشغلتين سوا اذا كنت دكتاتور ابن حرام….تفعسو و تخوفو و بنفس الوقت تحسسو انو من دونك البعبع رح ياكلك… متل عنا بسوريا…فالاميركان كانو يخافو من البعبع و كل خطب الجمعة تبع رؤوسائهون كانت عم تحكي عن هالشيوعية…….سقط الاتحاد السوفييتي….صار بدهون بعبع جديد منشان الناس تخاف و يسهل التعامل معهون….طلع بعبع الاسلام و خافو يا ناس….و انا بحميكون من هالبعبع…و حرب عالارهاب هون و حرب عالارهاب هنيك …و طول ما الناس خايفين من البعبع…و انت محارب البعبع العتيد…فأمورك بالزبدة……هي مشكلتو البعبع….

البعبع بيصيب جميع الشعوب و بشكل جماعي…..هلأ انو بعبع عن بعبع بيفرق و مستوى ثقافة شعب عن شعب بتفرق….و كل واحد على قد مصالحو ووعي شعبو بيلاقي البعبع المناسب و بيزبط القصة على كيفو و بيخلي المخرج يأخرجها متل ما بدو….بالاخير محارب البعبع العتيد معو وقت و امكانات البلد تحت ايدو ليحمينا من البعبع….و الله يخليلنا ياه فوق راسنا للابد لانو لولاه البعبع رح ياكلنا لا محال….و كل ما زاد جهل الشعب كل ماكان البعبع اكبر…و كل ما كترت البعابيع…بعابيع سياسية و بعابيع اجتماعية…. بالاخير لما انت حمار و انا بدي ياك تسمع كلمتي…و حمار مو من النوع تبع الجزرة….انو انت مستوى ذكاك اكتر منو بس انو جزرة ما بتعبي راسك…و اساسا مالي مستعد اعطيك جزرة على قد طموحك و ما بدي ياك تفكر بالفكرة اساسا…فبجوعك و بخوفك من البعبع…و لما بتقلي جوعان بضربك على ايدك بالعصاية و بقلك هلأ مو وقتها خلينا نتفرغ للبعبع…و بشرحلك عن البعبع ليل و نهار و بخليك تحفظ اقوالي لتنجح بالمدرسة و بتدرس انجازاتي ضد البعبع و بتردد شعاراتي كل يوم اول ما تفيق و قبل ما تنام….فأمورنا انا وياك بتكون بالزبدة… انت بتعيش بالحظيرة و بتشعر بالامان من البعبع و انا بسهر على حمايتك من البعبع بقصري العاجي و منعيش هابيلي افر افتر…..

فمنشان هيك التصدي للبعبع صعب…لانو اول الشي بدك تعرف انو الشي يلي انت شايفو بعبع ممكن ما يكون بعبع بس انت هيك شايفو لسبب غالبا بيرجع لشي تربيت عليه و عشت عليه و انحشى راسك فيه…و الفكرة بالبعبع انو بمجرد ما عرفتو و ميزتو…ببطل يخوف…على عكس الشبح…انو اذا عرفت حقيقو للشبح اكيد رح يخوفك لانو شبح و شي ميت و هالحركات..بينما البعبع بيختفي…ممكن تضحك عحالك او تحس بالغباء بحسب البعبع……بس انو بتبطل تخاف…و الخوف هو اكبر اداة للتحكم بكلشي…بشر و حيوانات اذا بدك… و اذا بتكبر على خوف بيصير فيك متل ما صار مع آلبرت الصغير …بالاخير الخوف هو متل النسيان…وسيلة دفاعية لتحمي الانسان…بس الافراط بالخوف و تأطيرو بيعمل عمايل و بيخلي الناس يتصرفو بدون وعي او منطق….

طيب بعيدا عن الهالووين و الاشباح و البعابيع……انو مين هاد آلبرت؟؟

هو طفل تمت عليه تجربة انعرفت بأسم تجربة آلبرت الصغير و هي تجربة مشهورة ساواها عالم نفس قديم بالزمنات لاثبات شي متل يلي اثبتو بافلوف مع الكلب  (الكلاسيكال كونديشنينغ) بس هون من ناحية  الخوف …جابو البرت و هو طفل عمرو اشهر و عطوه فارة بيضا صار يلعب فيها….و بعدين صار في قصة حب بين آلبرت و الفارة … قام العالم واطسون …يلعن روحو…انبعص و صار كل ما يشوف البرت مع الفارة يطلع صوت مزعج و عالي و يخوفو لالبرت..هالشي صار بشكل يومي طبعا…مع الوقت صار آلبرت يخاف من الفارة البيضا….صار بيكرهها..و كل ما يشوفها بيلزمو حفوضة جديدة…و بعد فترة صار يخاف من كلشي لونو ابيض…فارة …ارنب….كلب…عطعوط…حوت..شحاطة……اي شي لونو ابيض و بيشبه الفارة من بعيد…صار البرت بيخاف منو…..فلو جابو الاخوان المسلمين و الامبريالية و الرجعية و الغرب و اسرائيل و خوفوه فيهون لآلبرت بدال الفارة البيضا من وقت ما كان عمرو كم شهر …..كان غالبا آلبرت كبر و طلع منحبكجي…

بس الله سترو للصبي و اكتفو بالفارة….

حظر دماغي…

أكتوبر 28, 2011 - 2 تعليقات

 و هدول بدون حظر..و هدول ما بدهون حظر..علقو ببعض… خاين يلي ما بدو حظر..طنط يلي مابدو حظر….و يلي بدو حظر..مافيه ناموس..و يلي بدو حظر مدري شو… و هيك علقانين ببعض و يلي حرد و بطل بدو يثور و يلي انهز بدنو و فقد الامل بالحياة و يلي شدت شعراتها و يلي كزت ع سنانا…

عم اصفن صرلي شوي انو انا بدي حظر و لا ما بدي حظر؟… ما قررت بصراحة و ما عم اعرف قرر…يعني لما بدي اخد هيك قرار بدي كون مفكر بكلشي و ضابب شنتايتني لانو الشغلة فيها حظر و مافي رجعة بمجرد ما قررت انو بدي حظر و لا لاء…..تماما متل ما صفنت وقت هالعالم تخانقو على تسليح الثورة و عدم تسليحها..و خاين يلي بدو يسلح..و خاين يلي بدو يسلح….و علقو ببعض…و هيك …و غالبا اغلب جماعة هيا بنا نتسلح تحولو لهيا الى الحظر و جماعة الطنطات تبعات اللاحظر هنن يلي ما بدهون سلاح….و انو علقانة..من قصة لقصة.. بدنا و ما بدنا… و هون بتذكر كلام ستي تبع انا اريد و انت تريد و الله يفعل ما يريد…

انو ما عم بعرف شو قصة الحظر يلي علقانين عليها و كأنو القرار يعني بيرجع لاي حدا من يلي عم يتخانق..او حتى يلي عم ينقصف و يرجع يتظاهر…. هلأ ما بعرف وين عايشين هالعالم بس انا عايش على كوكب الارض و عم حاول اتذكر اخر مرة دول العالم اتحدت و اتدخلت لتساعد شعب مظلوم بناءا على طلب هالشعب..بس ما عم اتذكر…عنا عالارض في دولة اسمها فلسطين و الفلسطينيين صرلهون ستين سنة عم يطلبو من العالم يتدخل…و ماحدا لحدا يا حبيبي…في دارفور…في رواندا…في كتير قصص عن شعوب و مجازر…و مافي كتير قصص عن تدخل دولي من باب المساعدة لانو الشعب طلب……هلأ هيك عنا الامور بكوكب الارض…مابعرف بسوريا كيف الامور…حاسس هالكوكب… او الفقاعة.. يلي عليه سوريا هو نفس الكوكب يلي عليه جمهورية يوتوبيا الديمقراطية…بس مابعرف بالاكيد لانو جغرافيتي على قدي….

قال بليبيا صار في حظر….معناها الحظر وارد….بس شو بدنا بالنفط… اي نعم الفوضى بليبيا… بتأثر على سعر النفط العالمي يلي كل هالدول يلي عندهون طيارات عايشين عليه…الحظر مو منشان ياخدو النفطات…لانو بالاخير النفط بينباع بسوق الجمعة تبع النفط بأسعار بيحددها السوق…ولما بيصير كركبة بالدول النفطية بيخاف السوق و بيتكركب و بترتفع الاسعار و بياكلها الكل و اولها الدول الكبيرة…..انو الصين و روسيا ما تخلو عن صاحبهون القذافي لانهون منايك..بس لانو دولهون بتشرب نفط متل الحليب…و الخساير من دعم هالزلمة اكبر من المنافع…بس انو شو بدنا بالنفط…بليبيا صار في حظر..معناها الحظر واجب….و شو بدنا بأسرائيل…اي نعم ليبيا مالها مشربكة و عندها حدود مع اسرائيل…و اي نعم ماكان في خوف من اطلاق صواريخ على اسرائيل انتقاما من الحظر بليبيا…و اسرائيل بتتضرر من فوضى بليبيا لانو كمان اسرائيل بتشتري نفط من سوق النفط…بينما رح تتضرر اكتر من ضربات انتقامية انتحارية قبل ما النظام السوري يلفظ انفاسو على امل انو يغير شي بالمعادلة الاخيرة بحياتو…و اكيد رح تتضرر من سوريا ديمقراطية الحكومة بتدير البلد على كيف الشعب مو على كيف عصابة صغيرة ممكن يصير في نقاشات جانبية و تبادل مصالح…..بس انو شو بدنا بأسرائيل…بليبا صار في حظر…حيا الى الحظر…

عنا بكوكب الارض الامور بين الدول محكومة بالمصالح المتبادلة…لما بتكون بين دول ديمقراطية بتكون المصالح غالبا اقتصادية و استراتيجية لصالح الدول لانو ماحدا رح يخلد بالحكم اكتر من كم سنة…و ممكن يطير اذا انفضح شي من تحت الطاولة لانو الحيوانات عندهون انظمة قضائية حرة…..بينما لما بيكون في دكتاتوريات بالموضوع ممكن تكون العلاقات بين الدول محكومة بمصالح شخصية من جهة الدكتاتور..و مصالح اقتصادية و امنية من جهة الدول التانية…بس بالاخير كلو مصالح…

عنا بكوكب الارض سوريا ماعندها مصالح اقتصادية محرزة…لانها صغيرة…يعني الفوضى فيها ما بتأثر لا على سعر النفط و لا على نومة حدا تاني بأي دولة تانية بالعالم…لك الفوضى بسوريا ما عم تأثر على نومة كتير سوريين…..فالصين و روسيا و غيراتهون مابيخسرو شي من التمسك بالعلاقات مع عصابة من هالبلد…و خصوصا انو الصين و روسيا مالهون دول ديقراطية و حقوق الانسان و الحريات و هالقصص عندهون زبالة كمان…يعني من نفس المدرسة…و ما رح يشترو النفط بسعر اغلى اذا استمرو بدعم النظام….فليش ليدخلو فكرة الثورة ضد الاستبداد لعقول شعوبهون؟….اذا الصين حجبت بمحركات البحث عالانترنت اي شي بيمت للثورات العربية هل السنة جوات الصين…فيعني ما بيخسرو شي من دعم النظام..لانو اقتصاديا مع النظام و بدونو..البضائع الصينية هي يلي مسيطرة بالعالم…و الاحلى بييجي واحد..غالبا محبكجي مثقف..و بيقول اخي سوريا سوق للبضائع الصينية و مصالح اقتصادية و مدري شو…فمنشان هيك الصين بتضل معنا…طبعا هالانسان ما بيعرف انو مثلا حجم التعامل الاقتصادي بين اسرائيل و الصين تقريبا ست اضعاف حجم التبادل بين سوريا و الصين….. فيعني من كل النواحي سوريا دولة عديمة الاهمية الاقتصادية بالنسبة للصين…بس انو ليش يساعدو بالتخلص من دكتاتور بالوقت يلي هنن عايشين بحكم شمولي؟ و روسيا نفس القصة…يعني ليش لتساعد على التخلص من دكتاتور صديق عم يشتري اسلحة من عندهون…و فاتحلهون قاعدة عسكرية بطرطوس…خسارتو بالوقت الحالي فيها خساير اكتر من  خساير استمرار دعمو…بيجيك نفسو هدا الواحد بيقول اخي سوريا هي حليف روسيا الوحيد بالمنطقة فمنشان هيك بتضل معنا…هلأ اكيد هالواحد ما بيعرف هالعلاقات الاقتصادية و الامنية بين اسرائيل و روسيا و خصوصا ايام هالشيشان…و ما بيعرف انو حجم الواردات الروسية لاسرائيل ضعفين الورادات لسوريا مثلا…بس اكيد النفوذ العسكري الروسي عالمتوسط بتخدمو سوريا اكتر من غيرها بحكم وجود القاعدة العسكرية الروسية الوحيدة بالمنطقة…النهفة انو هالواحد يلي هيك بيحكي بيسب على قطر لانو سامحين للاميركان يبنو قاعدة عسكرية على اراضيهون…لاء و بيجي بيقلك اخي انت فكرك ايران بتسكت…اي فكري ايران بتسكت..لانو اذا طلع قرار من الامم المتحدة بتدخل عسكري…ايران ما رح تحط حالها بمواجهة عسكرية مفتوحة ضد العالم….و خصوصا انو ايران مالها بموقع قوي عالميا…يعني العيون محمرة منها خلقة…فمصالحهون الاستراتيجية مع سوريا مو اهم من بقائهون بالحكم بايران….

اميركا ما بتخسر شي من الفوضى بسوريا..طول ما انها محتواة بسوريا…بالعكس احب على قلبهون..من يومين عم يحكو انو عدد الارهابيين يلي كانو بيعبرو الحدود السورية العراقية خف كتير من وقت ما بلشت الثورة السورية…فشو بدهون الاميركان احسن من هيك؟ صرلهون سنين عم ينقو على هالقصة…و لما صارت الفوضى بسوريا خف تسلسل هالاهابيين…بعدي اسمو هالرب…فيعني اميركا مابتخسر شي…..هلأ طبعا اميركا اذا سقط النظام ماعندها مانع بنوب…يعني سياسيا اشتغلت شوي بهل الطريق و بعد اشهر من بدء الثورة طلبو من الرئيس التنحي…بس ما بتفضل و منشان هيك ما مالها مستعدة تتدخل اكتر من سياسيا و اعلاميا…….الا اذا في حال كانت ضمنانة البديل….بس النظام صرلو زمان و يلي بتعرفو احسن من يلي ما بتعرفو….انو صرلو زمان و تأقلمو عالتعامل معو كمنغص اقليمي بس معروف انو ضرطو صوتها عالي بس بالاخير ضرطة…البديل مو معروف…يعني النظام عم يدعم حزب الله..بركي اجا البديل بدو يحرر الجولان لا سمح الله مثلا؟ فالشيطان يلي منعرفو احسن من الشيطان يلي ما منعرفو…اساسا اسرائيل صارعة رب العالم انو هي الدولة الديمقراطية بالشرق الاوسط بين شعوب من الرعاع العرب..الحكي يلي اكدو بشار الاسد بمقابلتو الشهيرة مع وول ستريت جورنال وقت قال انو السوريين بدهون اجيال ليصيرو جاهزين للديمقراطية….فشو عدا ما بدا..

سوريا بالنسبة لاوربا كمان هي مصلحة اقتصادية…و سوريا دولة تافهة اقتصاديا و حجم تعاملاتها مع اوروبا تافه و بغياب النفط فما في داعي لهز البدن..

فمن وين بدو يجي الحظر؟ ما بقيان غير الاسباب الانسانية…و متل ما ذكرت…عنا بكوكب الارض مالنا كتير انسانيين…و الانسانية ما بتحرك الدول..و لا الحكومات…الحكومات بدها شعوبها ينتخبوها مرة تانية…فهمهون مالو انساني…همهون هو اقتصادي..و دعائي و اعلامي…تحت غطاء انساني احيانا…

الحظر بيقتضي ضرب سلاح الدفاع الجوي بسوريا…و اذا سوريا ما عندها شي…فسوريا عندها صواريخ…و الكل بيعرف هالشي..ففكرة الحظر الجوي مالها سيران و اكيد ما ممكن يقدرو يساووها بشكل خاطف…و كل ساعة تأخير بضرب الدفاعات الجوية السورية من لحظة البدء رح تشكل صواريخ جديدة عم تنزل على اسرائيل….و برأيي هي النقطة الاقوى يلي بتخلي النظام السوري شبه مو فارقة معو و شبه متأكد انو مارح يصير تدخل عسكري لانو الرسالة اكيد وصلها للجهات المعنية…فالقصة بتتحول من حظر لحرب…لانو اسرائيل ما ممكن تسكت مثلا و بدها تساوي منطقة عازلة فمو صعب تفوت على مشارف دمشق لتعمل هالمنطقة…فأسرائيل و بكل جبروتها الدبلوماسي ما رح تخلي هيك شي يتحقق الا اذا كانو ضمنانين انو ما يصير عليهون مشاكل…او اذا بدها تصير مشاكل فتكون الجائزة كبيرة…و هالشي ماممكن يصير…صار شي مليون مسؤول اميركي و غربي قالو انو السيناريو الليبي ما بيشتغل بسوريا…..مافي غير جون ماكين جاب سيرة الضربة العسكرية…بس لكل يلي بيعرفو ماكين بيعرفو انو علاك و ضراط…غير هيك مافي شي…ماحدا بجيب قصة الحظر غير نحنا….و مو بس هيك…منتخانق و مننقسم على شي اساسا مالو عالطاولة…

اساسا شو بفيد الحظر؟ يعني مثلا اذا الطيران السوري ما عم يطير فوق حماة….شو يلي بيمنع الدبابات و المدرعات تقصف المدينة و تجيب عاليها واطيها؟ ما بظن المشكلة هي جوية بقدر ما هي مشكلة برية….الحظر ممكن يفيد في حال كان في قوات مسلحة عالارض عم تتقدم و تسيطر على مناطق اكبر عالارض…بس ما بتفيد المتظاهرين….يعني من هالالاف يلي انقتلو…كم واحد انقتل بقصف جوي؟…و حظر شوي بدون ثورة مسلحة او ضربة عسكرية ما بيفيد شي…يعني قبل هلأ بالعراق و بليبيا بالزمنات…صار حظر جوي..و شو النتيجة؟ ضل صدام و القذافي بالحكم سنين بعدها و الاجواء ضلت خالية من الطيران..حتى الطيران المدني طبعا…

الحظر برأيي هو متل التسلح…مالو مطروح مو لانو الناس ما بدها ياهون..بس لانو لوجستيا غير وارد…يعني قبل ما نختلف على تبعات التسلح و الحظر خلينا نكون واقعيين…كتير ناس لو صحلهون يتسلحو و يحولو الثورة لثورة مسلحة ما كان قصرو….بس منرجع لنفس المشكلة اللوجستيكية…من وين بدو يجي السلاح؟ من هي الدولة الجارة يلي مستعدة تاخد هي مجازفة لتسلح الثوار عالارض؟ فالتسليح و الحظر بيجو باكج واحدة…بس هالباكج مالها متوفرة لسوريا…هيك الواقع..

فينا نضل عم نتخانق على الحظر و فينا نطلب حظر من هلأ ليوم الحشر.و ما رح يتحقق هالشي اذا طلبناه… او فينا نعرف واقعنا و المعطيات حوالينا و نفهم انو الشعب السوري بهل الثورة هو لحالو…و الحل هو الاستمرار السلمي….لانو هو الحل الوحيد المتوفر….و مافي ثورة بدون تضحيات…و الشغلة بدها وقت ليختمر الوضع  بسوريا و هالشي رح يكون على حساب ارواح عالم كتير…و متل ما قال عزمي بشارة…قبل ما نطلب العالم يتدخل…لازم نطلب من دمشق و حلب يتدخلو…اذا ثورتنا ما عم تقدر تحشد دعم شعبي بدمشق و حلب لاي سبب كان…كيف بدها تقدر تحشد دعم موسكو و واشنطن و بكين و باريس و عواصم القرار…. معناها بدها تنظيم اكتر..بدها تنسيق اكتر…قبل ما نطلب بحظر جوي بدنا نفك الحظر الدماغي  لنعرف شلون نتحرك و شو طبيعة الدنيا يلي حولينا و الكوكب يلي عايشين عليه…..

التدخل الغربي بأي شكل عسكري مالو مطروح هلأ من قبل الغرب و المعطيات.. بس مو معناها ما رح يكون مطروح بعدين….و وقت ينطرح..اذا بدو ينطرح.. ما رح ينطرح لانو الجمعة اسمها “جمعة التدخل الغربي” او  جمعة “من مال الله يا محسنين”..رح ينطرح وقت بتصير تكلفة التدخل العسكري من ناحية سياسية على الاقل اقل من تكلفة استمرار الوضع كما هو عليه…

و هكذا…

سوري غصب من عنو

أكتوبر 7, 2011 - 3 تعليقات

غريبين نحنا…

يمكن اكتر شعب بيخون بعضو هو نحنا…ما بتذكر شفت او قريت نقاشات بين عالم من غير دول و بصير فيها تخوين و اتهامات بالعمالة للعدو…نحنا هالشي سهل جدا…مافي داعي تعمل شي بس قول شي مختلف و ممكن برياحة تسمعلك كلمة شك او تخوين…ما بدي فوت بالاسباب لانو الاسباب معروفة…و المفروض عم نثور على هالاسباب….. حتى من قبل الثورة…التخوين و المقاومة الخشبية و الشعارات الكرتونية هي عماد نقاشنا و اي شي بيخالف هالمسلمات هو خائن و مالو سوري…..بيكون وضعك متل وضعو…شحاد متلك متلو..او لو مالك شحاد …..تنيناتكون احلامكون صغيرة اذا بتحكوها لحدا عايش بدولة من دول العالم الاول او التاني..ممكن يشعرو بالشفقة عليكون…..بس عند اي نقاش جدي..اذا صار…اذا المسلمات تم المساس فيها…ممكن تطلع خائن…

هلأ لما منصفن بمفهوم الخيانة شوية منفوت بالحيط…شو هي الخيانة؟ يعني الخيانة هي خيانة نظام او قائد او هيئة او خيانة شعب و انسانية؟ طيب الوطن شو هو؟ نظام؟ رئيس؟ امن؟ امان؟ و لا شعب و حضارة انسانية؟ طيب نحنا عنا وطن؟ يعني لنفرض عننا..شو هي حصيلة نتاجنا الحضاري للبشرية؟ نحنا كسوريين شو اخترعنا مثلا؟ شو طورنا؟ شو حررنا؟ شو انجزنا؟  على المستوى الانساني شو مستوانا؟ منوقف مع الظالم ضد المظلوم … العراق وقفنا مع الشعب على اساس ضد الغزو الاميركي…بس انو هل نحنا وقفنا مع الشعب ضد الاحتلال و لا وقفنا مع النظام ضد الاسقاط؟ منحب الشعب العراقي؟ طيب ليش وقفنا مع ايران بحربها ضد الشعب العراقي؟ منحب فلسطين و ما بيهون علينا اسرائيلي يقتلهون…منبكي على ولادهون؟ طيب ليش قتلناهون و حاربناهون بلبنان؟ منحترم الشعوب؟ طيب جيشنا ليش ضل بلنان عشرات السنين؟ شو رأيك اذا في جيش اردني مسيطر على البلد تحت شعار الحماية؟  منحب الليبيين و قلبنا عليهون و يلعن النيتو شو عمل فيهون؟ طيب ليش صحبة مع القذافي يلي قتل منهون الالاف؟

معلش النظام يقتل شعبو…بس ماحدا تاني يقرب…معلش النظام يقتل شعبو…اذا نحنا عنا بالحارة ما صار علينا شي…

انا ما بحب الرئيس..ما معناها انا خائن…انت بتحب الرئيس..كمان ما معناها انك خائن.. جحش غالبا…بس مالك خائن….بس مع هيك..لما منتناقش و منختلف…سهل كتير واحد مننا يطلع خائن…انو عادي..كلمة سهلة منشلفها لما منلاقي حدا عم يهاجم الشي يلي منأمن فيه…

طيب زينب و لا مالها زينب؟ انت زعلان على زينب حصرا؟ مشكلتك مع انو زينب ماتت مثلا؟ مين هي زينب؟ بنت سورية ماتت بس ما ماتت؟ طيب شيلنا عن يلي ماماتت…مين هي يلي ماتت؟ كلهون كذابين…طيب خليهون يفوتو عالبلد ليبطلو كذب..فرحت انو زينب ماماتت؟ طيب غيرها يلي عم يموتو هدول شو؟ يمكن ما هزوك متل ما هزك موت ستيف جوبس…انو هدول الفقرا و الدراويش يلي عم يموتو مالهون سوريين…هنن خونة.. بس ستيف جوبس سوري غصب من عنو..هو ما اعترف بحياتو بأبوه السوري و رفض يحكي معو..و بعمرو ما داس البلد و لا شالها من ارضها….ابوه يلي هو سوري…طرق امو المو سورية و حبلها و حمل حالو و هرب من المسؤولية…صار ستيف جوبس سوري…. لانو فيه دم سوري…بينما هالالاف من العالم يلي ولدت و عاشت و عانت بسوريا..هنن دخلاء خونة و حثالة…الدم يلي فيهون مالو سوري…الدم يلي عم يسيح بالشوارع مالو سوري…بس ستيف جوبس هو سوري..خلونا نبكي عليه..نحنا رب الانسانية و الحضارة…و بطريقنا خلينا نبكي على ابن المختار و ابن المفتى…شب مثقف مات..منعرف اسمو و ابوه مدعوم…معناها الله يرحمو…خلينا نبكي عليه…هو دمو سوري لانو مدعوم…مو متل هالمتظاهرين الحثالة يلي مو معروفة قرعة ابوهون من وين …هدول لا منعرف اسمائهون و لا اسماء ابهاتهون…لا اخترعو ايبود و لا ايباد..حاولو يخترعولك حرية..بس بأعتبارك بتفهم بالموبايلات اكتر من الحرية..ما كتير همك الموضوع…

اسلاموفوبيا الغرب؟ مالها موجودة بالشكل يلي منتخيلو…هنن عندهون فوبيا من دين انتشارو قليل عندهون و جديد نسبيا و يلي بيشوفوه من اهل هالدين هو الافغاني و الباكستاني و هالزبالة…فطبيعي كتير يخافو..بس هي مالها اسلاموفوبيا…هي خوف من المجهول…بدكون اسلاموفوبيا روحو ع سوريا… انت مفكر انو يلي مالو مسلم بسوريا رأيو عن المسلمين بيختلف كتير عن الاميركان؟ هو رفيقك ما اختلفنا و ما بيعتبرك سلفي ارهابي متخلف…بس يا ترى رأيو بالبقاية يلي ما بيعرفهون شو؟ ناقش و شوف و رح تلاقي الاسلاموفوبيا موجودة ببلد اكتر من 60% منهون مسلمين…

طيب الدين…الوطن للجميع ما اختلفنا و انت كمتدين عم تقول انك فهمان هالشي و عم تقول انو ما عندك مشكلة تتعامل مع يلي ما بيأمنو متلك…بشرط انو يلتزمو الموضوعية و الاحترام…طيب ماشي..عيني ربك..ابوكي ياالديمقراطية ما حلاكي…بس شو يعني موضوعية؟ يعني مثلا اذا انا عم ناقشك و قلتلك انو الله مثلا مالو موجود..و حاججتك…او قلتلك انو انا سيخي و البقرة مقدسة عندي…..هل رح تتقبل هالكلام بأحترام و موضوعية و لا رح تعتبرو اهانة لمعتقدك؟؟ ليش معتقدك اهم من معتقدي؟ يعني انا مثلا لما بيكون خلافي معك على شخصية رئيس…عم تتهمني بالخيانة بكل اريحية..فشلون يعني ممكن تتعامل معي اذا اختلفنا على رب او اله او دين؟ ثم شو هو الاحترام المطلوب هون؟ انو مثلا ما قول انو انا ما بأمن بالشي يلي بتأمن فيه؟ او ما احكي و ناقش وجهة نظري بخصوص ربك مثلا؟ او اني اصمت و ماا احكي؟

الارجنتين… بعد ما ماتو الديناصورات  من شي 65 مليون سنة..تحولت بيومنا الحالي لمرتع خصب لعلماء الاحياء القديمة..البيليونتولوجيستس..ارض خصبة بعضام الديناصورات فصارت وجهة هالعلماء…بسوريا..ليسقط النظام و تتحرر الشعب و الارض..بدها تصير مرتع لعلماء النفس…ارض خصبة بكل انواع المشاكل و العقد… انو الناس يمكن مفكرين انو نحنا من دول العالم التالت لانو اسرائيل عدوتنا او لانو ما عنا نفط….غير هيك كنا دولة عظيمة بكل معنى الكلمة…و هي وحدة من هالمشاكل.

واحد واحد واحد

سبتمبر 30, 2011 - 2 تعليقات

بتذكر لما كنت صغير…ستي عزمتنا على كبة مشوية… وستي مشهورة بالكبة على مستوى الحارة ..و العالم بتحلف بكبكتها و بحشوتها…كنت صغير ابو صف اول و متخرج من الحضانة و ما حدا قدي و شخصيتي عم تتكون….انفردت هالطاولة و عليها كوشة اكلات محيطة بالكبة المشوية يلي هي ملكة الغدا لانو ستي مساويتها…و ستي من هدول النسوان الشوام يلي انو كبيرة العيلة و متسلطة  و قوية و ممكن البعض يوصفها بأنها بنت حرام على قد ما كانت تحر بهل العالم و تعمل مشاكل و ما حدا بيسترجي يحكي..منشان ما تغضب عليه او عليها….و يروحو عجهنم..المهم..هالكبة على  حسب تعبير العيلة كانت شغلة عالبغلة…و كنت شوف خوالي و عيلهون عم ياكلو هالكبة و الدهن عم يشر و شكلهون متل يلي جاييتو اورغازم..عضيت اول عضة و التانية..دمعو عيوني و لعت نفسي و تشربكت امعائي مع البنكرياس و قضيت ليلتها عم استفرغ…كانت اول و اخر كبة مشوية  باكلها بحياتي….

بعد شي اسبوعين نعزمنا مرة تانية…كمان كبة مشوية بأشراف و تنفيذ ستي..فيعني العيلة رح تكون موجودة و الكل رح ياكل و يلقي خطابات المدح…و بلشت الوليمة و فجأة بيطلع ولد صغير و بيقول لامو هي عم تسكلبو كبة مشوية.. ما بدي هي ما بحبها..بدي بطاطا…الكل وقف اكل ….انو شو عم تحكي…شو ما بتحبها…لك هي كبة ام سمير…هي طيبة بس انت اجدب ما بتعرف طعمة تمك…..

بنفس الفترة..ستي التانية…يلي لسا اضرب من الاولانية و ادق رقبة…و فوق هيك بخيلة خير الله…ماكنت افهم ليش..بس انو هيك بخيلة..مرة عالعيد منشان توفر مصاري..راحت جابت قطعة قماش و خلت جارتها تخيط سبع بجامات و وزعتهون عيادي على هالكم صبي بالعيلة و انا من بيناتهون…البيجامة كانت زرقة غامقة و بتخري لدرجة انو فينا نعتبرها جريمة بحق الطفولة…وبأول يوم بالعيد و متل العادة بالعيلة بتجتمع عند كبيرة العيلة يلي ستي….انا فرحان انو بدي روح و العب مع ولاد عمي و هالحركات..من وصلتنا..اجو اهالينا عطونا البيجامات منشان نلبسهون لانو ستي بدنا تشوفنا فيهون…لبست بجامتي و قلتلها لماما انو بتخري (طبعا ما قلت بتخري بس بما معناه…انو لهلأ اذا بقول هيك كلمة قدامها باكل خناقة للسما) المهم….ماما قالتلي خلص لبسها و تشكر ستك و بعدين شلحها و بعمرك ما تلبسها..طبعا هون ما بعرف اذا كلام والدتي كان من باب انو عم تدعم نمو شخصيتي..و لا لانو فعلا البيجامة بتخري..ولا ببساطة قصة كنة و حماية…بس انو هيك قالتلي..رحت على الغرفة محل ما الكل مجتمعين و اصطفيت جنب ولاد عمومي اصحاب البيجامات الزرقاء و الكل صار يتغزل بهل البيجامات…و قصائد الشعر انهالت على ستي ابتهاجا و فرحا…سئلتنا ستي اذا كنا مبسوطين بالعيدية..ولاد عمومي ابتسمو و هزو راسهون ايجابيا…جوابي كان لاء..ما حبيت البيجاما..الكل بالاوضة سكت… انو شو عم تحكي..و بابا زورني و ماما عرفت انو رح يصيرلها مشكلة مع حماتها..شو هالكنة يلي ما بتعرف تربي…و انو شو يلي مو عاجبك فيها…هي حلوة بس انت اجدب ما بتعرف طعمة تمك…

سنين بعدها…و كل ما في كبة مشوية عالطاولة…قبل ما اي حدا ياكل..لازم يعطو محاضرة لهل الصبي يلي بأنو اجدب و ما بيعرف طعمة تمو كل ما رفض ياكل كبة…..و صار ياخد عيدية اقل من ولاد عمومو..بحجة انو ستو ماضل معها فراطة….سبحانو الله..كل صبحية عيد بتنقطع من الفراطة وقت بيكون دوري بالعيدية…

هلأ هالقصتين يلي مارح يغنو ثقافة اي حدا منكون او يزيدكون معرفة… هنن قصص صغيرة صارت معي و صار متلها مع كتير غيري…..كلياتنا..او معظمنا على الاقل خلال فترة حياتنا قلنا لاء لشغلة روتينية و بديهية بحياتنا..او كان عندو رأي صغير مختلف عن الرأي العام..الشغلة طبيعية جدا..انو نعارض الشغلات يلي ما بتناسبنا بحياتنا…كلنا عارضنا شي بحياتنا..اي شي او شغلة شو ماكنت صغيرة و تافهة بس قلنا لاء….و غالبا لما اظهرنا رفضنا..او معارضتنا الها.. تعرضنا للتوبيخ او اكلنا شي زورة على الاقل…المعارضة هو تصرف بشري..لانو سائبت انو حجم دماغنا اكبر من باقي المخلوقات فصار عنا مجال نفكر و نكون رأي…او على الاقل نحاول يكون عنا رأيي…بس عنا غير…سوريا غير..

مجتمعنا بيفرض علينا الاستبداد بغلاف تناغم مزيف …..بتبلش بالعيلة…و كلام الكبير صح مهما كان جحش…بتكمل بالمدرسة…كلام الانسة  ومدرب الفتوة صح مهما كانو جحاش……و الطالب يلي بيجادل مُسّلمة.. الله يعينو… اجدب و ما بيعرف طعمة تمو..انو ولد شو فهمك انت يا حمار..انا عم قول هيك و شوف انا شلون استاذ و معي شهادة اني بفهم و بالتالي اي شي بتقولو و بيعارض كلامي هو علاك و لو كان صح…..مو لشي بس لانك اجدب و ما بتعرف طعمة تمك….

منجي للدين… اساسا الدين اذا بيفكر الواحد يعارضو بأي شكل بيصير مرتد..حتى لو الدين نفسو بيسمحلو يعارض..اهل الدين و حماتو ما بيخلوك تعارض..فتنة..خيانة..زعزعة روح الوحدة الدينية…..انو جاهل الله يهديه..يلي هي النسخة الدينية من اجدب ما بيعرف طعمة تمو….

فهيك ربينا بمجتمع بيصادر الاراء يلي بتختلف عن الرأي الواحد..و الاختلاف ممنوع….و دائما في مصدر واحد للتشريع الاجتماعي و الراي المقبول…كلام الجد.. كلام القائد.. و كلام الرب.. و كلام الحزب.. كلام الشيخ.. كلام اي شخص عندو صفة رسمية او اجتماعية هو الصائب و رأي اي انسان تاني ما معو نفس الصفة هو خاطئ.. ليش؟ اكيد لانو اجدب و ما بيعرف طعمة تمو…..كلنا لازم نكون على نفس الرأي و ما نخالف و نمشي متل بعض و نسمع الكلمة و نكره يلي لازم نكرهون و نحب يلي لازم نحبهون..منعلف وقت بيقلولنا علفو..و منمعي لما بيقلولنا معّو..

لما الواحد بيعيش طول عمرو بهيك اجواء مصممة لتخفي رأيوالمختلف..طبيعي يكبر و يتولد عندو ردة فعل نفسية و سلبية ضد مفهوم الشي يلي بيعارض العرف و العادات و التقاليد و سياسة القطيع لانو صعب نتقبل فكرة الاختلاف….و لما منضيف فوقها مفهوم “الواحد”  يلي انزرع فينا…بيصير فينا انو منشوف كل يلي ما بياكلو كبة مشوية هنن جهة وحدة بيكرهو الكبة المشوية ..ما في فرق بين واحد و التاني…خلص كلو بيكره الكبة..كلهون مرتدين عن الكبة..و اذا كان بين الارهابيين يلي فجرو برج التجارة بنيويورك واحد ما بياكل الكبة…منصير لما منعرف انو جارنا ما بيحب الكبة..منحكي معو كأنو هو مرتبط بأرهابيين نيويورك..و لما منتخانق معو منشان شطف الدرج منقلو انتو الارهابيين هيك عقليتكون…بدكون حرية يا منايك!…

صعب علينا نشوف شي اكتر من “الواحد”…مو معقول يكون في اكتر..انو شو هي رأيين او تلاتة  او حتى اربعة لا سمح الله؟ هو رأي واحد..توجه واحد..يا هيك..يا هيك..يا بتحب الكبة و انت مننا…يا اما بتكره الكبة و انت عدونا..هلأ اي نعم انت متلك متلنا و احلامك و طموحاتك و اهدافك متل اهدافنا..بس انت بتكره الكبة..و في واحد اسرائيلي بيكره الكبة..معناها انت واحد اسرائيلي صهيوني ماسوني كرتوني متأمر…و “انتو جماعة المعارضة هيك”.  في واحد سوري..طول عمرو حرامي و ناهب البلد مع النظام..بين يوم و ليلة كره الكبة المشوية…و صارو جماعة الكبة المشوية بيعتبروه متلو متل اي مواطن درويش مابيحب الكبة…انو الاولاني كره الكبة لانو تخانق معها و كان بدو البيت بما حمل..فلما ما قدر..كرهها..بينما التاني بيكره الكبة لانو ريحتها طالعة صرلها عمر…زنخت البلد و عبتو زبالة و كولسترول و صار البلد مريض…فبيكرها لانها خربتلو حياتو و البلد…بس لانو مفهوم “الواحد” مسيطر علينا…صرنا منشوفهون واحد…خدام و لا غيرو…اي واحد بيقول لاء..هنن نفس الشي..لانو بعقلنا المأدلج و المريض..في حصرا لاء او نعم…ابيض و اسود…ثنائيي الابعاد و البعد التالت دحشو النظام بطيزنا على مر العقود منشان مانقدر نشوفو….و اذا شفنا عالم عم يقولو لاء.. فلازم يكونو نسخة عن بعض..متلنا تماما…قطيع واحد متناغم و عم يقودو راعي غنم و كلابو…

فالمشكلة انو لما انا بكون خاروف..مافيني استوعب انو باقي العالم مو خواريف..و لا سيما انو شكلهون متل شكلي..يعني المفروض من نفس الفصيلة….و بالتالي لازم يفكرو متلي..انو انا مافيني شوف او ستوعب غير شي واحد.. رئيس او راعي..فهنن اكيد مافيهون يشوفو غيرو ..و اذا عارضو هالواحد و شافو غيرو..معناها كل يلي غيرو لازم يكونو بس واحد…مو لانو هنن اصلا واحد…بس لانو انا خاروف و ما بقدر استوعب اكتر من واحد…

وواحد واحد واحد…و شكلو ما رح يجيب اخرتنا غير هالواحد و مفهوم “الواحد”…

و ربي يسر

مجلس الشاورما

سبتمبر 23, 2011 - 6 تعليقات

عم اصفن بظاهرة بالبلد كنت شوفها بزمناتي…و بعدين التهيت و هلأ رجعت عم شوفها…هالظاهرة  بسميها عقلية الشاورما…. نسبة الى الشاورما…يلي هي طيبة و مغذية و عانة عبالي ….المهم…هالظاهرة بشوفها ممثل لطريقة تفكير معينة عنا….و بغض النظر عن اسبابها..هي منتركها لعلماء النفس و الاجتماع…الا انها موجودة.. و بالاول كنت شوفها بالمجال الحياتي لانو ماكان في مجال نشوفها بالمجال السياسي…

في شارع اسمو الشيخ سعد بالمزة…. بزمناتو فتح فيه محل شاورما و شكلو امورو كانت زبدة…خلال كم سنة صار في بين كل محل شاورما و محل, في شي خمس محلات شاورما بهل الشارع……و الشي الوحيد يلي ممكن الزبون يفرقو بين الشاورما من عند ابو فياض مثلا و الشاورما من عند ابو تحسين هو انو ابو فياض بيدلق دبس رمان و بقوي قلبو..غير هيك سوق طويل عريض….عشرات المحلات….الف مين بدو يبيع شاورما…..و كلها نفس الشي…بدبس و لا بدون دبس..بالاخير شاورما……و بعد سنين من عشرات المحلات و الاستثمارات يلي انصرفت..ضل سوق شاورما كئيب و كل بياعين الشاورما عم يشكو….ما اتطورو و طورو المنطقة…هيك..انو الشاورما شغالة..فتاح شاورما و الرزقة ع المولى….

خلال النهضة الصناعية بسوريا بالتسعينات و يلي شهدت انتشار واسع و كبير و استراتيجي لصناعات المسكة و المحارم بمختلف الوانها و نهكهاتها و روايحها… وخصوصا  بعد كشف مسكة  ماسونية صهيونية  بحسب ما قالتلي الانسة بالمدرسة وهي عم تصادرلي اكتر من 200 صورة….. فتح شي صناعي سوري معمل مسكة وطنية و العالم بلشت تعلك علكة وطنية و صار كل الصناعيين بدهون يصنعو و يبيعو مسكة وطنية…صار في يوميا شي ربع ساعة بعد نشرة الاخبار دعايات لماركات مسكة و علكة…من قلة السلع يلي ممكن تتصنع…انو ماحدا فكر مثلا يعمل معمل مصاصات وطنية…كلو صار بدو يصنع مسكة… بنفس المستوى المحارم…انو بتذكر بطفولتي بالبلد ما كان في محارم….و كانت تجي تهريب من لبنان ..ميموزا و كلينكس و هالقصص….بعدين بلشت الثورة الصناعية خلال مراهقتي..و فجأة صار في ربع ساعة دعايات مسكة…و ربع ساعة دعايات محارم….انو الفرق بين محرمة و التانية هو البنت يلي بالدعاية…غير هيك…محرمة… و صار يلي بيورت ورتة…بيفتح معمل محارم…و شرطا…انو بس بيساوي نفس المحارم يلي عم يساويها ربع مليون صناعي سوري غيرو…مو انو بيعمل محارم تواليت…لاء.. بيساوي نفس المنتج…و بيصير لكل مواطن ماركة محارم….و بعد عقود من الخبرة بتصنيع نفس علب المحارم و المسكة..اي زبون و اولهون السوري اذا بيقدر يشتري علبة محارم او مسكة مو مصنعة بسوريا…ما بيقصر…انو هيك الصناعيين حطو عقلهون بعلبة محارم و ما فكرو يطورو…انو فتاح معمل علب محارم و الرزقة ع المولى…

و بعد الثورة الصناعية تغير الاقتصاد السوري بشكل مدروس من  صناعي زراعي الى اقتصاد خدمي زراعي بس انو الله يلعن الجفاف…فضل اقتصاد خدمي…يعني بيعتمد على الخدمات كقطاع اساسي بدل الصناعة نظرا للتحديات يلي واجهتها الصناعات السورية من مؤمرات و نقص بالمواد الاولية الداخلة بتصنيع المحارم و تشديد العقوبات على بيع التكنلوجيا المستعملة لتصنيع مسكة البوالين بسوريا… ….المهم..و بهل المرحلة الخدمية بتاريخ اقتصادنا  صار في ثورة بعالم الاتصالات بعد قيام الرئيس بأختراع الانترنت و قيام ابن خالتو بأختراع الهاتف الخليوي…و كنتيجة فورية لثورة الاتصالات…نص محلات الشاورما بالشيخ سعد قلبت من بيع الشاورما…لبيع الموبايلات و اكسسواراتو… صار بين كل محل موبايلات و التاني…شي ست محلات موبايلات و سبع محلات شاورما…و سوق الشيخ سعد هو مثال….بس كل شب باي حارة بالبلد صار طموحو يفتح محل موبايلات لانو في حدا بيعرفو فاتح محل و امورو هيليطية و سكر…و كان شبه مستحيل يلتقى محل موبايلات بحارة بدون ما يكون تسعة من جيرانو عم يبيعو موبايلات….في منهون لسا ببيعو جرابات نسوانية…بس عملو قسم موبايلات…انو هيك بيكون صاحب المحل دقة قديمة و ما بيثق بالتكنلوجيا و ابنو ثوري بدو يطور البنزنس تبع العيلة…فأبوه بنزلو ستاند موبايلات و كرسي…هلأ الله يرزق الجميع…بس يعني في سبيل توضيح هالظاهرة….

خلصنا من امثلة حياتية اقتصادية….بلشت الثورة….و قلنا يا لطيف شو عنا شغل…..انو ماحدا بيعرف عن وضع بلدنا و صعوبتو قد ما نحنا السوريين منعرف و يا محمد شو بدنا ننسق و ننظم لنقدر ننتصر بثورتنا…صار في تنسيقية بشي محل…قلنا برافو…بلشو ينسقو…..تاني يوم…صار في تنسيقية تانية…قلنا يا سلام…زيادة الخير خيرين…انو تنين احسن من واحد اكيد.. بيسيك ماث…و خصوصا انو شغلتهون التنسيق…مر اسبوع…اسبوعين…شهر و كم شهر…….رفيقي عم يقلي عندون بالبناية صار في اربع تنسيقيات و عدد سكان البناية هنن تلت عيل….كلو بدو ينسق…نحن شعب معروف عننا حبنا و شغفنا للتنسيق… و المثل بيقول يلي بيقدر يساوي تنسيقية…ليش لينضم لتنيسقية حدا تاني!…و بعد ست تشهر…و بدون تعميم شامل….بس بعد ست تشهر…و لاول مرة بتاريخ الثورات صار في تنسيقيات اكتر من عدد المتظاهرين يلي غالبا عم يطلعو من دون تنسيق……و صار التنسيقيات بدها تنسيق بتنسيقية…و بكرا اذا حدا عمل تنسيقية التنسيقيات…لحقو على تنسيقيات للتنسيقيات…..

بعيدا عن الميدان….قلنا لنقدر ننتصر بهل الثورة…لازم نتوحد و انو سهل نتوحد….يعني الطلبات العامة و الخطوط العامة واضحة و الهدف واحد…اسقاط نظام استبدادي..و تزبيط نظام ديمقراطي تعددي…انو بسيطة..مالها علم فيزياء نووية…فقلنا انو طبيعي يصير في جبهة سياسية معارضة موحدة….و بالفعل..فقت بيوم من هالايام و سمعت عن تشكيل مجلس وطني…قريت هالبيان و قلت حلو…بلش الشغل الصح…رحت عملت ساندويشة…رجعت لشوف شو صار بالمجلس الوطني…لقيت صار في مجلس وطني تاني بمكان تاني…قريت البيان و طلع متل البيان الاولاني…بس الالوان يلي براس الصفحة كانت مختلفة……قلت بكرا المجلس الاولاني بيجتمع مع المجلس التاني و بيتحدو و لا سيما بعد ما يلاحظو انو بياتاتهون التأسيسية نفس الشي تقريبا…مرت فترة و كل يوم منسمعهون  مجتمعين….و اخيرا…تم تشكيل مجلس وطني جديد…و بيانو متل البيان يلي قبلو…قلت خييي…خلصنا من هالقصة و اتفقو و هلأ رح يبلش الشغل…رحت فتت عالتواليت…طلعت لقيت شي تلت مجالس وطنية جديدة تشكلت بغيابي…صرت عم اكل هم فوت عالتواليت بصراحة …لانو مليت من قراية البيانات ..يلي بلشت تذكرني بالخطابات..و الخطابات بتذكرني بالخشب…و الخشب بذكرني بالنظام و بحياتنا و بواقعنا…كلو بدو يأسس مجالس وطنية و يأصدر بيانات…و المثل بيقول يلي يلي بيقدر يساوي مجلس وطني ليش لينضم لمجلس حدا تاني!…

عقلية الشاورما بتمثل نوع من التنافس الخطأ او العشوائية المنظمة بين اشخاص ممكن اذا نسقو مع بعض و فكرو خارج الصندوق يقدرو يأسسو شي للمستقبل مع بعض …مو مجرد موضة…او نزوة…..لو بدال ما خمسين شخص يفتحو محل يبيع نفس السلعة  بنفس الشارع و ياكلو من زباين بعض و يجمدو امكانية نمو بعضهون…شي تخصص بهل السلعة و شي تخصص بسلع جديدة مكملة لتستفيد من السلعة الاول كان السوق الكئيب تطور لمنطقة تجارية تقصدها العالم لتحصل على شي اكتر من ساندويشة شاورما….لو بدال ما خمسين صناعي صنعو محارم..و تخصصو بصناعات متممة..كان يمكن صار عنا مجال صناعي اوسع بفرنكين. ….عقلية الشاورما  بتحد من التطور لانو ما منشوف بأبعد من انفنا..انو فلاني ساوا هيك…خليني ساوي متلو و الرزق عالمولى..و ليش هو يساوي و انا ما ساوي نفس الشي..لا تخطيط و لا تنظيم ……يمكن من ريحة الشاورما او يمكن من تخشب عقلنا….كان عنا اسباب فرضت علينا نتخشب..القصة مو قصة تنظير او حب اللوم او انو ليش نحنا متخشبين او انو هنن متخشبين و انا لاء..كلنا عنا اسباب نكون متخشبين..و حياتنا  و بلدنا و انجازاتنا خلال اربعين سنة بكل محافلها هي دليل عالتخشب يلي عانينا منو و انفرض علينا و صار جزء من تفكيرنا….ما منفكر ببعدين…كان ممنوع نفكر ببعدين…بس  المفروض انو صرلنا ست تشهر عم نحاول نغير هالواقع…  الالاف العالم انقتلت و انحبست و اختفت و اتعذبت و اتشردت و اتبهدلت و انتهكت و ما قدرنا نتجاوز تخشبنا.. صار بين كل محل شاورما و التاني شي سبع مجالس وطنية  و سبعة و تلاتين تنسيقية و طنعشر بسطة…

لسا لهلأ  مختلفين و عم نفكر بعقلية الشاورما بدال ما نتوحد و ننظم…عم نتنافس ضد بعض على تحقيق هدف مستحيل يتحقق اذا ما كنا متعاونين كلنا مع بعض …التنافس حلو و صحي…بس مو بهل المرحلة….قبل ما نتخانق على لون الفستان, شو منشان نسترجع حقنا لنقدر نشتري الفستان بالاول..اذا بدنا نقضيها عم نعمل مجالس و تنسيقيات خشبية و نتنافس بين بعض الوقت رح يمر و يتمزق هالفستان و يلتعن سلفيسنو و لا انتو و لا غيركون رح يقدر يلبس … …..قبل ما ننط و نبوس العالم و نتراجهون ينقذونا و يقصفونا….شو منشان نكسر الخشب و نشوف لبعيد و نتوحد.. نكسر التخشيب و يصير شغلنا ليمشينا لقدام مو يخلينا مكانك راوح…….

و تسقط مجالس الشاورما الوطنية…

دَقَّ دُقَّ..و لسا رح نندَقّ

أغسطس 24, 2011 - 4 تعليقات

طبعا بهل الايام دارجة موضة التدخل الخارجي…انو هيك الكل عم يناقش التدخل الخارجي..و صار في عنا قسمين بين المعارضين بالشارع السوري ما بين مؤيد للتدخل و معارض…و صار في منحبكجية للتدخل و مندسين ضد التدخل و بتخيل من هون لفترة صغيرة يصير في الثورة السورية ضد التدخل و يلعن روحك يا نيتو..و بلش الخبراء العسكريين بيناتنا بوضع السيناريوهات و الذي منو…

عم اصفن بفكرة التدخل العسكري و هالسؤال يلي عم ينطرح…هل انت مع التدخل العسكري في سوريا؟

ايه ما طلع معي جواب…. انو هيك سؤال مدري شلون…متل يلي عم يسئلني شو بتساوي اذا عطيتك مليون دولار…هلأ فيني نط و عيط و افرح و قول بدي ساوي و رح اعمل و سوف و كل هالقصص يلي بتبلش بأحرف تنفيس و تسويف من سوف و قد و اخواتهما…بس بالاخير الاهم اسئل انوهل عن جد رح تعطيني مليون دولار؟…اذا عرفان عن جد انو في مليون دولار بجيبتي بأخر النهار…بيكون جوابي غير من لما  عم نحكي هيك من باب انو تخيل مثلا يا رعاكا الله…..

هلأ طبعا..الوحيد يلي عم يحكي عن التدخل الخارجي…هو نحنا…يعني اي نعم ما ضل مسؤول غربي فرنسي و لا بريطاني و لا الماني و لا اميركي الا وقالو انو التدخل العسكري مو وارد…بس منسمع كلمة تلميحة من حدا من بعيد.. دَقّ و دُقّ…و منصير منسرح بالسيناريوهات سواءا السلبية بالنسبة للمندسين ضد التدخل او ايجابية بالنسبة لمحبكجية التدخل…انو يلي بيسمع تنين مننا عم يتناقشو و هالشخص بيكون مالو متابع اخبار..بيفكر انو التدخل العسكري صار عالباب و مجلس الامن و كل الدول عم يناقشوه على قدم و ساق و ناطرين قرارنا منشان يهجمو و لا لاء…

القتل و التعذيب و الاعتقال يلي عم يمارسوه نظامنا عم يسرب الاحباط لقلوبنا و الاحباط هو اخطر الشي ممكن يصيبنا…الاحباط ممكن يخلينا ندور على وسائل تانية…متل التدخل العسكري…يلي هي اساسا مالها متوافرة من برا….منصير منعتمد على شو رح يساويلنا العالم و ننسى انو نحنا…و بس نحنا..من خمس تشهر بلشنا لحالنا…لا كنا متعطلين على رئيس اميركي او ملك عربي…شبابنا نزلو بشجاعة عالشارع و خلقو واقع جديد عم يخلي العالم يتصرف كردة فعل….بس العالم متل ما منعرفو ما بيتحرك الا كردود افعال…و ردود الافعال خاضعة لمصالح دول قبل اي مصالح انسانية او ديمقراطية…..و اكبر دليل هو بلادنا…الدول العربية…معظمها خاضع لديكتاتوريات و الشعوب العربية فقيرة و مظلومة من قبل حكامها…و ما حدا بيحرك شي…طبعا لانو مو شغلتهون يحركو شي..اذا الشعوب ساكتة..ما رح يجي الشعب المالطي يضغط على حكومتو انو تحرر الشعوب العربية من طغاتها……

التدخل الخارجي بسوريا لسا مو وارد و بعيد كتير….انو فكري صرلها الثورة ست تشهر تقريبا و عشرات الالاف من المعتقلين و الاف القتلى و المفقودين والجيش و الطيران و البحرية عم يدكو بالسكان..,و لسا من يومين لحتى طلبو انو يتنحى…حسني مبارك بعت شلة بلطجية راكبين على جمال و حاملين شحاطات و سيوف ليقمعو المتظاهرين ما ضل رئيس بالعالم الا و طلب منو التنحي…ليبيا..لسا ما طلعت اول دبابة من ثكنتها الا و كان النيتو مجتمع و عم يدرس فرض حظر جوي….فمن وين جاية فكرة التدخل الخارجي يلي عم نختلف عليها بين بعض ما بعرف…

اميركا و اسرائيل بيعرفو انو بمجرد اي هجوم على سوريا…كلشي صواريخ سورية رح تنطلق على اسرائيل..النظام رح يحاول يستجر اسرائيل للحرب و اسرائيل مالها مشهورة متل سوريا بألاحتفاظ بحقوق الرد…وأسرائيل ما عندها مانع تشوف مليون سوري ميت على ايدين النظام  و لا تشوف الف صاروخ سوري نازل على تل ابيب…و الشعب السوري بالنسبة للعالم ابدا مالو اهم من اسرائيل…و يلي مالو مصدق يدور بغوغل على شي اسمو فلسطين..و طبعا النظام السوري الو اذرع مسلحة بالعراق و لبنان و اي سيناريو عسكري ضد سوريا رح تتحرك هالاذرع…هلأ بيجي واحد بيقلك ايه بمجرد التدخل الاجنبي النظام السوري ساقط و هالاذرع رح تنط من السفينة الغرقانة…طبعا وارد هالشي…بس ما فينا ننسى الناحية الطائفية و الوجودية…حزب الله بمجرد سقوط النظام رح ياكل خرا رسمي…على كل الاصعدة..الجهات الشيعية المسلحة بالعراق رح تعمل كلشي بتقدر تعملو خوفا من سقوط المد الشيعي بالمنطقة…بالاخير ما فينا نتجاهل الطائفية بالمنطقة و خصوصا عند الجهات المسلحة بلبنان و العراق…بينما كل هالقصص ما كانت موجودة بالسيناريو الليبي و لا المصري و لا التونسي…

هلأ قصص الاذرع ممكن ما تكون مشكلة كبيرة…بس اسرائيل و الصواريخ هي انا بشوفها المشكلة الاكبر…صدام بزمناتو قصف 13 صاروخ على اسرائيل ايام حرب الخليج…سوريا وضعها اقوى من ناحية الصواريخ لانها بلزق اسرائيل…

و طبعا ما فينا ننسى ايران..يلي هي ما رح تدخل بشكل مباشر..بس غالبا اسرائيل اذا بدها توافق على حملة عسكرية ضد سوريا بما فيه خطورة على امنها فبدها تشترط انو تقدر تقصف ايران بشكل استباقي وقت تبلش المعمعة و خصوصا انو سوريا يلي هي جبهة الدفاع عن ايران رح تكون برات الصورة…فمنشان هيك سيناريو التدخل العسكري بسوريا كتير بعيد حاليا…و هالشي بيأكدو تصريحات كل المسؤولين و الوزراء و الروؤساء الغربيين يلي كلهون استبعدو ضربة عسكرية لغاية هالتاريخ…

ما حدا الو مصلحة بسقوط النظام غير الشعب السوري….و ما حدا رح يسقط النظام غير الشعب…هلأ ما عم قول انو الشعب رح يقدر يسقطو لحالو…بس اي نهاية للنظام فقط رح تكون على اساس استمرار التحرك الشعبي بالبلد و نموه…اذا هلأ بيقدر النظام يقمع الثورة بعد كل يلي صار…العالم كلو رح ينسى ثورتنا و شهداءنا و بلدنا قبل ما تنشف دموعنا….و ابدا ما رح يكملو مسيرة اسقاط النظام اذا وقف الشارع لاي سبب….وزارة الخارجية بتشتغل عالجبهة الدولية على تبييض الصورة و مسح الدم عبر مسلسلات اعلامية و دبلوماسية…و وزارة الامن و القمع رح تتكفل انو هالشي ما يتكرر مرة تانية..و اقتصاد البلد بيموت و الشعب بيموت و البلد بتموت و بيعيش النظام و خلص..

لسا الشارع لازم يفرض نفسو اكتر بأي تمن … والتمن رح يكون شهداء طبعا…بس يلي عم ينزلو عم يعرفو انو نازلين و ممكن ما يرجعو..عرفانين شو التمن…و بالاخير مافينا نزعل عليهون…انو نحنا يلي بينزعل علينا مو هنن..هنن ماتو شهداء وطن..و ما بظن بهل الزمن في اعظم من هيك موتة…و خصوصا لما الشهيد نازل عالشارع و سلاحو هو صوتو و شرعية مطلبو….عم ينزل عالشارع و عم يجمع بين سلمية غاندي و حلم خالد بن الوليد بالاستشهاد بساحة المعركة..الزعل عليهون رح يكون مجرد انانية مننا اذا ما بيتحول هالزعل لغضب عارم…الدموع ما رح تعمل شي غير انها تغسل دم الشهداء من على ايدينا..ما فينا نزعل عليهون..ماتو شهدا..ماتو بسبيل اعظم هدف..الوطن…هنن طلعو و رضيانين بنهايتهون بس ابدا ما بدهون دموعنا..بدهون يانا نكمل و نمشي و نحقق الشي يلي ماتو بسبيله….هنن استشهدو كرمال الوطن…و نحنا يا منخلي اسمائهون تنكتب على نصب تذكاري بساحة الشهداء بسوريا الجديدة بعد اسقاط النظام.. يا اما منخليهون مجرد ارقام و احصائات لعدد ضحايا مجازر النظام..2500..4000.. 10000 ضحية ….ليستعملوهون ولادنا او ولاد ولادنا بفيديوهات ثورتهون ضد نظام الاسد بسوريا….يلي بدو يستشهد ما بدو دموعنا…ما بدو مننا شي غير نكمل و ما نخلي موتو يضيع هدر ..اذا كان مؤمن بالله..فرحلتو عالابدية بلشت بمنزلة شهيد…و اذا كان مالو مؤمن..فهو بيعرف انو بمجرد غمض عيونو..فكلشي انتهى بالنسبة الو…و الموت بسبيل الوطن بالنسبة الو اهم من العيشة بدون وطن…ما بينزعل عليهون..هنن شو ما كان…انتقلو لشي احسن..الزعل علينا نحن يلي ضلينا من بعدهون….المسؤولية يلي تركولنا ياها مالهة سهلة…

مشكلتنا يا جماعة هي البصلة المحروقة و فوتة الاولويات بالحيط…. بزمناتو لما كان عم يطلع مظاهرتين بالبلد فيهون عشرين زلمة….بلشنا نتخانق على تفاصيل اسم الدولة و القياس و اللون و الرتوش بعد سقوط النظام ….و هلأ بالوقت يلي لسا ما عم نقدر نعمل الحشد الكافي او ما عم نقدر نكون اذكى من الامن و نعتصم بأعداد كبيرة و نفرض قوانين اللعبة بعد كل يلي صار. ..  قاعدين عم نختلف و نتخانق على قصة التدخل الاجنبي بمجرد انو ليبيا تحررت…. نفس الشي وقت بلش رمضان و قررنا و اعلنا انو من هون لاخر الشهر رح يسقط النظام…بنينا امال مستحيلة و هلأ رح نعاني من تبعات الخيبة…مالنا مصر او تونس لنتوقع يطلع بشار و يتنحى …ومالنا ليبيا انو الغرب يتدخل عسكريا بدون تردد…ثورتنا ضد كلشي موازين بالمنطقة..موازين يلي طول عمرها خدمت حكومتنا و اعدائنا و حكومات تانية و بعمرها ما خدمتنا كشعب .. فطريقنا مطول و شائك كتير…نظامنا وسخ و عرفان انو مدلل خارجيا و معو صلاحيات اكتر من غيرو…فأبدا ما نتوقع يتغير شي بثمن رخيص…..و اكيد مافينا نتوقع انو رح تخلص بسرعة…..

طريقنا شائك كتير و لسا طويل..المهم ما نوقف و نتنظم و نتعاون……و لما نزلنا عالشارع ضد اكتر نظام مجرم بالعالم..ما حدا كان متوقع..و لما نزل الجيش و الطيران و البحرية قصف فينا..ما حدا توقع نضل عم ننزل…بس مع هيك نزلنا و شبابنا عم ينزل و رح يضل عم ينزل…نحنا شباب بعمرنا ما كان عنا قضية حقيقة..منشجع نضال الدول التانية و منفرح اذا انتصرو..بس بعمرو ما كان عنا هدف..هلأ الامور اختلفت…صار في هدف مشترك..و بعد اربعين سنة من الكبس و الحرمان و الشتات..و خلال كم شهر…خلينا دول العالم يطلبو من رئيس اكبر مافيا بالعالم بالتنحي…شبابنا عملو هالشي..مو الملك..و لا رئيس و لارئيس وزراء اي دولة تانية…مو الامم المتحدة…مو مجلس الامن او حقوق الانسان..فقنا و ما حدا متوقع نفيق..و رح نضل فايقين و نفرض واقعنا عالعالم كلو..و يلي مو عاجبو يروح يبلط الزرقا..

الشعب المؤامرَتجي

أغسطس 17, 2011 - 3 تعليقات

انو حياتنا مليئة مؤامرات…اذا بدنا…كلشي منعرفو هو مؤامرة…

الشغلة حسب شلون منشوفها…انو مو قصة نص مليان و نص فاضي لاء غير…بس فكرة او عقدة المؤامرة ممكن تكون موجودة و قوية بنظري…و ممكن ما تكون موجودة او واردة من نظرك اطلاقا يعني و بتاتا……بس انو ليش هيك؟ يعني يا في مؤامرة…يا مافي….

هلأ نحن بشكل عام من جماعة المؤامرة…يعني اول ما منسمع قصة عن شو ما كانت…فينا برياحة نلاقي فيها مؤامرتين او تلاتة…هيك فيكون تعتبروها نعمة من عند ربكون…انو مو كل العالم هيك ع فكرة…

هلأ حتى مفهوم النعمة بخصوص القدرة على استشعار المؤامرة عن بعد في عليه خلاف ببعض الاوساط هون و هنيك…انو نعمة من باب انو فينا نشوفها اريح..انو في شغلات كبيرة كتير و جدا عم تحرك كلشي و تحيك مؤامرات رشا و دراكا…..و نحن خلص منستشف المؤامرة و منكمل حياتنا عادي….انو شو صاير؟ ابدا و الله مؤامرة…ايه على مين يا بابا…قال مؤامرة..علينا نحن؟..فأنو هيك نحن…اما انو نفوت بوجع الراس و نصفن بالمؤامرة و نشوف شلون و شو و كيف و مين و معقول و بجد و بركي و يا ترى و انو ليش و لشو و شو الفكرة من هالمؤامرة…مالنا بهل القصص…خلص اخي لك مؤامرة…و المثقف مننا بيقدر يحللك و يتوسعلك شوي بشرحو عن المؤامرة و بيستعملك امثلة تاريخية من كل الحقب الماضية ابتداءا من الاغريق وصولا للحماصنة…بس انو مؤامرة…

هلأ نحن اجمالا عنا تقبل لمفهوم انو في شي كبير عم يصير و نحنا ما علينا الا من عيالنا و اكلنا…..يعني بحكم مجتمعنا و تؤثرو بالدين و النظام السياسي الطويل يلي عشنا تحتو…كلو بيخلي الانسان السوري يكون اكثر تقبلا لمفهوم المؤامرة….انو ممنوع نسئل عن اي شي…بكل اشكال حياتنا و من صغرنا….بابا ليش مافي علب محارم عند المحل..بابا هي اسرائيل…بابا ليش السمنة بتجي تهريب من لبنان؟ كلو من ورا اسرائيل…طيب بابا شو اسمها الحفرة يلي بالحديقة؟ انو روح سئال امك….ماما شو نحنا…حبيبي نحنا مسلمين او مسيحيين…طيب ماما شو يعني؟ يعني في الله او رب و ساوانا و لازم نعمل و نساوي…طيب ماما شو هادا الجنس؟ خراس ولك حيوان و طخ طيخ عليك و على ابوك…اذا بتحكي هيك قصص بدي حط فلفل على لسانك…….منروح منسئل رفقاتنا…عندهون نفس الاجوبة….انو الانسان بطبيعتو الغريزية فضولي و عندو اسئلة…انو هيك لو ما كان الانسان فضولي ما كان نفد و ضل عايش لهلأ…نحنا منجي عنا اسئلة كتير..متل اي مخلوق تاني…بس ما مناخد اجوبة…غير اجوبة محدودة و معباية خطوط حمرا…فبصير عنا هيك منطقة بالمخ بتصير مسؤولة عن توليد المؤامرات اللارادية..هلأ هالمنطقة عم تشتغل اساسا لانو انو منطقة و لازم تشتغل و الا ما كانت موجودة…انو على حسب نظرية العضو الذي لا يُستعمل يضمر…..فهل المنطقة بغياب الاجوبة و بغياب المساحة المطلوبة لحرية لتقدر هالمنطقة تربط  هالاجوبة ببعضها و تحللها على مهل و تكبر و تصير تفهمها اكتر…بتصير بتحاول تعوض بأي شي بتسمعو…

هلأ نحنا كبشر..بدنا نعرف..او نحس حالنا منعرف..او منعرف حدا بيعرف…غير هيك منفوت بالحيط و منتلبك ببيضاتنا ليلي عندون بيضات و ما بعرف بنات حوا بشو بيتلبكو بالعادة….هالشي مو غريب و لا شي…من زمان..وقت قالو لك لعمش شو هاد الضو يلي بالسما…يا محمد شو ضو…لك شو هاد…راحو لعند الختيار قالولو شو هالضو؟ صفن شوي هيك و اتطلع على الراديو يلي عالطاولة و شاف جوز بطاريات ماركة برق…قلهون يا ولاد هادا اسمو برق و هدا في واحد كتير قوي و كبير اسمو زيوس و عندو كرباج لما بينبعص من شي بيخبط بالكرباج بيقوم بيطلع البرق…فالشغلة انتو مالكون فيها روحو نامو….فهيك بيكونو عرفو…بيكونو ماشيين بشوفو برق او رعد او اي شي..بيعرفو انو زيوس علقان مع اخوه بخناقة…عنصر اللاادري يلي بولد خوف عندهون زال بالمعرفة يلي اجتهون من هالختيار…عيني ربو هالختيار شو بيفهم…هلأ بيجوز يجي واحد يقلك لك بلا زيوس بلا ضراط…هدا البرق بسبب جزئيات متجمدة بتصطدم بجزيات سائلة بالغيمة و بيفوتك بألكترون و بيطلعك بفوتون و فجأة قصة الختيار هي الاختيار الانسب..انو اسهل شو هالتعقيد..قال الكترون قال..تلحس طيزي شو مفزلك……و القصة استمرت ليومنا هاد…بس اتطورت مع تطور البشر و مجتمعاتهون و ما عدنا لا نصدق زيوس و لا كرباجو…..من زمان كانو يفكروه مؤامرة و علقانة خناقة..هلأ منعرف البرق و مين ورا…..بس انو عنا اسئلة تانية ضمن محيطنا…هدول لهلأ مافينا نسئلهون و ماعنا غير كلام الختيار…

مفهوم انو في شي كبير عم يحرك كلشي…مالو بعيد عن تفكيرنا…على اعتبارنا شعب متدين بالاغلب و ضعيف و مكسور بالمجمل العام على مر خمسين سنة…يعني بغض النظر عن شو نوع الدين..انو متدينين…و بالتالي مفهوم الشي الاعظم يلي عم يحرك حياتنا بشكل او بأخر مالو غريب عننا…فمو صعب نستسلم لمفهوم المؤامرة لما في شغلات شوية كبيرة حوالينا… انو اميركا و اسرائيل و مؤامرات عالمية..والمحاور و الايادي الخفية دائما الها مكان…و مكان خصب و عنا قابلية انو نصدقها و نقتنع فيها اكتر من انو نحلل المعلومات و هيك نصفن فيها بفرنكين من كذا زاوية مختلفة… هالشي عنا كمجتمع مو لاننا بطبعنا هيك…و التدين مالو السبب الرئيسي كمان بس انو عنصر مساعد و خصوصا بمجتمع مقموع …و هي لحالها بدها قعدة…بس منخليها لبعد الثورة….

احد الاسباب الرئيسية برأيي انا بشوفو هو نظام التعليم…و ما بقصد المنهاج الدراسي….نظام التعليم يلي ساهم بقتل فكرنا من اول ما نفوت عالمدرسة لوقت ما نتخرج من الجامعة…. نظام التعليم عنا مالو مصمم ليخلينا نصير نفكر و نسئل و نتسائل و نبحث و نناقش و ننقض…اسلوب طرح المعلومات بكل المستويات بيكون عامودي و بجهة وحدة  من فوق لتحت…منتلقى المعلومات و بعدين منكتب فحص بالمعلومات يلي حفظناها….و سنة بعد سنة منصير منحفظ شي جديد و مننسى شي قديم…منكبر و المعلومات رح تنتسى و بيبقى السؤال شو الفكرة من تعليمنا لكن؟

التعليم بالاصل هدفو مو بس اعطاء المعلومة و تخزينها..في كمبيوترات لهل الشي…بل تدريب الطالب على ايجاد المعلومة…تحليلها…بحثها.. مناقشتها….و تقييمها بناءا على البحث و التحليل و النقاش و استعمالها…….بينما نحن من نعومة اظافرنا منتعود انو نكون متلقين للمعلومات و مجترين لها…منسمع و منحفظ و منكرر و منعيد….لنوصل للجامعة و منحفظ الملخصات و اسئلة السنوات السابقة و مننجح و منتخرج و فكرنا تعود على ملخصات احادية المصدر….ما بدنا نحلل..هات ملخص…و انا بحفظو و ببصمو و بعيدو…انت الك منصب معناها خبرني عن حياتي بملخص..قبلك كان في استاذ الجامعة و المدرسة و مدرب الفتوة هيئوني لانو اتقبل ملخصك لانو عندك منصب…….ما بدي اصفن بحياتي و فكر ببأسي…انت عطيني ملخص و قلي شو وضعي…هلأ نحنا ما منقول هيك بالحرف فكري…بس يعني نحنا مهيئين و بشكل ممنهجي معودين انو نتقبل اي معلومة مصدرها انسان ذو سلطة اعلى…و ناخدها بدون ما نفكر فيها لانو تعودنا على هيك انو مافيك…ما بتناقش استاذك او مديرك او شيخك او ابوك ..

تعليمنا البعثي المتخلف و الغبي…هيئنا لانو نكون مستقبلين مجترين للمعلومات..ما هيئنا و حارب بشدة فكرة انو نكون معالجين و محللين للمعلومة…خلونا نكون هارد ديسك بدال ما نكون معالج او بروسسر….الهارد ديسك بتحفظ عليه المعلومات…بطعمة و بلا طعمة…فيك تحفظ عليه زبالة..و بعدين بيتعبى و بتوقف القدرة على استيعاب المزيد من المعلومات و بيصطم…بينما المعالج بيحلل المعلومات و بيمحي الزبالة….مثلا فيك تحفظ قصة الالماسة الزرقاء على الهارد ديسك برياحة…قصة مسلية و مقتبسة عن مجموعة من افلام هولييود مع لمسة دان براون..لما بكون مجرد هارد ديسك..بحفظها و بضل عم عيدها…انو مؤامرة و مناسبة..و قصة و موجودة..ملخص بيفسر كلشي عم يصير..شو بدي احلى من هيك…ما عندي معالج يحللها او مالي مربى انو كون معالج لاقدر حللها و شوف انو شو  مصدرها…و شو تفاصيلها..و ين الادلة..وين المنطق..و قارنها بالمعطيات التانية و الكتيرة و الواقع يلي عايشو… و اوصل لحقيقة انو لعمى شو كنت جحش….لعمى شو كنت غبي….لك هدول مجرمين..هدول كزابين….هدول مافيا…هدول قتلة و لصوص..لك انا انسان..حياتي مو مجرد امشي من الحيط للحيط..انا انسان عندي حقوق ضايعة و بلد مسروق و منهوب…انا انسان و مالازم يكون اكبر همي انو اقدر اشتري بيت بالضاحية و سيارة تشيري…….انا انسان..انا حر!

الحزب الواحد و القائد ما هيئنا نكون معالجين للمعلومات…مالو مصلحة نعالجها و نستنتج اننا بشر و نعرف حقوقنا و نطالب فيها….

العالم يلي عم ينقتلو يوميا بكل المحافظات السورية هنن ضحايا مؤامرة..مؤامرة بلشت من اربعين سنة ضد عقولنا…ضد تفكيرنا…ضد انسانيتنا..ضد ضميرنا…و رح يضلو عم ينتقلو و ينقتلو…طول ما لساتنا عم نحفظ المعلومات بدال ما نعالجها و نفهم واقعنا و نقرر ننزل عالشارع كلنا و نعالج القصة و نوقف المجازر نخلص من هالمؤامرة الاسدية ونس اند فور اول.. و نبلش من اول و جديد..كلنا..بس هالمرة مو كرفاق..بركي هالمرة منبلش كولاد وطن سوري واحد…جربنا الحزب الواحد..اكلنا خرى…خلينا نجرب شي تاني اكبر و اوسع…

خلينا ننهي المؤامرة..يا جحش!

تابع

Get every new post delivered to your Inbox.

Join 37 other followers